08 Jan 2021, 14:48
އެހެން އަހަރުތައް ނަމަ އަހަރެމެން މިއަދު އެންމެ ފޯރީގައި ތިބޭނީ އާ ޔުނިފޯމްތައް ފަހައި، ސްކޫލް ދަބަސްތައް ގަނެ ފޮތްތަކުގައި ސެލޯފިން ލުމުގަ އެވެ. އެހެންނަމަވެސް ހުރިހާ ކަމެއްވެސް މިއަދު މިއޮތީ ބަދަލުވެފަ އެވެ. ކޮވިޑް19 އާޢިއެކު އެންމެ ބޮޑު ބަދަލެއް ގެނުވި އެއް ދާއިރާއަކީ ތައުލީމީ ދާއިރާ އެވެ.
ދިވެހި ސްކޫލްތަކުގެ ބޮޑު ޗުއްޓީ ނިމި އާ އަހަރާއި އެކު ދިރާސީ އާ އަހަރެއްވެސް އަހަރެމެންނާ ބައްދަލުކުރެ އެވެ. އެކަމަކު މި ހަފްތާގައި ސްކޫލްތައް ހުޅުވޭއިރު ކުދިން ދަނީ އާ ގްރޭޑަކަށް އާ ފޮތްތަކަކާއި އެކީއެއް ނޫނެވެ. ގިނަ މަސްތަކެއް ކިޔެވުން ހުއްޓިފައި އޮތުމުން މިއަހަރާއި އެކީ ކުދިން ސްކޫލަށް ދަނީ ދެވަނަ ޓާމަކަށެވެ.
އެކަމަކު މިއީ ވަކި ފަރުވާކުޑަކޮށް ސްކޫލްތައް ފެށެންވާއިރަށް ތައްޔާރު ނުވާންވީ ސަބަބެއް ނޫނެވެ. ޗުއްޓީއަކަށްފަހު އަނެއްކާވެސް ކިޔެވުމާއި ގާތަށް ކުދިން ގެންދަން ބުރަ މަސައްކަތްތަކެއް ކުރަން ޖެހެއެވެ. މިކަމުގައި އޮކްސްފޯޑް ރޯޔަލް އެކަޑަމީ ގެ ލިސްޓަށް ކުރުގޮތަކަށް ބަލާލާނަމެވެ.
މިިދިޔަ އަހަރު ކިޔެވި އެއްވެސް އެއްޗެއް ހަނދާން އެބަހުރިބާ؟
މިގޮތުން އެންމެ މުހިންމު އެއްކަމަކީ މިދިޔަ އަހަރު ނުވަތަ މި ނިމުނު ޓާމުގައި ކިޔެވި ފިލާވަޅުތައް ބަލައިލާ މުތާލިއާ ކުރުމެވެ. ހާޢްސަކޮށް މިއީ ދެވަނަ ޓާމު ކަމުން ކުރިން ކިޔެވި ފިލާވަޅުތައް މިފަދައިން ބަލައިލުމުން ވަރަށް ފަސޭހައިން ކުރިއަށް ކިޔަވަން ހުރި މައުޟޫތައް ނަގައިގަނެވި ސްކޫލްގެ ފުރަތަމަ ދުވަހުވެސް ކިޔެވުމުގެ ތެރެއަށް ވަދެގަންނަން ބޮޑު ހިތްވަރެއް ލިބިގެންދާނެ އެވެ. އަދި ހަމައެކަނި ކުރީގެ ފިލާވަޅުތައް ބަލައިލާފައި ނިންމާލުމުގެ ބަދަލުގައި ކުރިއަށް މިއޮތް ދުވަސްތަކުގައި ކިޔަވަންހުރި ބައެއް މައުޟޫތައްވެސް ބަލައިލާށެވެ. އާ އަމާޒުތަކަކާއި ހިސާބަށް ވާސިލްވުމަށް ފަސޭހަ ވެގެން ދާނެ އެވެ.
