17 Dec 2020, 13:34
ކޮވިޑް19 އާ ގުޅިގެން ދަތުރުކުރުމުގައި އަޅާފައި ހުރި ފިޔަވަޅުތަކަށް ލުއިދިން ސަބަބުތައް ހެލްތު އެމަޖެންސީ އޮޕަރޭޝަން ސެންޓަރުން ސާފުކޮށްދީފި އެވެ.
ރާއްޖެ އިން ބޭރުން އަންނަ ދިވެހިން ރާއްޖެ އަންނަ އިރު 96 ގަޑިއިރު ހަމަނުވާ ޕީސީއާރު ނެގެޓިވް ނަތީޖާ އެއް އޮތް ނަމަ، އެ މީހުން ކަރަންޓީނުވާން ނުޖެހޭ ގޮތަށް އުސޫލު ވަނީ ބަދަލުކޮށްފަ އެވެ.
ރޭ ބޭއްވި ނޫސްވެރިންގެ ބައްދަލުވުމުގައި، އެޗްއީއޯސީގެ ތަރުޖަމާނު ޑރ. ނަޒްލާ ރަފީގް ވަނީ ރާއްޖެ އިން ބޭރުން މާލެ ސަރަހައްދަށް އަންނަ ދިވެހީންނާއި، ރާއްޖޭގައި މަސައްކަތް ކުރާ ބިދޭސީން ކަރަންޓީނުވާން ނުޖެހޭ ގޮތަށް ހެދި ސަބަބުތައް އޮޅުންފިލުވައިދެއްވައިފަ އެވެ.
ޑރ. ނަޒްލާ ވިދާޅުވީ ބޭސްފަރުވާ އާއި ވިޔަފާރި އާއި އެހެނިހެން ޒަރޫރީ ކަންކަމުގައި ވެސް އަވަސް އަވަހަށް ރާއްޖެއިން ބޭރަށް ދާންޖެހޭ ގިނަ އަދަދެއްގެ ބަޔަކު އެބަތިބި ކަމަށެވެ.
ނަމަވެސް ކޮންމެ ދަތުރަކަށް ފަހު މާލެ އައިސް ކަރަންޓީނުވުމަކީ އުނދަގޫ ކަމަކަށް ވާތީ އެކަމުގައި ލުއި ދިނީ ކަމަށެވެ.
އެގޮތަށް ނިންމީ، ރާއްޖެއިން ބޭރުން އައިސް ކަރަންޓީނުވާ މީހުންގެ ތެރެއިން ކޮވިޑަށް ޕޮޒިޓިވްވާ މީހުންގެ ނިސްބަތް މަދުވެފައި މާލެ ސަރަހައްދުގައި ބަލީގެ ހާލަތު އޮތް ހިސާބަށް ރިއާޔަތްކުރުމަށް ފަހު ކަމަށް ވެސް ޑރ. ނަޒްލާ ވިދާޅުވި އެވެ.
އޮކްޓޫބަރު 26 އިން ނޮވެމްބަރު 28 އާ ހަމައަށް 1986 މީހުން ރާއްޖެއިން ބޭރުން އައިސްގެން ކަރަންޓީނުވި އިރު، އޭގެ ތެރެއިން ބައްޔަށް ޕޮޒިޓިވްވެފައި ވަނީ 16 މީހުންނެވެ.
"މިހާރު މާލެ ސަރަހައްދުގައި ބަލީގެ ހާލަތު އޮތް ހިސާބަށް ބަލާފަ ރައްކާތެރި ކަމުގެ ފިޔަވަޅުތައް ނެގޭނެ ކަމަށް، ރައްކާތެރިކަމަށް އިތުރަށް ސަމާލުކަން ދީގެން މަސައްކަތް ކުރެވޭނެ ކަމަށް ފެންނާތީވެ މިވަގުތަށް މި ލުއިތައް މި ދިނީ." ޑރ. ނަޒްލާ ވިދާޅުވި އެވެ.
އެހެން ނަމަވެސް ބަލި ފެތުރުން އިތުރުވާނަމަ ނުވަތަ ބަލީގެ ހާލަތު މާލެ ސަރަހައްދުގައި ގޯސްވަމުން ދާނަމަ އެ ފިޔަވަޅުތަކަށް ބަދަލު އައުން އެކަށީގެންވާކަން ވެސް ޑރ. ފާހަގަކުރެއްވި އެވެ.
މާލެ ސަރަހައްދަށް އަންނަ މީހުން ކަރަންޓީނުވާން ނުޖެހުނު ނަމަވެސް، އަތޮޅު ތެރެއަށް ދާ މީހުން ކަރަންޓީނު ވާން ޖެހޭނެ އެވެ.
ޑރ. ނަޒްލާ ވިދާޅުވީ އެކަމާ ގުޅިގެން ވަރަށް ގިނަ ބައެއްގެ ޝަކުވާ އާއި ސުވާލުތައް ހުރި ކަމަށެވެ. އަދި މާލެ އާއި އަތޮޅު ތެރޭގައި ތަފާތުތަކެއް ގެންގުޅޭ ސަބަބު އޮޅުންފިލުވައިދޭނެ އެދޭ ކަމަށެވެ.
ޑރ. ނަޒްލާ ވިދާޅުވީ އަތޮޅު ތެރެއަށް ދާ މީހުން ކަރަންޓީވާން ޖެހެނީ، ރަށްތަކުގެ ރައްކާތެރިކަމަށް ބަލާފައެވެ.
