18 Dec 2020, 11:56
މާލޭގެ ތޮއްޖެހިފައިވާ ސަރަހައްދެއްގައި ހުރި ކެފޭއެއްގައި އަލިފާން ރޯވެ އެ ކެފޭގައި މަސައްކަތް ކުރާ ބިދޭސީއަކު ފިހިއްޖެ އެވެ.
އެމްއެންޑީއެފް އިން ބުނީ ގަލޮޅު ކަރަންކާ މަގުގައި ހުންނަ "ސަލްމާން ކެފޭ" ގައި އަލިފާނުގެ ހާދިސާއެއް ހިނގީ މިއަދު ހެނދުނު 11:15 އެހާކަންހާއިރު އެވެ. އަދި އަލިފާން މިހާރު ކޮންޓްރޯލްކޮށްފައިވާ ކަމަށް ވެސް ބުންޏެވެ.
ފުލުހުން ބުނީ އެ ކެފޭގައި އަލިފާން ރޯވުމާ އެކު އެތަނުގައި މަސައްކަތް ކުރާ ބިދޭސީން ފިލި ކަމަށެވެ. އަދި އަލިފާން ރޯވި ވަގުތު ބިދޭސީއަކު ފިހިފައިވާތީ، އޭނާ އައިޖީއެމްއެޗަށް ގެންގޮސް ފަރުވާދެމުންދާ ކަމަށް ވެސް ފުލުހުން ބުންޏެވެ.
އެހެން ނަމަވެސް އެ މީހާގެ ހާލު ސީރިއަސް ނޫން ކަމަށް ފުލުހުން ބުންޏެވެ.
އަލިފާން ރޯވީ ކެފޭގެ ބަދިގޭގައި ހުރި ގޭސްފުޅި އެއްގެ މަތީގައި އޮތް ތުވާއްޔެއްގައި ކަމަށް އެމްއެންޑީއެފް އިން ބުންޏެވެ. އެމްއެންޑީއެފް އިން ބުނީ އަލިފާނުގެ އަސަރުކޮށްގެން ގޭސްފުޅީގެ ހޮޅި އެއްކޮށް އަނދާފައިވާ ކަމަށެވެ.