ފޮތް ފަންސޫރު ރަބަރު ގަލަން ހަމަތޯ ބަލާލިންތަ؟
ދިރިއުޅުމުގެ ކޮންމެ ބޮޑު ކަމެއް ފަށައިގަންނައިރުވެސް ކުޑަ ހިތްވަރެއް އަހަރެމެން ކޮންމެ މީހެއްވެސް ބޭނުންވެއެވެ. އެހެންކަމުން އަނެއްކާވެސް އާ ޓާމަކަށް މަރުހަބާ ކިޔާއިރު މިކަން ވަކި ތަފާތު ވާނެހެއްޔެވެ؟ ސްކޫލަށް ފޮތް ދަބަސް ހަމަކުރުމުގެ ކުރިން އެންމެ ފުރަތަމަ އަތުގައި ބޭނުންވާ ސްޓޭޝަނަރީޒް ހަމަތޯ ބަލައިލާށެވެ. ބެކާރުގޮތުގައި އެއްޗެހި ގަތުމުގެ ބަދަލުގައި ހުރި އެއްޗިއްސާއި ނެތް އެއްޗެހި ބަލައި، ބޭނުންވާ އެއްޗެހި އަވަހަށް ހަމަކޮށްލާށެވެ. މި ލިސްޓުގައި ނޯޓްފޮތެއް ވެސް ހިމަނާލަންވާނެ އެވެ. މިފަދައިން ސްޓޭޝަނަރީޒް ހަމަ ކުރުމަކީ އާ ޓާމަށް ތައްޔާރުވެ ސްކޫލް ފެށޭ ދުވަސް އިތުރަށް ޝައުގިވެރި ކުރުވާނެ ކަމެކެވެ.
ސްކޫލުން ދިން ޕްރޮޖެކްޓްތަކާއި އިތުރު މަސައްކަތް ހުރީ ނިމިފަައިތަ؟
މިދިޔަ އަހަރުގެ ބޮޑު ބައި އޮންލައިންކޮށް ކިޔެވިއިރު ގިނަ ސްކޫލްތަކުން ހާއްސަކޮށް ކުޑަކުދިންނަށް ވާނީ މަސައްކަތްތަކެއް ގޭގައި ހަވާލުކުރަން ދީފައެވެ. އެ މަސައްކަތްތައް ސްކޫލް ފެށުމުން ހަވާލުކުރުމަށް މުދައްރިސުން އިރުޝާދު ދެއްވާފައިވާއިރު، ސްކޫލް ހުޅުވެން އެންމެ ދުވަހަކަށް މިހާރު ވަނީ ވެފައެވެ. އަވަހަށް އެ ފިލާވަޅުތައް ވީ ހިސާބެއް ބަލައިލާށެވެ. އަމިއްލަ އަށް އެސެސްކުރުމަށް ހަވާލުކުރި މަސައްކަތްތައް ހުރީ ނިމިފައިތޯ ޗެކް ކުރާށެވެ. މިހާރުވެސް ވަގުތު ކުޑަތަންވެއްޖެ އެވެ. އެހެންނަމަވެސް މިވީ ދުވަސްތެރޭ ވީނުވީއެއް ނޭގި ގެއްލިފައިހުރި ވޯކްޝީޓްތަކާއި، ހަނދާންނެތިފައި ހުރި މަސައްކަތްތަކުގެ މަތިން ހަނދާންކޮށް އަވަހަށް އެ މަސައްކަތްތައް ނިންމާ ފޮތްދަބަސް ކައިރީ ރައްކާކުރާށެވެ.
ގޭގައި ކިޔަވަން އިށީންނަ މޭޒުގެ ހާލުވެސް ބަލާލަންވާނެ!
