18 Mar 2021, 20:41
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ބޭނުންވާ ވަރަށް އަދިވެސް އޮފިޝަލުން ހަމަނުވާ ކަމަށާއި، ކުރިއަށް އޮތް ހަފްތާ ތެރޭގައި އޮފިޝަލުން ހަމަނުވެއްޖެ ނަމަ ބޮޑެތި ދަތިތަކެއް ކުރިމަތިވާނެ ކަމަށް އިލެކްޝަންސް ކޮމިޝަނުގެ ރައީސް އަހްމަދު ޝަރީފް ވިދާޅުވެއްޖެ އެވެ.
ޝަރީފް މިރޭ "ސަން" އަށް ވިދާޅުވީ ރިޒާވަރުން ހިމެނޭ ގޮތަށް އަދިވެސް 1000 އޮފިޝަލުން ބޭނުންވާ ކަމަށެވެ. އަދި އޭގެ ތެރެއިން 700 އޮފިޝަލުން ބޭނުންވަނީ މާލެއަށް ކަމަށް އޭނާ ވިދާޅުވި އެވެ.
ކޮވިޑް19ގެ ހާލަތުގައި ވޯޓުލުން ކުރިއަށް ގެންދެވޭނީ ހެލްތު ޕްރޮޓެކްޝަން އެޖެންސީ އެކުލަވާލާފައިވާ އުސޫލާ އެއްގޮތަށެވެ. އެގޮތުން ވޯޓުލާ މަރުކަޒަށް އެއް ފަހަރާ ވަދެވޭނެ މީހުންގެ އަދަދު ވަނީ ކަނޑައަޅައިފަ އެވެ. އަދި ގައިދުރުކަން ބަހައްޓައި، ރައްކާތެރިކަމުގެ ފިޔަވަޅުތައް އަޅަން ޖެހޭނެ އެވެ. އެހެންކަމުން ކޮންމެ ވޯޓު ފޮށްޓަކަށް ވޯޓުލާ މީހުންގެ އަދަދު އިލެކްޝަންސް ކޮމިޝަނުން ވަނީ މަދުކޮށްފަ އެވެ.
ޝަރީފް ވިދާޅުވީ، ބޭނުންވާ އަދަދަށް އޮފިޝަލުން ހަމަނުވެއްޖެ ނަމަ، އެންމެ ފަހު ވަގުތު ޖެހޭނީ ދެ ފޮށި އެއްކޮށްލައި، ވޯޓުލާ މަރުކަޒުތައް މަދުކޮށްލަން ކަމަށެވެ.
"އޭރުން ދިމާވާނެ ގޮތަކީ، ބައެއް ފޮށިތައް އެއްހާހުން މައްޗަށް އަރާނެ ވޯޓު ލާ މީހުންގެ އަދަދު. އެހެންވީމަ އިތުރު ޗޮއިސް އެއް ނޯންނާނެ އޮފިޝަލުން މަދުވެއްޖެއްޔާ،" ޝަރީފް ވިދާޅުވި އެވެ.
އެހެންކަމުން ޝަރީފް ވަނީ ވީހާވެސް ގިނަ މީހުން އޮފިޝަލުންގެ ގޮތުގައި ރަޖިސްޓާވުމަށް އެދިވަޑައިގެންފަ އެވެ. ޝަރީފް ވިދާޅުވީ މިއީ ޕާޓް ޓައިމްކޮށް ކިޔަވާ ދަރިވަރުންނާއި، މިވަގުތު ވަޒީފާއެއްގައި ނޫޅޭ ފަރާތްތަކަށާއި، އަދި ޗުއްޓީގައި ތިބި ފަރާތްތަކަށް ވެސް ވަރަށް ރަނގަޅު ފުރުސަތެއް ކަމަށެވެ.
ޝަރީފް ވިދާޅުވީ އިންތިހާބަށް ތަމްރީނު ކުރުމަށް ކުރިއަށް ގެންދާ ޓްރެއިނިން ސެޝަންތަކުގައި ދުވާލަކަށް 300 ރުފިޔާގެ އެލަވަންސެއް ލިބޭނެ ކަމަށާއި، ވޯޓުލާ ދުވަހު ވެސް ވަރަށް ރަނގަޅު އެލަވަންސެއް ލިބޭނެ ކަމަށެވެ.
އެގޮތުން ވޯޓުލާ ދުވަހު ވޯޓު ފޮށީގެ އެންމެ އިސްވެރިޔާއަށް 1800 ރުފިޔާ، އިސްވެރިޔާގެ އެހީތެރިޔާއަށް 1500 ރުފިޔާ އަދި އޮފިޝަލުންނަށް 1200 ރުފިޔާ ލިބޭނެ ކަމަށް އޭނާ ވިދާޅުވި އެވެ.
ވޯޓުލުން ކުރިއަށްދާއިރު، އޮފިޝަލުންގެ ރައްކާތެރިކަން ކަށަވަރުކުރާނެ ކަމުގެ ޔަގީންކަން ޝަރީފް ދެއްވި އެވެ. ޝަރީފް ވިދާޅުވީ ހުރިހާ އޮފިޝަލުން ވެސް ތިބޭނީ ފޭސް ޝީލްޑާއި، ފޭސް މާސްކް އަޅައިގެން ކަމަށާއި ހުރިހާ ވަގުތެއްގައި ވެސް ގައިދުރުކަން ބެހެއްޓޭނެ ގޮތަށް އިންތިޒާމް ހަމަޖައްސާނެ ކަމަށެވެ.
އޮފިޝަލުންނަށް ވުމަށް އެދި ހުށަހެޅުމުގައި ފަސޭހަ ގޮތްތަކެއް މިހާރު ވަނީ ހަމަޖައްސައިދީފަ އެވެ. މިހާރު ގޫގުލް ފޯމެއް މެދުވެރިކޮށް ރަޖިސްޓާވެވޭނެ އެވެ.
އަންނަ މަހުގެ 10 ވަނަ ދުވަހު ބާއްވާ އިންތިހާބަށް 10،000 އަށް ވުރެ ގިނަ އޮފިޝަލުން ބޭނުންވާ ކަމަށް އީސީން ވަނީ ކުރިން ބުނެފަ އެވެ.
މިފަހަރުގެ އިންތިހާބަށް 735 ވޯޓުލާ މަރުކަޒު ބިނާކުރަންޖެހޭނެ ކަމަށް އީސީން ވަނީ ލަފާކޮށްފަ އެވެ. އެއީ ރިސޯޓުތަކަށާއި، އެޗްޕީއޭގެ ގައިޑްލައިންއާ ގުޅިގެން މާލެއަށް އިތުރުވާ ފޮށިތަކާ އެކު އެވެ.