01 Feb 2021, 15:07
ރާއްޖެއަށް ދިރޭ ޖަނަވާރާއި ދިރޭ ގަސް އެތެރެކުރުމުގެ 24 ގަޑިއިރު ކުރިން، އެތެރެކުރާ ތަކެއްޗާއި ގުޅޭ އެންމެހާ ލިޔެކިޔުންތައް ފިޝަރީޒް މިނިސްޓްރީގެ ޕްލާންޓް އެންޑް އެނިމަލް ކަރަންޓީން ޔުނިޓަށް ހުށަހަޅަން އަންގައިފި އެވެ.
ރާއްޖެއަށް އެތެރެކުރާ ދިރޭ ޖަނަވާރު އަދި ދިރޭގަހާއި ގަހުގެ ބައިތައް އެތެރެކުރުމުގައި، އެތަކެތީގައި ހުންނަން ޖެހޭ މިންގަނޑު ކަނޑައެޅުމާއި ބަލާފާސްކުރުމުގެ އެންމެހައި އިންތިޒާމް ހަމަޖެއްސުމުގެ ގާނޫނީ ޒިންމާ މަތިކޮށްފައިވަނީ ފިޝަރީޒް މިނިސްޓްރީ އާއެވެ.
މިނިސްޓްރީން މިއަދު ނެރުނު ބަޔާނެއްގައި ބުނީ ފަހަކަށް އައިސް ރާއްޖެއަށް ދިރޭ ޖަނަވާރު އަދި ދިރޭގަހާއި ގަހުގެ ބައިތައް އެތެރެކުރާ މިންވަރު އިންތިހާއަށް އިތުރުވެފައިވާ ކަމަށެވެ.
އަދި އެކަމުގެ ސަބަބުން އެތަކެތި ބަލައި ފާސްކުރުމުގައި އަދި ލިޔެކިޔުން ހޯދުމުގައި، މިނިސްޓްރީއަށާއި ތަކެތި އެތެރެކުރާ ފަރާތްތަކަށް ދަތިތަކާއި ކުރިމަތިވާކަން ފާހަގަކުރެވިފައިވާ ކަމަށެވެ.
އެހެންކަމުން، ދިރޭ ޖަނަވާރާއި ދިރޭ ގަސް އެތެރެ ކުރާ ފަރާތްތަކުން، އެފަދަ ތަކެތި ރާއްޖެއަށް އެތެރެވުމުގެ 24 ގަޑިއިރު ކުރިން، މިނިސްޓްރީގެ ޕްލާންޓް އެންޑް އެނިމަލް ކަރަންޓީން ޔުނިޓަށް، އެތެރެކުރެވޭ ތަކެއްޗާއި ގުޅޭ އެންމެހައި ލިޔެކިޔުންތައް ފޮނުވަންވާނެ ކަމަށް ބަޔާނުގައި ބުނެފައިވެ އެވެ.
ލިޔެކިޔުންތައް ފޮނުވާނީ، މިނިސްޓްރީގެ "އެގްރިކަލްޗާ އޮންލައިން ޕޯޓަލް" (www.aos.egov.mv) ގެ ޝިޕްމަންޓް ނޯޓިފިކޭޝަން މެދުވެރިކޮށް ނުވަތަ އީމެއިލް މެދުވެރިކޮށެވެ. އީމެއިލް ފޮނުވާނީ[email protected]އަށެވެ. އީމެއިލް އާއި އެއް އުރަކޮށް ފޮނުވަންޖެހޭ ލިޔުންތަކަކީ:
ސްޓޭޓް ފައިޓޯސެނިޓަރީ/ވެޓްރިނަރީ ސެޓްފިކެޓް (އޮރިޖިނަލް)ގެ ސްކޭން ކޮޕީ އަދި ސެޓްފިކެޓްގެ އެޓޭޗްމަންޓްތައް
- ފައިޓޯސެނިޓަރީ/ވެޓްރިނަރީ އިމްޕޯޓް ޕާމިޓް އަދި ޕާމިޓްގައި ބްރީޑިންގް ލެޓާ އަދި ސައިޓީސް ސެޓްފިކެޓް ހުށަހަޅަން ބަޔާންކޮށްފައިވާ ބާވަތްތަކަށް، ބްރީޑިންގ ލެޓާ އަދި ސައިޓީސް ސެޓްފިކެޓް
- ޝިޕްމަންޓްގެ ޕެކިން ލިސްޓް
- ޝިޕްމަންޓްގެ އިންވޮއިސް
އެގޮތައް ހަމަޖައްސާފައި ވަނީ ރާއްޖެއަށް ދޫނި އެތެރެކުރުމާބެހޭ ގަވާއިދާއި ގަސްގަހާގެހި ހިމާޔަތްކުރުމުގެ ގާނޫނުގެ ދަށުންނެވެ. މިނިސްޓްރީން ބުނީ މި އިންތިޒާމަށް އަމަލުކުރަން ފަށާނީ މިއަދުން ފެށިގެން 15 ދުވަސް ހަމަވާ ދުވަހުން ފެށިގެން ކަމަށެވެ.
ޕްލާންޓް އެންޑް އެނިމަލް ކަރަންޓީން ޔުނިޓަށް ޝިޕްމަންޓް ނޮޓިފިކޭޝަން ނުފޮނުވާ ފަރާތްތަކުގެ ޝިޕްމަންޓް ބަލާ ފާސްކުރުމުގައި، ދިމާވާ ދަތިތަކަށް މިނިސްޓްރީގެ ފަރާތުން ޒިންމާނުވާނެ ކަމަށް ވަނީ ބުނެފަ އެވެ.
އަދި ރާއްޖެއަށް ދިރޭ ޖަނަވާރު އަދި ދިރޭގަހާއި ގަހުގެ ބައިތައް އެތެރެކުރުމަށް ހެދިފައިވާ ގާނޫނުތަކާއި ގަވައިދުތަކާއި ހިލާފަށް އަމަލުކުރާ ފަރާތްތަކާއިމެދު ގާނޫނީ ފިޔަވަޅު އަޅާނެ ކަމަށް ވެސް ބުނެފައިވެ އެވެ.