"މާލޭގައި ކޮމިއުނިޓީ ސްޕްރެޑް މިހާރު ވެސް އެބަ އޮތް. އަތޮޅުތެރެއާ ބަލާފައި، ހާއްސަކޮށް ބަލި އެއްގޮތަކަށް ވެސް ނެތް، އަދި ޓޫރިޒަމްގެ ކަމެއް ވެސް ނެތް ރަށަކާ ބަލާފަ މާލެ އަދިވެސް ރިސްކް ބޮޑުވާނެ. އަޅުގަނޑުމެންގެ މަސައްކަތް ފެށުނީއްސުރެ އެންމެ މުހިންމުކަމެއް ކަމަށް ބަލާފަ މިއޮތީ އަތޮޅުތެރޭގެ ރަށްރަށަށް ބަލި ދިއުމުން ރައްކާތެރިކުރުން،" ޑރ. ވިދާޅުވި އެވެ.
ހަމައެއާ އެކު ކޮވިޑް ޓެސްޓުގެ ނެގެޓިވް ނަތީޖާއަކާ އަކާއެކު ދިވެހިންނަށާއި ރާއްޖޭގައި މަސައްކަތްކުރާ ބިދޭސިންނަށް ރިސޯޓުތަކަށް ޗުއްޓީ ހޭދަކުރަން ދެވޭނެ ގޮތަށް ވެސް އުސޫލު ވަނީ ބަދަލުކޮށްފަ އެވެ.
ކޮވިޑަށް ފަހު ރިސޯޓްތައް ހުޅުވިއިރު ދިވެހިންނާއި ވޯކް ވިސާގައި މަސައްކަތް ކުރާ ބިދޭސީންނަށް ރިސޯޓްތަކަށް ދިޔުން އޮތީ މަނާކޮށްފަ އެވެ.
ނަމަވެސް ހުއްދަ ލިބިގެން ކުރު މުއްދަތުގެ މަސައްކަތްތަކަށް ރިސޯޓުތަކަށް ދަތުރުކުރާ މީހުންނާއި ލޯކަލް ޓޫރިސްޓުންގެ ގޮތުގައި ރިސޯޓުތަކަށް ޗުއްޓީއަށްދާ ފަރާތްތަކުން ދަތުރަށް ފަށާއިރު 72 ގަޑިއިރު ހަމަނުވާ ޕީސީއާރު ނެގެޓިވް ނަތީޖާ އެއް އޮތްނަމަ ރިސޯޓަށް ދެވޭނެ އެވެ.
މިގޮތަށް ރިސޯޓުތަކަށްދާ ފަރާތްތަކުން އަނބުރާ މާލެ ސަރަހައްދު ނޫން އެހެން ރަށަކަށް ދާނަމަ 10 ދުވަހަށް ކަރަންޓީނުވާން ޖެހޭނެއެވެ.
"އެއް ރަށުން އަނެއް ރަށަށް ދަތުރުކުރާ މީހުން ކަރަންޓީނުވުން ބިނާވެފަ އޮތް އަސާސަކީ، ހައި ރިސްކް ތަނަކުން ލޯ ރިސްކް ތަނަކަށް ދަންޏާ އަބަދުވެސް ކަރަންޓީނު ވާން ޖެހޭނެ. އެހެންވީމަ ޓޫރިސްޓުން އުޅޭ ތަންތަނަކީ ޓޫރިސްޓުން ނާންނަ ތަނަކާ ބަލާފަ ހައި ރިސްކް ތަންތަން،" ޑރ. ނަޒްލާ ވިދާޅުވިއެވެ.
ޒަރޫރީ މަސައްކަތަކަށް ކުރު މުއްދަތަށް މާލެއިން އަތޮޅު ތެރެއަށް ދާން ޖެހޭ ފަރާތްތަކުން 72 ގަޑިއިރު ހަމަނުވާ ޕީސީއާރު ނެގެޓިވް ނަތީޖާއެއް ހުށަހަޅަން ޖެހޭ ގޮތަށް އޮތް އޮތުން ވެސް ވަނީ އުވާލާފަ އެވެ.
ކަރަންޓީނު ނުވެ މާލެއިން ރަށްރަށަށް ދިޔުމުގެ ހުއްދަ އެޗްޕީއޭއިން ދެމުން އަންނަނީ ރަށްރަށުގައި އެކި އެކި ހިދުމަތްތައް ދިނުމަށާއި މަޝްރޫއުތަކުގެ މަސައްކަތްތައް ހިންގުމަށް ރަށަކަށް ދާން ޖެހޭ ފަރާތްތަކަށް އެކަންޏެވެ.
ޑރ. ނަޒްލާ ވިދާޅުވީ އެ ފިޔަވަޅު އުވާލީ ބައެއް ކަހަލަ މުހިންމު މަސައްކަތްތައް ކުރަން ކޮންމެ ރަށަކަށް ވެސް ދާން ތިބީ އެއް ބަޔަކަށް ވާތީ، ގިނައިން ޕީސީއާރް ޓެސްޓު ކުރުމުގައި އުނދަގޫތަކެއް ހުރުމުން ކަމަށެވެ.
ނަމަވެސް މި ބަދަލުތަކަށް ފަހު ބަލީގެ ހާލަތު ގޯސްވާނަމަ، އެ ފިޔަވަޅުތަކަށް ބަދަލު ގެންނާނެކަން ޑރ. ނަޒްލާ ރޭ ފާހަގަކުރެއްވިއެވެ.
އެޗްޕީއޭ އިން ފިޔަވަޅުތަކަށް ލުއި ދީފައިވާއިރު، ކޮވިޑް19 އަށް ދުވާލެއްގެ މައްޗަށް ރާއްޖއިން ޕޮޒިޓިވްވާ މީހުންގެ އަދަދު ވަނީ ވަރަށް ބޮޑަށް ދަށްވެފައެވެ.