17 Feb 2021, 19:41
އައްޑޫ ސިޓީގައި ޖަމާއަތުގައި ނަމާދު ކުރުން ވަގުތީ ގޮތުން ހުއްޓާލަން މި މަހުގެ ނުވަ ވަނަ ދުވަހު ނިންމި ނިންމުން، އިތުރު ހަފްތާއަކަށް ދިގުދަންމާލައިފި އެވެ.
މި މަހުގެ ނުވަ ވަނަ ދުވަހު އިސްލާމިކް މިނިސްޓްރީއިން ނިންމާފައި ވަނީ، އައްޑޫގައި ކޮވިޑް-19ގެ ކޮމިއުނިޓީ ސްޕްރެޑެއް އޮތުމުން، އެ ސިޓީގައި ޖަމާއަތުގައި ނަމާދު ކުރުން މެދުކަނޑާލާށެވެ. އެ ފިޔަވަޅު އެޅީ މިއަދުގެ އަސުރު ނަމާދާ ހިސާބަަށެވެ.
ނަމަވެސް، އަދިވެސް އައްޑޫގެ ހާލަތު އޮތީ ގޯސްކޮށް ކަމުން، މިނިސްޓްރީއިން މިއަދު ވަނީ އެ ފިޔަވަޅު އިތުރު ހަފްތާއަކަށް ދަންމާލާފަ އެވެ.
އައްޑޫގައި މިވަގުތު ކޮވިޑް ޖެހިފައި ތިބި 63 މީހުން އެބަ ތިއްބެވެ. އެއީ ހިތަދޫގައި 20، ފޭދޫގައި 13، ހުޅުމީދޫގައި 26 އަދި މަރަދޫފޭދޫގައި ހަތަރު މީހުންނެވެ.
އިރު އައްޑޫގެ ހަތް ދުވަހުގެ މޮނިޓަރިންގެ މުއްދަތުވެސް އިއްޔެ ހަމަވުމުން މޮނިޓަރިންގެ ހާލަތުވެސް ވަނީ އިތުރު ހަފްތާއަކަށް ދިގު ދަންމާލާފަ އެވެ.
އެ ސިޓީގައި ރޭގަނޑު 8:00އިން ފެށިގެން ފަތިހު 4:30އަށް، އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުތުން މަނަލެވެ. އަދި އައްޑޫގެ އެއް އަވަށުން އަނެއް އަވަށަށް ދިޔުމާއި ޕާޓީތަކާއި ހަފްލާތަކާއި ރަސްމިއްޔާތުތައް ބޭއްވުންވެސް ވަނީ މަނާކޮށްފައެވެ.
އޭގެ އިތުރުން ހޮޓާތަކާއި ރެސްޓޯރެންޓްތައް ޑެލިވަރީގެ ހިދުމަތް ފިޔަވައި އެހެން ހިދުމަތްތަކަށް ބަންދުކުރުމަށްވެސް ވަނީ ނިންމައިފައެވެ.
އިތުރު ހަފްތާއަކަށް ދަންމާލާ އެހެން ފިޔަވަޅުތައް:
ޔުނިވާސިޓީ/ކޮލެޖް/ސްކޫލަތަކުގެ ދަރިވަރުން ހާޒިރުވެގެން ކްލާސްތައް ކުރިއަށް ގެންދިޔުން.
- އެއްފަހަރާ ތިން މީހުންނަށްވުރެ ގިނަ މީހުން އެއްވެ އުޅުން މަނާކުރުން.
- ސެލޫން، ޖިމް އަދި ބޯކޮށާ ތަންތަން ބަންދުކުރުން.
- ހުރިހާ ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހިންގުން ހުއްޓާލުން.
- ޓެކްސީ ހިދުމަތް ދޭ ފަރާތްތަކުން އެޗްޕީއޭގެ ގައިޑްލައިނާ އެއްގޮތަށް ހިދުމަތް ދިނުން.
- ފިހާރަތާކާއި ބޭންކުތަކުން އެޗްޕީއޭގެ ގައިޑްލައިނާ އެއްގޮތަށް ހިދުމަތް ދިނުން.