19 Mar 2021, 09:06
ފިޒީ ޑްރިންކާއި އެކި ވައްތަރުތަކުގެ އެނާޖީ ޑްރިންކް ނުބޯށޭ ބުނާއަޑު އަބަދުވެސް އިވެއެވެ. ކިތަންމެ ނޫންކަމަށް ހެދިގެން އުޅުނަސް އުމުރުގެ ކޮންމެވެސް ހިސާބެއްގައި މި ބުއިމެއްގެ ރަހަ ބަލާނުލާނެ މީހެއް ހަމަ ހޯދާ ނުފެންނާނޭ ބުންޏަށް ދޮގަކަށް ނުވާނެއެވެ. އެހާ ބޮޑަށް އިޝްތިހާރު ކުރެވޭ އަދި ސިއްރުސިއްރުންނާއި ފާޅުގައި ބޮވެވޭ މި ބުއިންތަކުން ހަށިގަނޑަށް ކުރާ އަސަރަކީ ކޮބައިބާވައެވެ. މި ސުވާލުތައް މިފަހަރު މިކޮށްލީ އަހަރެމެންނާއި އެންމެ ގާތް، ޑައިޓީޝަން އާސިޔާ އަބްދުލް ރަހީމް އާއި އެވެ.
ފިޒީ ޑްރިންކް އަކީ ހަމަ ހުސް ހަކުރު
ގިނަ ފަހަރަށް ފިޒީ ޑްރިންކާއި އެނާޖީ ޑްރިންކްސްގެ ވާހަކަ އެއްކޮށްލައިގެން ދެކެވުނަސް މިއީ ހަމަ މުޅީން ތަފާތު ދޭއްޗެކެވެ. ފުރަތަމަ ފިޒީ ޑްރިންކަށް ބަލާލާއިރު އާސިޔާ ވިދާޅުވަނީ މިއީ ހަމަ ހުސްވެސް ހަކުރު ކަމަށެވެ.
"ފިޒީ ޑްރިންކަކީ ކުޑަ އެތިފޮދެއްގައި ވެސް ވަރަށް ބައިވަރު ހަކުރު އެކުލެވޭ އެއްޗެއް. އެހާބައިވަރު ހަކުރު ހަށިގަނޑަށް ދިއުމަކީ ރަނގަޅުކަމެއް ނޫން. މަންމަގެ ބަނޑުގައި ދަރިފުޅު އަށަގަތީއްސުރެ މަރުދުވަހާއި ހިސާބަށްވެސް ހަމަ އެންމެ ރަނގަޅު ގޮތަކީ ހަކުރުގެ ގޮތުގައި ހުންނަ އެޑެޑް ސުގާސް ބޭނުންނުކުރުން." އާސިޔާ ވިދާޅުވި އެވެ.
ހަކުރަކީ އޭގެ ޒާތުގައި އަހަރެމެންގެ ހަށިގަނޑަށް ވަކިން ބޭނުންވާ އެއްޗެއް ނޫނެވެ. އޭގެ ބަދަލުގައި ހަކަތައަކީ އަހަރެމެންގެ ކައިއުޅޭ ކާނާއިން އުފައްދައިދޭ އެއްޗެކެވެ. އެހެންނަމަވެސް ފޮނި ރަހަ ލެއްވުމަށްޓަކައި ހަކުރު ބޭނުންކުރެވޭއިރު ދުނިިޔޭގެ ސިއްޚަތާއިބެހޭ ޖަމިއްޔާއިން ބުނަނީ މުޅި ދުވަހުގެ ކެއުމުގައި ހިމަނަންޖެހޭ ހަކަތައިގެ 10 ޕަސެންޓް ހިމެނިދާނެ ކަމަށެވެ. އާސިޔާ ވިދާޅުވަނީ މިއީ އަހަރެމެން ބޭނުންކުރާ އާދައިގެ ސަމްސާއެއްގެ ދެ ސަމްސާ ހަކުރު ކަމަށެވެ. އަދި ސިއްޚީ ގޮތުން މި މިންވަރު އެންމެ އެދެވޭ މިނެއްގައި ބެހެއްޓުމަށް މި އަދަދު ފަސް ޕަސެންޓަށް ދަށްކުރުމަށް ވެސް ދުނިޔޭގެ ސިއްޚަތު ޖަމިއްޔާއިން އިލްތިމާސް ކުރެއެވެ.
އެހެންކަމުން އަހަރެމެންގެ ހަށިގަނޑަށް އެންމެ އެދެވޭ މިންވަރަކީ ދުވާލަކަށް އެއް ސަމްސާ ހަކުރެވެ. އެހެންނަމަވެސް އާންމުކޮށް ލިބެން މިހުންނަ ފިޒީ ޑްރިންކެއްގައި (500 އެމްއެލް ދަޅެއްގައި) މަދުވެގެން މޭޒުމަތީ ފަސް ސަމްސާ ހަކުރު ހިމެނެއެވެ.
ބަރުދަން އިތުރުވެ، ފުރަމޭގައި ސަރުބީ!
