02 Feb 2021, 17:54
ރާއްޖޭގައި ކޮވިޑް19 ފެތުރޭ ހާލަތަށް ބަލާއިރު، ރާއްޖެ މިވަގުތު އޮތީ ހައި ރިސްކު ލެވެލްގައި ކަމަށާއި، މިވަގުތު ރާއްޖެއަކީ ރައްކާތެރި ތަނެއްގެ ގޮތުގައި ނުބެލެވޭނެކަމަށް ޕަބްލިކް ހެލްތު ސްޕެޝަލިސްޓު ޑރ. ޝީނާ މޫސާ ވިދާޅުވެއްޖެއެވެ.
ރާއްޖޭގައި ކޮވިޑް19 ފެތުރުން އިތުރުވެ، ރައްކާތެރިކަމަށް އަޅާފައިވާ ފިޔަވަޅުތައް ވަރުގަދަކޮށް، އެކަމާ ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ޑރ. ޝީނާ ވިދާޅުވީ މިހާރު ހުރި ފިޔަވަޅުތައް ރަނގަޅަށް ތަންޒީޒު ނުކުރެވޭނަމަ ކޮންޓްރޯލު ކުރަން އުނދަގޫ ވާނެ ކަމަށެވެ.
ޑރ. ޝީނާ މިއަދު ހިއްސާކުރެއްވި މައުލޫމާތަށް ބަލާއިރު، މީގެ ކުރިން ބަލި މީހެއްގެ ފަރާތުން ބަލި ފެތުރޭ ކަމަށް ބެލެވެނީ (އާރް ވެލިއު އަކީ) ދެ މީހުންނަށް ކަމަށައި ނަމަވެސް މިހާރު އެކެއްގެ ފަރާތުން ފަސް މީހުންނަށް ބަލި ޖެހޭކަމަށް ފެންނަ ކަމަށެވެ.
"މިހާރު ބައެއް ގައުމުތަކުން ސޭފް ކަންޓްރީއެއްތޯ، ރިކްސް ހައި ކަންޓްރީއެއްތޯ ބަލަންޏާ ރާއްޖެ މިއޮތީ ހައި ރިސްކު ލެވެލްގައި. ނޯ ލޯންގާ ސޭފް،" ޑރ. ޝީނާ ވިދާޅުވިއެވެ.
ޑރ. ޝީނާ ވިދާޅުވީ ބަލި ކޮންޓެއިން ކުރެވޭނީ، ގިނަ މީހުން ފިޔަވަޅުތަކަށް ތަބާވެގެން ކަމަށެވެ.
"ކޮމްޕްލައި ނުކޮށްފިނަމަ އެ ބޭނުންވާ ރިޑަކްޝަން ނުގެނެވޭނެ. ދެވަނަ ވޭވްގައި 62 ޕަސެންޓް ރިޑަކްޝަން ގެނެވުނު. އެކަމަކު އެޔެއް ނުގެނެވޭނެ އަޅުގަނޑުމެން ހަމައެކަނި 50 ޕަސެންޓް އޯ ލެސް ދެން 50ޕަސެންޓް ކޮމްޕްލަޔަންސްގައި އުޅެގެންނެއް،" ޑރ. ޝީނާ ވިދާޅުވިއެވެ.
ޑރ. ޝީނާ ވިދާޅުވީ އާންމުންނާއި މުވައްސަސާތަކުން ވެސް ފިޔަވަޅުތަކަށް ތަބައަވާން ޖެހޭކަމަށެވެ.
"ހާއްސަކޮށް ދަތުރުކުރާ މީހުން. މިހާރުގެ މި ފަހުގެ ޓްރޭސިން އަށް ބަލާއިރު ވޯކްޕްލޭސް އަކީ މިހާރު އެންމެ ބޮޑަށް އެކްސްޕޯސްވާތަން،" ޑރ ޝީނާ ވިދާލުވީ ކުޅިވަރު ޓީމުތަކުންވެސް ފަހަރަކު މެންބަރަކު ޕޮޒިޓިވް ވަމުންދާ ކަމަށެވެ.
މިގެ އިތުރުން އިޖުތިމާއީ އިވެންތުތައް ހިނގާ ކަމަށާއި، ބާރަށް ބަލި ފެތުރޭއިރު މިކަހަލަ އިވެންޓުތަކާހުރެ ެވެސް ބަލި ފެތުރޭ މިންވަރު އިތުރު ވާނެ ކަން ފާހަގަކުރެއްވިއެވެ.
މިއަދު ޑރ. ޝީނާ ވިދާޅުވީ މިހާރު ރާއްޖެއިން ފެންނަ ކޮވިޑު ކޭސްތަކުގެ ތިންބައިކުޅަ އެއްބަޔަކީ އާ ވޭރިއަންޓުން ފެންނަ ކޭސްތައް ކަމަށެވެ.
ކޮވިޑު ފެތުރުން ކޮންޓްރޯލު ކުރުމަށް ފެބްރުއަރީ ތިނަކުން ފެށިގެން މާލެ ސަރަހައްދުގައި ރޭގަނޑު 8:30 އިން ފަތިހު 4:30 އަށް އެއްގަމު އުޅަނދު ދުއްވުން މަނާވާނެއެވެ. އަދި ރޭގަނޑު 11 އިން ފަތިހު 4:30 އަށް ބޭރުގައި އުޅުން މަނާވާނެއެވެ.