ކިޔެވުމަކީ އާދައިގެ ކަމެއް ނޫނެވެ. ހާއްސަކޮށް ގިނަ ވަގުތުތަކެއް ގޭގައި ތިބުން އެދެވިގެންވާ މި ހާލަތުގައި ކިޔެވުމަށް ހުސްކުރި ވަގުތުތަކަށްވުރެ ފޫހިފިލުވުމަށް ހޭދަކުރި ވަގުތު މާ ގިނަވާނެ ކަން ޔަގީނެވެ. ކިޔަވަން އިށީންނަ މޭޒުގެ ހާލެއް ބަލައިލަން ޖެހެނީ އެހެންވެ އެވެ. ސްކޫލްގައި ދެންވެސް ހޭދަކުރަން ފަށަނީ މަދު ވަގުތުކޮޅެެކެވެ. ބާކީ ހުރި ވަގުތުތަކަކީ ތިމާ އަމިއްލަ އަށް ގޭގައި ފިލާވަޅުތައް ނިންމާ ކިޔެވުމުގައި ހޭދަކުރަންޖެހޭ ވަގުތެވެ. އެހެންކަމުން މިހާރު މޭޒާއި ކަބަޑުތަކުގައި ގިނަވެފައި ހުރި ކުނިބުނި ސާފުކޮށް ދެވަނަ ޓާމުގައި ކިޔެވުމަށް ބޭނުންވާނެ ފޮތްތަކާއި، ސްކޫލް ޓެބްލެޓާއި އެނޫންވެސް ތަކެތި ހަމަކޮށް، މޭޒު ހުންނަ ތަނަކީ ކިޔަވަން ފަސޭހަ ، ހިތްގައިމު އަލިގަދަ ތަނަަކަށް ހަދާށެވެ. މިއީވެސް ކިޔެވުމަށް އެޅޭ އިތުރު ބާރެކެވެ.
އާ އަހަރެއް، ދެވަނަ ޓާމެއް، ގިނަ އުންމީދުތަކެއް !
މިއީ އާ ޓާމަކަށް ނުވިއަސް، އާ ސްކޫލަކަށް ދާ ދަރިވަރުންނާއި، އަލަށް ކިޔަވަން ފަށާ ދަރިވަރުންތަކެއްވެސް އާދިއްތަ ދުވަހު ނޫނީ ހޯމަ ދުވަހު ސްކޫލަށްދާން ފަށާނެ އެވެ. ކޮންމެއަކަސް މި ކުދިންނާއި އަދި އެނޫންވެސް ދަރިވަރިން ހަނދާންކުރަންވީ އެއް ކަމަކީ ކޮންމެ ކަމެއްގައިވެސް ކާމިޔާބު ލިބޭނީ ދުރާލާ އަމާޒުތަކެއް ކަނޑައަޅާއި އެހިސާބަށް ވާސިލްވާން ބުރަކޮށް މަސައްކަތްކުރާ މީހުންނަށް ކަމެވެ. އެހެންކަމުން މިވަގުތުގެ ބޭނުން ހިފަންވީ މި ޓާމުގައި ތިމާ ކޮންމެ މާއްދާއަކުން ވިޔަސް، ނުވަތަ އޯވަރޯލްކޮށް ވިޔަސް ހާސިލްކުރަން ބޭނުންވާ ލަނޑުދަނޑިތައް ކަނޑައެޅުމަށެވެ. މިދިޔަ ޓާމުގައި ވަކިވަކި މާޢްދާތަކުން ހެދުނު މިސްޓޭކްސްއާއި ފަރުވާ ކުޑަވި ކަންކަމަށް ބަލައި ރަނގަޅު ކުރަން ބޭނުންވާ ކަންކަން އަވަހަށް ނޯޓްކޮށްލާށެވެ. ކިޔަވާ މޭޒުގައި ނުވަތަ ކޮންމެ ދުވަހަކުވެސް ތިމާއަށް ފެންނާނެ ހިސާބެއްގައި މި ލަނޑުދަނޑިތައް ބެހެއްޓުމުން އެކަންކަން ހާސިލްކުރަން ފަސޭހަވާނެ އެވެ.
މާބޮޑަށް ހާސްނުވާށެވެ. މިހުރިހާ ކަމަކާއި އެކީވެސް ސަމާލުކަންދޭންވީ ސްކޫލަށް ދިއުމުގެ ކުރިން ހަމަޖެހިލުމަށެވެ. ލިބުނު ޗުއްޓީގެ ބޭނުން ހެޔޮގޮތުގައި ހިފައި، ތާޒާ ސިކުނޑިއަކާއި އެކީ ފޮތްދަބަސް ހިފައިގެން މި ހަފްތާގައި ސްކޫލަށް ދިއުމަށެވެ.