01 Mar 2021, 13:01
ނ. މާފަރު އެއާޕޯޓު ބޮޑު ކުރުމަށް ޓެންޑާއަށް އިއްޔެ ހުޅުވާލާފައިވާ ކަމަށާއި އެ މަޝްރޫއު ވަރަށް އަވަހަށް ފެށޭނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
ރައީސް އެގޮތަށް ވިދާޅުވީ، ކުރިއަށް އޮތް ކައުންސިލް އިންތިހާބަށް އެމްޑީޕީގެ ރަށްވެހިފަތިސް ކެމްޕެއިންގެ ނ. އަތޮޅުގެ ކެންޑިޑޭޓުންނާ ބައްދަލުކުރުމަށް ރޭ އޮންލައިންކޮށް ބޭއްވި ބައްދަލުވުމުގަ އެވެ.
އެ ބައްދަލުވުމުގައި މާފަރުންގެ ކެންޑޭޓުންގެ ފަރާތުން ދެންނެވި ސުވާލަކަށް ޖަވާބު ދެއްވަމުން ރައީސް ސޯލިހް ވިދާޅުވީ، އެ އެއާޕޯޓު ބޮޑު ކުރުމަކީ މުހިންމު ކަމެއް ކަމަށާއި އިއްޔެވެސް ފޮރިން މިނިސްޓަރާއެކު އެކަމުގެ ބައްދަލުވުމެއް ބާއްވައި، މަޝްވަރާތައް ކުރިއަށް ދިޔަ ކަމަށެވެ.
މަފަރު އެއާޕޯޓަކީ ޔޫއޭއީގެ އަބޫދާބީ ފަންޑް ފޯ ޑިވެލޮޕްމަންޓް (އޭޑީއެފްޑީ) ފަންޑުގެ އެހީގައި މިދިޔަ ސަރުކާރުން ފެށި މަޝްރޫއުއެކެވެ. ރައީސް ވިދާޅުވީ، އެއާޕޯޓުު ބޮޑު ކުރުމަށް އެ ފަންޑުގެ އެޕްރޫވަލް މިހާރު ލިބިފައިވާ ކަމަށެވެ.
މިހާރު ވަނީ އަބޫދާބީ ފަންޑުން އެޕްރޫވަލް ލިބި، މިއަދު އަޅުގަނޑުމެން ޓެންޑާއަށް ހުޅުވާލައިފިން. ފަހެއް އެޕްރީލްގެ ނިޔަލަށް ޓެންޑާ ހުށަހެޅުމަށް މިއޮތީ، އެއަށްފަހު ރަންވޭ ބޮޑުކުރުމުގެ މަސައްކަތް ފެށޭނެ،" ރައީސް ވިދާޅުވި އެވެ.
އެމަނިކުފާނު ވިދާޅުވީ، އެތަނުން ތެޔޮ ލިބޭނެ ގޮތާއި ޓާމިނަލް ބޮޑު ކުރުމަށް އެތަން ހިނގާ އައިލެންޑް އޭވިއޭޝަނުން ރޭވުންތަކެއް ރާވާފައިވާ ކަމަށް ރައީސް ވިދާޅުވި އެވެ.
"މީގެ ތިން ދުވަސް ކުރިން އައިލެންޑް އޭވިއޭޝަންގެ އާ އެމްޑީއާއެކު ބައްދަލުވުމެއް ބޭއްވިން. އެހެންވީމަ، އަބޫދާބީ ފަންޑާއި އައިލެންޑް އޭވިއޭޝަންއާއެކު މާފަރު އެއާޕޯޓު ބޮޑު ކުރުމުގެ ބޮޑު މަޝްރޫއެއް އިރާދަކުރެއްވިއްޔާ ވަރަށް އަވަހަށް ފެށޭނެ،" ރައީސް ވިދާޅުވި އެވެ.
ކެމްޕެއިން ބައްދަލުވުމުގައި ރައީސް ވާހަކަ ދައްކަވަނީ --
ރައީސްގެ ޖަވާބުގައި އެއާޕޯޓަށް ޖެއްސި ފްލައިޓްތަކުގެ ތަފާސް ހިސާބުތައްވެސް ހާމަ ކުރެއްވި އެވެ. އެގޮތުން 2019 ވަނަ އަހަރު އެތެރޭގެ އުދުންހުންތަކުގެ 120 ފްލައިޓް، ރާއްޖެއިން ބޭރުން ހަ ފްލައިޓް މާފަރުގައި ޖައްސާފައިވާ ކަމަށް ރައީސް ވިދާޅުވި އެވެ. އަދި މިދިޔަ އަހަރު ޑޮމެސްޓިކް 624 ފްލައިޓާއި 229 އިންޓަނޭޝަނަލް ފްލައިޓް ޖައްސާފައިވާކަމަށްވެސް ރައީސް ވިދާޅުވި އެވެ.
"މިއަހަރުގެ މި ދެމަސް ދުވަހު އެބަ އޮތް 178 ޖެޓު. ޑޮމެސްޓިކަށްވުރެ ގިނަ ބޭރުގެ ފްލައިޓުތައް. އެހެންވީމަ އެއާޕޯތު ތަރައްގީކޮށް ބޮޑު ކުރުމަކީ ވަރަށް މުހިންމު ކަމެއް،" ރައީސް ވިދާޅުވި އެވެ.
މާފަރު އެއާޕޯޓުގެ އޮޕަރޭޝަންތައް ފަށާފައިވަނީ 2019 ވަނަ އަހަރުގެ ޑިސެމްބަރުގައެވެ. އެ އެއާޕޯޓު ތަރައްގީކޮށްފައިވަނީ، ވައިގެ ދަތުރުފަތުރުގައި އެންމެ އާއްމުކޮށް ބޭނުންކުރާ އެއާބަސް އޭ320 އާއި ބޮއިން 737ގެ ބޯޓުތައް ޖެއްސޭ ގޮތަށެވެ. ރަންވޭގެ މިހާރުގެ ދިގު މިނަކީ، 3،600 މީޓަރެވެ.