04 Jan 2021, 12:29
އަދާލަތު ޕާޓީގެ ރައީސަކަށް އަންހެން ބޭފުޅަކަށް ވާދަ ނުކުރެވޭނަމަ، ޕާޓީގެ އަސާސީ ގަވައިދު އިސްލާހުކުރަން އެ ޕާޓީއަށް އަންގާނެ ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފު ވިދާޅުވެއްޖެ އެވެ.
ދެހާސްދިހަ ވަނަ އަހަރު އިލެކްޝަންސްގައި ރަޖިސްޓްރީކޮށްފައިވާ އަދާލަތު ޕާޓީގެ އަސާސީ ގަވައިދު ބުނާ ގޮތުން ޕާޓީގެ ރައީސްކަމާއި ނައިބު ރައީސްކަމަށް ކުރިމަތިލެވޭނީ ފިރިހެނުންނަށް އެކަންޏެެވެ. އެހެން ނަމަވެސް މި ފަހުން ނައިބު ރައީސް ކަމަށް އަންހެނުންނަށް ކުރިމަތިލެވޭ ގޮތަށް ޕާޓީގެ އަސާސީ ގަވައިދު ވަނީ އިސްލާހުކޮށްފަ އެވެ.
އަހްމަދު ޝަރީފު "ސަން"އަށް ވިދާޅުވީ، އެ ދެމާގަމަށްވެސް އަންހެންނުނަށް ވާދަ ނުކުރެވޭ ގޮތަށް ޕާޓީއެއްގެ އަސާސީ ގަވައިދު އޮތުމަކީ ބެސްޓް ޕްރެކްޓިސްއެއް ނޫން ކަމަށެވެ. އަދި އެއީ ކޮމިޝަނުން ބަލައިގަންނާނެ ކަމެއްވެސް ނޫން ކަމަށް އޭނާ ވިދާޅުވި އެވެ.
"ބެސްޓް ޕްރެކްޓިސްއާ ހިލާފަށް އިސްލާހެއް ގެނެސްފައިވާނަމަ އަދާލަތު ޕާޓީއާ އެކު މަޝްވަރާ ކުރާނަން،" ޝަރީފް ވިދާޅުވި އެވެ.
އޭނާ ވިދާޅުވީ، ޕާޓީގެ އަސާސީ ގަވައިދަށް މިފަހުން ގެނެސްފައިވާ އިސްލާހުތައް އަދި ކޮމިޝަނަށް ނުފޮނުވާ ކަމަށެވެ. އެ އިސްލާހުތައް ފޮނުވުމުން، އެކަމުގައި ބަލައިގަނެވޭ ކަމެއް އޮތް ނަމަ، އެކަން އިސްލާހުކުރަން އަންގާނެ އޭނާ ވިދާޅުވި އެވެ.
"އަލުން މުރާޖާ ކުރަން އަންގާނަން،" ރައީސް އާއި ނައިބު ރައީސަށް އަންހެނުންނަށް ކުރިމަތި ނުލެވޭގޮތަށް އާސާސީ ގަވައިދުގައިވާނަމަ، އެކަން މުރާޖާކުރަން އަންގާނަންތޯ ސުވާލު ކުރުމުން ޝަރީފު ވިދާޅުވި އެވެ.
އަދާލަތު ޕާޓީގެ ރައީސްއާއި ނައިބު ރައީސްކަމަށް ކުރިމަތިލުން މިހާރު ވަނީ އެ ޕާޓީން ހުޅުވާލާފަ އެވެ. މި މަހު ނުވަނަ ދުވަހަށް އެ މަގާމުތަކަށް ކުރިމަތިލުމުގެ މުއްދަތު ހަމަވާއިރު، އިންތިހާބު އޮތީ މިމަހު 23 ގައެވެ.