03 Mar 2021, 22:30
ލޯކަލް ކައުންސިލް އިންތިހާބު އޮޅުވާލަން އިލެކްޝަންސް ކޮމިޝަނުން ކުރާ އެންމެ ކަމެއްވެސް ދެއްކެވުމަށް އެ ކޮމިޝަންގެ ރައީސް އަހްމަދު ޝަރީފް، ޕީޕީއެމް/ޕީއެންސީގެ ކެމްޕޭން މެނޭޖަރު އަދި ރައްޔިތުންގެ މަޖިލީހުގެ މަޑަވެލި ދާއިރާ ކުރީގެ މެމްބަރު މުއާޒު މުހައްމަދު ރަޝީދުއަށް ގޮވާލައްވައިފި އެވެ.
ޝަރީފް އެފަދައިން ވިދާޅުވެފައިވަނީ އިންތިހާބު ވަގަށް ނެގުމަށްޓަކައި ނުވަތަ އޮޅުވާލުމަށްޓަކައި މިހާރުން ފެށިގެން އީސީއިން މަސައްކަތް ކުރަމުންދާ މަންޒަރު ފެންނަމުންދާ ކަމަށް މުއާޒު ތުހުމަތު ކުރެއްވުމުންނެވެ.
މުއާޒުގެ ވާހަކަތަކަށް ރައްދު ދެއްވަން ކުރެއްވި ޓުވީޓެއްގައި ޝަރީފް ވަނީ އިލެކްޝަންސް ކޮމިޝަނާ ގުޅޭގޮތުން ބޭކާރު ވާހަކަ ނުދެއްކެވުމަށް މުއާޒަށް ގޮވާލައްވާފަ އެވެ.
"މުއާޒު، ޗެލެންޖްކޮށްފައި މި ދަންނަވަނީ، އެންމެ ކަމެއް ވިދާޅުވޭ އެލްސީއީ އިންތިހާބާ ގުޅިގެން ހުރި، އީސީއިން ފޮރުވައިގެން އޮޅުވާލަންވެގެން ކުރާ ކަމެއް. އީސީއޭ ކިޔާފައި ބޭކާރު ވާހަކަ ނުދައްކަވާ." މުއާޒު ޓެގު ކުރައްވާފައި ޝަރީފް ކުރެއްވި ޓުވީޓުގައި ވިދާޅުވެފައިވެ އެވެ.
މުއާޒު އިލެކްޝަންސް ކޮމިޝަނަށް ފާޑުވިދާޅުވެފައިވަނީ މިއަދު އިދިކޮޅު ޕީޕީއެމް/ޕީއެންސީގެ އިންތިހާބު ކޮމެޓީން ބޭއްވި ބައްދަލުވުމެއްގަ އެވެ.
އެ ބައްދަލުވުމުގައި އަދިވެސް އިދިކޮޅު ކެންޑީޑޭޓުންނަށް ހަމަހަމަކަމާއެކު ކެމްޕެއިން ކުރުމުގެ ފުރުސަތު ނެތްކަން އޭނާ ފާހަގަ ކުރެއްވި އެވެ.