ބޯލާ ކިތަންމެ ކުޑަ 'ސިޕެއްގައި'ވެސް މިހާ ގިނަ އަދަދަކަށް ހަކުރު ހުންނައިރު، މީގެ ސަބަބުން ހަށިގަނޑަށް ކުރާ ނުރައްކާތައް އެހާމެ ގިނައެވެ. އެންމެ ފުރަތަމަ ކަމަކީ އެންމެނަށްވެސް އެނގޭފަދައިން ބަރުދަން އިތުރުވުމެވެ. އެއަށް ފަހު ފުރަމޭގައި ސަރުބީ ހިފުމާއި، ހަކުރު ބަލި ހުންނަނަމަ ހަކުރު ކޮންޓްރޯލްކުރަން އުނދަގޫވުމާއި އަދި ނުވިތާކަށް ހަށިގަނޑަށް ނުރައްކާތެރި ދެ ބާވަތުގެ ވެސް ކޮލެސްޓްރޯލް މަތިވުމެވެ. މިހުރިހާކަމެއްގެ އާޚިރު ނަތީޖާއަކީ ތިމާގެ ހަށިގަނޑު އާންމު އެހެން ބަލިތަކަށް އެއްވެސް ހިފެހެއްޓުމެއް ނެތި ހުޅުވާލެވުމެވެ.
އަދި ހަމައެޔާއެކު މިހާ ގިނަ އަދަދަކަށް ހަކުރު ހަށިގަނޑަށް އެތެރެކުރެވުމާ އެކު، ހަށިގަނޑަށް ބޭނުންވާ ފައިދާހުރި މާއްދާތައް ނުލިބި އެ މަންފާތަކުން ހަށިގަނޑު މަހްރޫމު ވެއެވެ. ނުވަތަ މަލްނަރިޝް ވެއެވެ. ގިނަފަހަރަށް މަލްނިއުޓްރިޝަން އޭ ބުނެވުމުން ހިތަށް ސިފަކުރެވެނީ ހިކި އަނަރޫފަ ހަށިގަނޑުކަމުގައިވިޔަސް ހަގީގަތުގައި އެޢީ މީހެއްގެ ހަށިގަނޑަށް ބޭނުންވާ މާޢްދާތައް ހަމައަށް ނުލިބުމެވެ. ކިތަންމެ ފަލަކޮށް ހުއްޓަސް އަދި ހިކިކޮށްހުއްޓަސް މިއީ ހަމަ ވެދާނެ ކަމެކެވެ.
"މިހާރަކަށް އައިސް ފާހަގަކުރެވޭނެ ވިޓަމިން ޑީ އާއި އެއްޗެހި ގިނަބައެއްގެ ވަރަށް މަދުވޭ. އެހެންގޮސް، ގިނަ މީހުންގެ ޕްރޮފައިލްތައް ނުބެލެނީ. އެކަމަކު ބަލައިފިނަމަ އެބަ ފާހަގަވޭ ހަމަ ގިނަ ވިޓަމިންތަކެއް މަދުވާކަން. އެހެންވީމަ މިއެއްޗެހި ބޭނުންކުރާ ނަމަ މިއީ ހަމަ ހައްތަހާވެސް ކުރިމަތިވެދާނެ ކަންކަން" އާސިޔާ ވިދާޅުވި އެވެ.
އެނާޖީ ޑްރިންކްތައް: ގޮތް ނޭގޭ އެތަށް މާއްދާއަކުން ފުރިފައި
ދެހާސް ނަވާރަ ވަނަ އަހަރުގެ ފަހުކޮޅު މޯލްޑިވްސް ކަސްޓަމްސް ސާރވިސްއިން ކޮށްފައިވާ ޓްވީޓެއްގައިވާ ގޮތުން 2018 ވަނަ އަހަރު އެކަނިވެސް ދުވާލަކަށް 2000 ލީޓަރުގެ ކަޅުހަމަށް ވާވަަރަށް އެނާޖީ ޑްރިންކްސް ރާއްޖެއަށް އެތެރެކުރެވުނެވެ. މިއީ ޖުމްލަ 2،988،458 ލީޓަރުގެ ބުއިމެވެ.
އެނާޖީ ޑްރިންކްތަކުގައި ފިޒީ ޑްރިންކްތަކެކޭ އެއްފަދައިން ގިނަ އަދަދެއްގެ ހަކުރު އެކުލެވޭއިރު އެންމެ ކަންބޮޑުވާކަމެއްގެ ގޮތުގައި އާސިޔާ ފާހަގަކުރައްވަނީ މި ބުއިންތަކަށް އަޅާ ގޮތް ނޭނގޭ މައްދާތަކެވެ.
މިހާތަނަށް ހަދާފައިވާ ދިރާސާތަކުގައިވާގޮތުން އެނާޖީ ޑްރިންކްސް ބޭނުންކުރުމުން ޅައުމުރުގައި ބޮޑެތި ބަލިތައް ޖެހުމުގެ ފުރުސަތު ބޮޑުވެ އެވެ. މީގެތެރޭގައި ހަކުރު މައްޗަށް ދިއުން، ލޭ މައްޗަށް ދިއުން އަދި ހިތުގެ ބަލިތައް ހިމެނެެ އެވެ.
