17 Mar 2021, 10:38
ބްރެޒީލިއާ (މާޗް 16): ބްރެޒިލްއަށް އަނެއްކާވެސް އާ ހެލްތު މިނިސްޓަރަކު އައްޔަން ކުރަން ނިންމާފައިވާކަން އެގައުމުގެ ރައީސް ޖައިރު ބޮލްސޮނާރޯ އިއުލާން ކުރައްވައިފި އެވެ.
ބޮލްސޮނާރޯ ވިދާޅުވި ގޮތުގައި ބްރެޒިލްގެ ހެލްތު މިނިސްޓަރު ކަމުން އަސްކަރިއްޔާގެ ޑިވިޝަނަލް ޖެނެރަލް އެޑުއާޑޯ ޕަޒުއެލޯ ވަކި ކުރުމަށް ފަހު ދެން އެ މަގާމަށް އައްޔަން ކުރާނީ ހިތުގެ ބަލިތަކަށް ހާއްސަ ޑޮކްޓަރެއް ކަމަށްވާ މާސެލޯ ކެއިރޮގާ އެވެ. އެހެންކަމުން އޭނާ ވާނީ ކޮވިޑް-19 ބަލިމަޑުކަން ފެށުނު ފަހުން އެގައުމުގައި ހެލްތު މިނިސްޓަރުކަން ކުރައްވާ ހަތަރު ވަނަ ބޭފުޅާއަށެވެ.
"ހެލްތު މިނިސްޓްރީއަށް ޑޮކްޓަރު މާސެލޯ ކެއިރޮގާ އައްޔަން ކުރަން ވަނީ ނިންމާފަ. އެ ބަދަލު ގެނައުމަށް އެއް ހަފްތާ ނުވަތަ ދެ ހަފްތާ ވަރު ނަގާނެ،" ބޮލްސޮނާރޯ ވިދާޅުވި އެވެ.
ޕަޒުއެލޯ ވިދާޅުވި ގޮތުގައި އޭނާ މަގާމުން ވަކި ކުރަނީ ހެލްތު މިނިސްޓްރީއަށް ރައީސް ގެންނަވާ ބަދަލުތަކެއްގެ ދަށުންނެވެ. އަދި އާ ހެލްތު މިނިސްޓަރު އޭނާގެ އެޖެންޑާއާ އެއްގޮތަށް ކުރިއަށް ވަޑައިގެން، ކޮވިޑް-19އާ ދެކޮޅަށް ކުރާ މަސައްކަތް އިތުރަށް ހަރުދަނާ ކުރާނެ ކަމަށް ބޮލްސޮނާރޯ ވިދާޅުވި އެވެ.
ސިއްހީ ދާއިރާގައި އެއްވެސް ތަޖުރިބާއެއް ނެތް ބޭފުޅެއް ކަމަށްވާ ޕަޒުއެލޯ ހެލްތު މިނިސްޓަރު ކަމަށް އައްޔަން ކުރީ މިދިޔަ މެއި މަހު އެވެ. އަދި އޭގެ ކުރިން އެ މަގާމުގައި ތިއްބެވި ދެ ބޭފުޅުން އިސްތިއުފާ ދެއްވީ ރައީސް ބޮލްސޮނާރޯއާ ދެމެދު އުފެދުނު ދެބަސްވުންތަކާ ގުޅިގެންނެވެ. އޭގެ ތެރޭގައި މެލޭރިއާ ބޭސް، ހައިޑްރޮކްސިކްލޮރޮކުއިން ކޮވިޑް ޖެހޭ އެންމެންނަށް ފަރުވާ ދިނުމަށް ފުޅާ ދާއިރާއެއްގައި ބޭނުން ކުރުމަށް ރައީސް އެންގެވި ނަމަވެސް އެ ދެ ބޭފުޅުން އެކަމަށް ދެކޮޅު ހެއްދެވުން ހިމެނެ އެވެ.
އޭގެ ފަހުން ހެލްތު މިނިސްޓްރީއަށް ޕަޒުއެލޯ އައްޔަން ކުރުމުން އޭނާ ވަނީ ކޮވިޑް-19 ޖެހޭ ކޮންމެ މީހަކަށްވެސް ފަރުވާ ދިނުމަށް ހައިޑްރޮކްސިކްލޮރޮކުއިން ބޭނުން ކުރުމަށް ހުއްދަ ދެއްވާފަ އެވެ. އަދި ބޮލްސޮނާރޯއާ އެއްގޮތަށް އޭނާ ވެސް ވަނީ ކޮވިޑްގެ ނުރައްކާ ކުޑަ ކަމަށް ދޭހަވާ ގޮތަށް ވާހަކަ ދައްކަވާފަ އެވެ.
ބްރެޒިލްގެ ހެލްތު މިނިސްޓްރީއަށް ބަދަލު ގެންނަނީ އެގައުމުގައި ކޮވިޑް-19 ހަލުވި ކަމާ އެކު ފެތުރެމުންދާ ދަނޑިވަޅެއްގަ އެވެ. އަދި ބަލީގެ ސަބަބުން އެގައުމުގައި ރެކޯޑު އަދަދަކަށް މީހުން މަރުވަމުން ދަނިކޮށެވެ. އެގޮތުން މިދިޔަ ހަފްތާގައި އެގައުމުން ވަނީ 24 ގަޑި އިރު ތެރޭ 2،286 މީހަކު މަރުވި ކަމަށް ރިޕޯޓުކޮށްފަ އެވެ. އެއީ އެގައުމުން ކޮވިޑުގައި އެންމެ ގިނަ އަދަދަކަށް މީހުން މަރުވި ދުވަހެވެ.
ބްރެޒިލްއަކީ އެމެރިކާއަށް ފަހު ދުނިޔެއިން އެންމެ ގިނަ އަދަދަކަށް ކޮވިޑާ ގުޅުން ހުރި މަރުތައް ރިޕޯޓުކޮށްފައިވާ ގައުމެވެ. އެގައުމުން މިހާތަނަށް ބަލީގައި 279،000 އަށް ވުރެ ގިނަ މީހުން މަރުވެފައިވެ އެވެ.
މީގެ އިތުރުން ބްރެޒިލް އަކީ ދުނިޔެ އިން ކޮވިޑްގެ ކޭސްތައް ތިން ވަނައަށް އެންމެ ގިނަ ގައުމެވެ. އެގޮތުން އެގައުމުން މިހާތަނަށް 11.5 މިލިއަން މީހުންނަށް ބަލި ޖެހިފައިވެ އެވެ. އެ ލިސްޓުގައި ބްރެޒިލްއަށް ވުރެ ކުރީގައި އޮތީ އެމެރިކާ އާއި އިންޑިއާ އެވެ.