14 Dec 2020, 18:17
ވޮޝިންޓަން (ޑިސެމްބަރު 14): އެމެރިކާގެ ސްޓޭޓް ސްޕޮންސާސް އޮފް ޓެރަރިޒަމް (އެސްއެސްޓީ) ލިސްޓުން ސޫދާންގެ ނަން ރަސްމީކޮށް އުނިކޮށްފި އެވެ.
ސޫދާނަކީ ޓެރަރިޒަމަށް ވާގިވެރިވާ ދައުލަތެއް ކަމަށް ކަނޑައަޅާ ލިސްޓުން އެގައުމުގެ ނަން ނަގާނެކަން ރައީސް ޑޮނަލްޑް ޓްރަމްޕް މިދިޔަ އޮކްޓޯބަރު މަހު އެމެރިކާގެ ކޮންގްރެސްއަށް އެންގެވި އެވެ. އަދި ސޫދާންގައި ހުންނަ އެމެރިކާގެ އެމްބަސީން މިއަދު ބުނި ގޮތުގައި އެ ލިސްޓުން ސޫދާންގެ ނަން ނެގުމަށް އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ވަނީ މިހާރު ލިޔެކިޔުންތަކުގައި ސޮއި ކުރައްވާފަ އެވެ.
އެމެރިކާއިން އެސްއެސްޓީގައި ސޫދާނުގެ ނަން ހިމެނީ އެގައުމުގައި އަލް ގައިދާގެ މަރުކަޒުތައް ހުރުމުން 1993ގަ އެވެ. އަދި އެ އަހަރު ނިއު ޔޯކްގެ ވޯލްޑް ޓްރޭޑް ސެންޓަރަށް ދިން ފުރަތަމަ ހަމަލާއާ ގުޅިގެންނެވެ.
އެ ލިސްޓުން ސޫދާނުގެ ނަން އުނި ކުރަން އެމެރިކާއިން އެއްބަސްވީ ސޫދާނުން އެގައުމަށް 335 މިލިއަން ޑޮލަރު ދިނުމަށާއި އިސްރާއީލާ ގުޅުން ބަދަހި ކުރަން އެއްބަސްވުމުންނެވެ.
އެމެރިކާއިން ބުނި ގޮތުގައި އެ ފައިސާ އަކީ ސޫދާނުގެ ކުރީގެ ސަރުކާރުން އެހީވި އަލް ގައިދާ ޖަމާއަތުން، 1998 ވަނަ އަހަރު އެމެރިކާގެ ދެ އެމްބަސީއަކަށް ދިން ހަމަލާގައި ލިބުނު ގެއްލުންތަކުގެ ބަދަލެވެ. ޓެންޒޭނިއާ އާއި ކެންޔާގައި ހުރި ދެ އެމްބަސީއަކަށް އަލް ގައިދާއިން ދިން އެ ހަމަލާތަކުގައި 224 މީހަކު މަރުވެ، 4،000 މީހުންނަށް އަނިޔާވި އެވެ.
ޓެރަރިޒަމަށް ވާގިވެރިވާ ގައުމުތަކުގެ ލިސްޓުން ސޫދާންގެ ނަން ނެގުމުން އެގައުމަށް ބައިނަލްއަގުވާމީ އެހީ އާއި ލޯނުތައް ހޯދުމަށް ފަސޭހަ ވެގެން ދާނެ ކަމަށް އެގައުމުގެ ސަރުކާރުގެ އޮފިޝަލުން ވިދާޅުވެ އެވެ.