12 Mar 2021, 16:38
ލޯކަލް ކައުންސިލްތަކުގެ އިންތިހާބާއި ގުޅިގެން ކުރަންޖެހޭ މަސައްކަތްތައް ކުރުމަށް ހުރަސް އެޅޭ ކަމަށް ބުނެ އިދިކޮޅުން އިލެކްޝަންސް ކޮމިޝަނަށް ޝަކުވާ ހުށަހަޅައިފި އެވެ.
އިދިކޮޅުން ބުނީ އިންތހާބާ ގުޅިގެން ކުރަންޖެހޭ އިދާރީ މަސައްކަތްތަކާއި އެހެން މަސައްކަތްތަކަށް ސަރުކާރުން ހުރަސް އަޅަމުންދާ ކަމަށެވެ.
އެގޮތުން ކޮންމެ ހުކުރު ދުވަހެއްގެ މެންދުރުފަހު، 2:00 އިން ފެށިގެން ދަންވަންދެން ފުލުހުން މެދުވެރިކޮށް ޕާޓީ އޮފީހަށް އައިސް ގޮސްވާ މީހުންނަށް އޮފީހަށް ވަދެ ނުނިކުމެވޭނެހެން އޮފީސް ބަންދުކޮށް، އިދިކޮޅުގެ މައި އޮފީހަށް ދެވެން އޮންނަ މަގުތައް ބަންދުކުރާ ކަމަށް އިދިކޮޅުން ބުންޏެވެ.
ޕާޓީ އޮފީސް ބަންދުކޮށްގެން ސަރުކާރުން އިންތިހާބަށް ނުފޫޒު ފޯރުވާ ކަމަށާއި، އެކަން ހުއްޓުވައިދީ، ހުރިހާ ޕާޓީއެއްގެ ކެންޑިޑޭޓުންނަށްވެސް ހަމަހަމަ ކަމާއެކު މަސައްކަތް ކުރުމުގެ މާހައުލެއް ގާއިމް ކޮށްދިނުމަށް އިދިކޮޅުން ވަނީ އީސީ ގައި އެދިފަ އެވެ.
އިދިކޮޅުން ބުނީ މިއަދު ވެސް 14:30 އިން ފެށިގެން ޕީޕީއެމް އޮފީސް ބަންދުކޮށް އެއްވެސް ފަރާތަކަށް ޕާޓީ އޮފީހަށް ވަނުމުގެ ހުއްދަ ނުދީ ހިފަހައްޓަމުން ދާ ކަމަށެވެ.