28 Jan 2021, 17:03
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އަޅާފައިވާ ފިޔަވަޅުތަކާއެކު ރައްޔިތުންގެ މަޖިލިސް ހުޅުވާ ޖަލްސާގެ ހާޒިރީން މަދު ކުރުމަށް އެ އިދާރާއިން ނިންމައިފި އެވެ.
މިއަހަރަށް މަޖިލިސް ހުޅުވާ ޖަލްސާ އޮތީ، އަންނަ ހަފްތާ ބުރާސްފަތި ދުވަހު އެވެ.
މަޖިލިސް އިދާރާއިން މިއަދު ބުނީ، ކޮވިޑް19 އިގެ ކޭސްތައް އިތުރުވުމުގެ ސަބަބުން އެޗްޕީއޭއިން މިހާރު އަޅާފައިވާ ފިޔަވަޅުތަކާ ގުޅިގެން، މަޖިލިސް ހުޅުވާ ޖަލްސާއަށް ދައުވަތު ދޭ މީހުން މަދު ކުރުމަށް ނިންމާފައިވާ ކަމަށެވެ.
"މި ޖަލްސާއަށް މިހާރު ދައުވަތު އެރުވިފައިވަނީ ވަޒީރުންގެ މަޖިިލިސް މެމްބަރުންނާއި ރާއްޖޭގައި ތިއްބަވާ ބޭރުގެ ދައުލަތްތަކުގެ ސަފީރު/ ހައިކޮމިޝަނަރުންނެވެ،" މަޖިލީހުން ނެރުނު ބަޔާނުގައި ބުންޏެވެ.
އެހެން ކަމުން އެބޭފުޅުން ފިޔަވައި އެހެން ބޭފުޅުނަށް ފޮނުވާފައިވާ ދައުވަތު މިހާރު ކެންސަލްކުރެވިފައިވާ ކަމަށް އެ ބަޔާނުގައި ބުންޏެވެ.
މަޖިލީހުގެ ފުރަތަމަ ދައުރު ހުޅުވުމަށް ބާއްވާ ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވަވާނެ އެވެ. އެ ރިޔާސީ ބަޔާނުގައި ގައުމުގެ ހާލަތު ބަޔާންކޮށްދީ، ގައުމުގެ ހާލަތު އިތުރަށް ރަނގަޅުކުރުމަށްޓަކައި ކުރަން ޖެހޭ ކަންކަމުގެ މައްޗަށް ރައީސް ވާހަކަ ދައްކަވާނެ އެވެ.