"އެނާޖީ ޑްރިންކަކީ އެ ބުއިމުން ހަށިގަނޑުގެ ވިންދު ވަރަށް އަވަސްކޮށްދޭ އެއްޗެއް. ކުއްލިއަކަށް އެ އެނާޖީ ބޫސްޓް އެ އިހުސާސްވަނީ އެހެންވީމަ. ނޫނީ މީހާއަށް ކިކެއް އެ ދެނީ. އެކަމަކު އެއީ މީހާއަށް މެއިންޓެއިން ކުރެވޭނެ ކިކެއް ނޫން. މާނައަކީ އެ ބޮއެފައި އެއަރާ ކިކާއި އެކީ ދެންވެސް އެ ނުބޮއެފިއްޔާ މީހާގެ ހަށިގަނޑުން މާ އަވަހަށް ހަކަތަ ބަލިވެގެންދާނެ. "
ގިނަ ފަހަރަށް އެނާޖީ ޑްރިންކް ފަދަ ބުއިންތައް ކަމުގޮސް ބޭނުންކުރަނީ އެކިކަހަލަ ކުޅިވަރުތައް ކުޅޭ މީހުންގެ މެދުގައެވެ. ނަމަވެސް ކުޅެން ފެށުމުގެ ކުރިން މިފަދަ ބުއިންތައް ބުއިމަކީ ހިތް ހުއްޓުމަށް ނުވަތަ ހާޓް އެޓޭކް ޖެހުމަށް މަގުފަހިވާ ކަމެއްކަން އާސިޔާ ފާހަގަކުރެއްވިއެވެ.
މިތަކެތި ބޮވައިގަތުން ކޮންޓްރޯލް ކޮށް ހުއްޓާލަންޖެހޭނީ މަޑުމަޑުން!
ގިނަފަހަރަށް މިފަދަ ފިޒީ ޑްރިންކަކަށް ނުވަތަ އެނާޖީ ޑްރިންކަކާއި ދިމާލަށް އަތްދިގުކުރެެވެނީ ހަމަ ބޮވައިގަނެގެނެވެ. މިި ބޮވައިގަތުން ކޮންޓްރޯލް ކުރެވޭނެ ނުވަތަ އެހެން ގޮތަކަށް ފަރުޖައްސާލެވޭނެތޯ އަހާލުމުން އާސިޔާ ވިދާޅުވީ މިކަމަށް ވަކި މާ މޮޅު ގޮތްތަކެއް ނެތްކަމަށެވެ.
"ގިނައިން ފިޒީ އެއްޗިއްސަށްވުރެވެސް އެނާޖީ ޑްރިންކަށް ކްރޭވް ވާލެއް ބޮޑު. އަނެއްކޮޅުން ކުއްލިއަކަށް ހުއްޓާލައިފި ނަމަ ވިތްޑްރޯވަލް ސިމްޕްޓޮމްސް ވެސް ދިމާވާނެ. އެހެންވީމަ މި އެއްޗެހި ބުއިން ހުއްޓާލަން ބޭނުންނަމަ ޖެހޭނީ މަޑުމަޑުން ހުއްޓާލަން. އަމިއްލައަށް މީ ގޯސްއެއްޗެއްކަން ދަނެގެން މިކަމުން ދުރުވާން" އާސިޔާ ވިދާޅުވިއެވެ.
ހަމައެޔާޢެކު، ފިޒީ އެއްޗެއް ބޯލަން ބޭނުންވާ ކޮންމެފަހަރަކީ އަދި ކޮންމެހެން އެ އެއްޗެއް ބޮަވައިގަންނަ ފަހަރަކަށް ނުވެދާނެ އެވެ. އޭގެ ބަދަލުގައި ބަނޑުހައިވުމާއި ކަރުހިއްކައި ގަތުމުގެ ފަރަގު ދެނެގަނެ، ހަށިގަނޑުން އެ އެއްޗެއް ބޭނުންވެގެން ރޮއެގަތުމުގެ ކުރިން ފެން ބޮއެ އަދި ގަޑިން ގަޑިއަށް ކައިގެން ހުރުމަކީވެސް މިތަކެތިން ތިމާގެ ހަށިގަނޑު ދުރުކޮށްދީ ދުޅަހެޔޮ ދިރިއުޅުމަކަށް އެޅިގެންދާނެ ފިޔަވަޅެކެވެ.
ހަމައެޔާއެކު އާސިޔާ ވިދާޅުވި އެންމެ މޮޅު އެއް އުކުޅަކީ ހަށިގަނޑަށް ރަނގަޅުނޫން މިފަދަ ބުއިންތައް ގޭގައި އެއްވެސް ވަރަކަށް ގަނެފައި ނުބެހެއްޓުމެވެ. އޭރުން އަދި ބޯހިތްވާ ކޮންމެ ފަހަރަކު ކައިރި ނުވަތަ ޖެހިގެން ހުރި ފިހާރައަށް ދާން ބުރައަކަށްވެސް މި އެއްޗެހި ނުބޮއެ ފަރުޖައްސާލެވޭނެ ތާއެެވެ.