03 Feb 2021, 12:33
ލަންޑަން (ފެބްރުއަރީ 3): އިނގިރޭސިވިލާތުގެ އޮކްސްފޯޑް ޔުނިވާސިޓީ އާއި އެސްޓްރާޒެނެކާއިން އުފެއްދި ކޮވިޑް ވެކްސިންގެ އެއް ޑޯޒްއިން ވައިރަސް ފެތުރުން ވަރަށް ބޮޑަށް ކޮންޓްރޯލްކޮށް، ތިން މަހަށް 76 ޕަސެންޓު ރައްކާތެރިކަން ފޯރުކޮށްދޭ ކަމަށް އާ ދިރާސާއަކުން ދައްކައިފި އެވެ.
އިނގިރޭސިވިލާތް، ދެކުނު އެފްރިކާ އަދި ބްރެޒިލްއިން އޮކްސްފޯޑް ވެކްސިންގެ ޓެސްޓުތަކުގައި ބައިވެރިވި 17،000އަށް ވުރެ ގިނަ މީހުންގެ ނަތީޖާ އެނެލައިޒްކޮށްގެން ހަދާފައިވާ އާ ދިރާސާއިން ދެއްކި ގޮތުގައި އެ ވެކްސިންގެ އެއް ޑޯޒްއިން 76 ޕަސެންޓު މީހުން ބަލިން ރައްކާތެރިކޮށްދެ އެވެ. އަދި ފުރަތަމަ ޑޯޒް ދޭތާ ތިން ހަފްތާއިން ފެށިގެން ތިން މަހަށް އެ ރައްކާތެރިކަން ދެމިހުރެ އެވެ.
އެއަށް ފަހު ވެކްސިންގެ ދެވަނަ ޑޯޒް ދިނުމުން ބަލިން 82 ޕަސެންޓު ރައްކާތެރިކަން ފޯރުކޮށްދެ އެވެ.
މީގެ އިތުރުން އޮކްސްފޯޑް ވެކްސިންގެ ފުރަތަމަ ޑޯޒްއިން ކޮވިޑް ވައިރަސް ފެތުރުން 67 ޕަސެންޓު ދަށްކޮށްދޭ ކަމަށް އެ ދިރާސާއިން ވަނީ ދައްކާފަ އެވެ. އެހެންކަމުން އެ ވެކްސިން ޖަހާ މީހާގެ އިތުރުން އެހެން މީހުންވެސް އެ ވެކްސިންގެ ސަބަބުން ނުސީދާ ގޮތެއްގައި ރައްކާތެރިކޮށްދޭނެ ކަމަށް ސައިންސުވެރިން ބުންޏެވެ.
ދަ ލާންސެޓް މެޑިކަލް ޖާނަލްގައި ޝާއިއު ކުރުމަށް މިހާރު ފޮނުވާއިފައިވާ އެ ދިރާސާގައި ވަނީ މިވަގުތު ވެކްސިންގެ ޑޯޒްތައް ލިމިޓުކޮށްފައިވާ ދަނޑިވަޅެއްގައި އާބާދީގެ ބޮޑު ބަޔަކަށް ފުރަތަމަ އެއް ޑޯޒް ދޭން އިސްކަން ދިނުމަކީ ރަނގަޅު ސިޔާސަތެއް ކަމަށް ބުނެފަ އެވެ. ނަމަވެސް ދިގު މުއްދަތަކަށް ބަލިން ދިފާއުވުމުގެ ބާރު ދެމެހެއްޓުމަށްޓަކައި ދެވަނަ ޑޯޒްވެސް ދިނުން މުހިއްމުކަން ފާހަގަކޮށްފަ އެވެ.
އިނގިރޭސިވިލާތުން ވަނީ އެ ދިރާސާއިން ލިބުނު ނަތީޖާއިން އެގައުމުން ވެކްސިން ޕްރޮގްރާމް ކުރިއަށްގެންދަން މިދިޔަ ޑިސެމްބަރު މަހު ކަނޑައެޅި އުސޫލުތައް ރަނގަޅުކަން ހާމަވާ ކަމަށް ބުނެފަ އެވެ.
އިނގިރޭސިިވިލާތުގައި މީގެ ކުރިން ކޮވިޑް ވެކްސިންގެ ދެވަނަ ޑޯޒް ދޭން ހަމަޖެހިފައި އޮތީ ތިން ނުވަތަ ހަތަރު ހަފްތާ ފަހުން ކަމަށްވީ ނަމަވެސް މިދިޔަ ޑިސެމްބަރު މަހު އެގައުމުގެ ޖޮއިންޓް ކޮމިޓީ އޮން ވެކްސިނޭޝަން އެންޑް އިމިއުނައިޒޭޝަން (ޖޭސީވީއައި)އިން ނިންމީ ދެވަނަ ޑޯޒް ދިނުން ފަސްކޮށް، ބަލީގެ ނުރައްކާ އޮތް ވީހާވެސް ގިނަ މީހުންނަށް ފުރަތަމަ ޑޯޒް ދިނުމަށް އިސްކަން ދިނުމަށެވެ.
އިނގިރޭސިިވިލާތުން ވަނީ މިހާތަނަށް 9.6 މިލިއަނަށް ވުރެ ގިނަ މީހުންނަށް ކޮވިޑް-19 ވެކްސިން ދީފަ އެވެ. އެގައުމުން ދަނީ އޮކްސްފޯޑް ވެކްސިންގެ އިތުރުން ފައިޒާ ކޮވިޑް ވެކްސިންވެސް ދެމުންނެވެ.