31 Dec 2020, 12:53
އެލްޖީ ޑިސްޕްލޭއިން ދަނީ ކޮޓަރިތަކުގައި ބޭނުންކުރުމަށް ހާއްސަ އެތެރެ ފެންނަ ނުވަތަ "އިންވިޒިބަލް" ޓީވީތަކެއް އުފައްދައި މާކެޓަށް ނެރުމަށްޓަކައި މަސައްކަތް ކުރަމުން ކަމަށް ބުނެފިއެވެ.
ޓްރާންސްޕޭރެންޓް ނުވަތަ އެތެރެ ފެންނަ ފަދަ މެޓީރިއަލްއަކަށް ޑިސްޕްލޭ ހެދުމަކީ އާ ޓެކްނޮލޮޖީއެއް ނޫނެވެ. އެހެންނަމަވެސް އެފަދަ ޓެކްނޮލޮޖީ މީގެކުރީން ފެނިގެން ގޮސްފައިވަނީ ހަމައެކަނި ކޮންސެޕްޓްތަކުން އެކަނި ނުވަތަ ޕްރޮޓޯޓައިޕެއްގެ ގޮތުގައެވެ.
އެހެންނަމަވެސް އެލްޖީއިން މަސައްކަތް ކުރަމުން ގެންދަނީ އާންމުންނަށް އެފަދަ ޓެކްނޮލޮޖީއެއް ފޯރުކޮށްދިނުމުގެ މަސައްކަތް ކަމަށް އެކުންފުނިން ބުނެއެވެ. އެކަން ސާބިތު ކޮށްދިނުމަށް އަންނަ އަހަރު މަސައްކަތް ކުރާނެ ކަމަށް އެކުންފުނިން ވަނީ ބުނެފައެވެ.
އިލެކްޓްރޯނިކްސް އެންމެ ފަހުގެ ޓެކްނޮލޮޖީތައް އެއް ތަނަކުން ދައްކާލުމަށް ކޮންމެ އަހަރަކު ބާއްވާ އެންމެ ބޮޑު އިވެންޓް ކަމަށްވާ ސީއީއެސްގައި އަންނަ އަހަރު އެލްޖީ އިން އާ ޓެކްނޮލޮޖީގެ ޓީވީ ދައްކާލާނެ ކަމަށް ވަނީ އިޝާރާތްކޮށްފައެވެ. އަންނަ އަހަރުގެ ސީއީއެސް ބޭއްވުމަށް ހަމަޖެހިފައިވަނީ އަންނަ މަހުގެ 11 އިން 14 އަށެވެ.
އެލްޖީ އިން ބުނާގޮތުގައި އާ ޓީވީ އަކީ 55 އިންޗީގެ ޓީވީއަކަށް ވާނެ ކަމަށެވެ. އެ ޓީވީ އިންނާނީ ޕެނަލް އެއްގެ ތެރޭގައެވެ. އަދި އެއަށް ކަރަންޓު ދިނުމުން، ޓީވީ ޕެނަލް ތެރެއިން ނިކުމެ އިންނާނެއެވެ. އަދި އެ ޑިސްޕްލޭ މަސައްކަތް ކުރާގޮތް ވީހާވެސް އަވަހަށް ސީއީއެސްގައި ދައްކާލާނެ ކަމަށް އެލްޖީއިން ބުނެއެވެ.