27 Dec 2020, 15:51

އުތުރުގެ ހަތަރު ރަށް ފަތުރުވެރިކަމަށް ކުއްޔަށް ދޫކުރަން ބީލަމަށް ހުޅުވާލައިފި އެވެ.

ޓޫރިޒަމް މިނިސްޓްރީއިން މިއަދު ކުރި އިއުލާނެއްގައި ފަތުރުވެރިކަން ތަރައްގީކުރަން ބީލަމަށް ހުޅުވާލި ރަށްތަކަކީ؛

  • ހއ. އަލިދުއްފަރު ފިނޮޅު

  • ހދ. ވައިކަރަމުރައިދޫ (15 ހެކްޓަރުގެ ބިން)
  • ށ. ކުޑަޅައިމެންދޫ
  • ނ. ކުންނަމެލައި

މިކަމާ ގުޅޭ މައުލޫމާތު ދިނުމަށް ޖެނުއަރީ 14ވަނަ ދުވަހުގެ މެންދުރު 1:00ގައި ޒޫމް މެދުވެރިކޮށް ބައްދަލުވުމެއް ބާއްވާނެ އެވެ. އަދި ބީލަން ހުށަހެޅުމުގެ ސުންގަޑި ހަމަވާނީ މާޗު ހަތްވަނަ ދުވަހުގެ ހެނދުނު 10:00 އަށެވެ.

މައުލޫމާތު ސާފުކުރުމަށް ބާއްވާ ބައްދަލުވުމުގައި ބައިވެރިވާން ބޭނުންވާ ފަރާތްތަކުން ޖެނުއަރީ 13ވަނަ ދުވަހުގެ މެންދުރު 2:00ގެ ކުރިން ޓޫރިޒަމް މިނިސްޓްރީގެ އީމެއިލް[email protected]އަށް އެކަމަށް އެދި ނަމާއި، އީމެއިލް އެޑްރެސް އަދި ފޯނު ނަންބަރު މެއިލް ކުރަންވާނެ އެވެ.

އެ އިއުލާނާ ގުޅޭ ބީލަން ފޮތް ގަންނަން ހުށަހަޅަން ޖެހޭ އެޕްލިކޭޝަން ފޯމު ޓޫރިޒަމް މިނިސްޓްރީގެ ވެބައިސައިޓުން ޑައުންލޯޑު ކުރެވޭނެ އެވެ. އަދި ބީލަން ފޮތް ލިބޭނީ ޑިސެމްބަރު 31އިން ފެށީގެން މާޗު ހަތަރުވަނަ ދުވަހުގެ ނިޔަލަށް، ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 1:00 އާ ދެމެދު ޓޫރިޒަމް މިނިސްޓްރީގެ ރިސެޕްޝަނުން ލިބޭނެ އެވެ.

އުތުރުގެ ހަތަރު ރަށުގައި ޓޫރިޒަމް ތަރައްގީކުރަން ހުޅުވާލާފައިވާއިރު، އުތުރާއި ދެކުނުގެ ޓޫރިޒަމް ބިމު ކުލި ކުޑަކުރަން ޓޫރިޒަމް ގާނޫނަށް މިމަހުގެ ވަނީ އިސްލާހެއް ގެނެސްފަ އެވެ.

އަލަށް ގެނައި ބަދަލުގެ ދަށުން ހއ، ހދ. އަދި ށ. އަތޮޅުން ދެލައްކަ އަކަ މީޓަރަށްވުރެ ކުޑަ ބިންތަކަށް އަކަ މީޓަރަކަށް އަހަރަކު ހަތަރު ޑޮލަރެވެ. ދެލައްކަ އާއި ހަތަރު ލައްކަ އަކަ މީޓަރާ ދެމެދުގެ ބިންތަކަށް އަހަރަކުު 750،000 ޑޮލަރެވެ. ހަތަރު ލަކައިން މަތީގެ އަކަ މީޓަރަށްވުރެ ބޮޑު ބިންތަކަށް އަހަރަކު އެއް މިލިއަން ޑޮލަރެވެ.

މާލެ ސަރަހައްދު ހިމެނޭ ނ، ރ، ބ، ޅ، ކ، އއ، އދ، ވ، މ، ފ، އަދި ދ. އަތޮޅުގެ ކުލި ނަގަން ބިލުގައި ހިމަނާފައިވަނީ މިހާރުވެސް ނަގާ އަދަދަށެވެ. އެގޮތުން ދެލައްކަ އަކަ މީޓަރަށްވުރެ ކުޑަ ބިންތަކަށް އަކަ މީޓަރަކަށް އަހަރަކު އަށް ޑޮލަރެވެ. ދެލައްކަ އާއި ހަތަރު ލައްކަ އަކަ މީޓަރާ ދެމެދުގެ ބިންތަކުން އެންމެ ބޮޑުވެގެން އަހަރަކުު ނެގޭނީ 1.5 މިލިއަން ޑޮލަރުގެ ކުއްޔެކެވެ. ހަތަރު ލަކައިން މަތީގެ އަކަ މީޓަރަށްވުރެ ބޮޑު ބިންތަކަށް އަހަރަކު ދެ މިލިއަން ޑޮލަރެވެ.