14 Dec 2020, 12:06
އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ރޭ އާސެނަލް ކުޅުނު މެޗުގައި އެ ޓީމުގެ ކުރީގެ ކެޕްޓަނަށް ދެއްކި ރަތް ކާޑާއި، މެޗުގެ ފަހުކޮޅު ބައިކޮޅަށް ވައިން ގޯލާއެކު ލީގުގައި އާސެނަލްއަށް ކުރިއެރުމުގެ ފުރުސަތު އިތުރަށް ހަނިވެއްޖެ އެވެ.
ރޭގެ މެޗަށް ފަހު ލީގު ތާވަލްގައި އާސެނަލް އޮތީ 13 ޕޮއިންޓާއެކު 15 ވަނައިގަ އެވެ. ރޭގެ މެޗާއެކު ލީގުގައި އެންމެ ފަހުން ކުޅުނު އަށް މެޗުގައި އެ ޓީމަށް ކާމިޔާބު ކުރެވިފައި ވަނީ އެންމެ ދެ ގޯލެވެ. އޭގެ އިތުރުން އާސެނަލް މިހާތަނަށް ލީގުގައި ކުޅުނު 12 މެޗުގެ ތެރެއިން އެއް މެޗުން އެއްވަރުވެ، ހަތް މެޗުން އެ ޓީމް ވަނީ ބަލިވެފަ އެވެ.
ރޭގެ މެޗުގެ ފުރަތަމަ ހާފް މުޅިންހެން ކޮންޓްރޯލް ކޮށްފައި ވަނީ އާސެނަލް އެވެ. އެ ޓީމުން ވަނީ ފުރަތަމަ ހާފްގައި ލަނޑު ޖަހާނެ ގިނަ ފުރުސަތުތަކެއް އުފައްދާފަ އެވެ. ނަމަވެސް އެ ޓީމްގެ ގިނަ ހަމަލާތަކެއް ގޯލަށް އަމާޒުނުވެ ދިޔައިރު، ބަރންލީގެ ޑިފެންސާއި ކީޕަރު ވަނީ އާސެނަލްގެ މަސައްކަތްތަކަށް ހުރަސް އަޅާފަ އެވެ.
މެޗުގެ އޮއެވަރު ބަދަލުވެގެން ދިޔައީ ދެވަނަ ހާފް ފެށިގެން ދިހަވަނަ މިނެޓުގައި އާސެނަލްގެ ކުރީގެ ކެޕްޓަން ގްރެނިޓް ޒަކާއަށް ރަތް ކާޑެއް ދައްކާ ދަނޑުން ފޮނުވާލުމުންނެވެ. އޭނާއަށް ރަތް ކާޑު ދައްކާފައި ވަނީ ކުޅުމުގެ ތެރެއިން ޒަކާ އާއި ބަރންލީގެ އޭޝްލީ ވެސްޓްވުޑްއާ ދެމެދު ހިނގި ފައުލަކުން މައްސަލަ ހޫނުވެ، ޒަކާ ވެސްޓްވުޑްގެ ކަރުގައި ހިފުމުންނެވެ.
މެޗުގެ ދެވަނަ ހާފްގެ ބޮޑުބައި ދިހަ ކުޅުންތެރިންނާއި އެކު އާސެނަލްއަށް ކުޅެން ޖެހުމުން ބާންލީ ވަނީ އެ އެޑްވާންޓޭޖުގެ ބޭނުން ހިފާ، ކުރިއަށް ޖެހިލައިން ހަމަލާތައް އުފައްދަން ފަށާފައެވެ. ނަތީޖާއަކަށްވީ 73 ވަނަ މިނެޓުގައި ބަރންލީއަށް ލިބުނު ކޯނަރަކުން ނެގި ބޯޅަ ސާފުކޮށްލަން އުޅުމުގެ ތެރޭގައި އާސެނަލްގެ ކެޕްޓަން ޕިއޭރް-އެމެރިކް ބޮލުން ޖައްސާލި ބޯޅަ ބައިކޮޅަށް ވަދެ ބަރންލީއަށް ލީޑު ލިބުމެވެ.
މެޗާ ބެހޭ ގޮތުން ވާހަކަ ދައްކަމުން އާސެނަލްގެ ކޯޗް މިކެލް އަރްޓޭޓާ ބުނެފައި ވަނީ އެ މެޗުގައި އާސެނަލްއަށް ކުރިން ލީޑު ނެގެން ޖެހޭނެ ކަމަށާއި، ނަމަވެސް އެކަން ނުވެއުޅެނިކޮށް ކާޑެއް ދެއްކުމުން އެ ޓީމަށް މެޗު އެއްކޮށް ދޫވީ ކަމަށެވެ. އަދި ކުޅުންތެރިން މެޗުގައި ކޮންސަންޓްރޭޓް ކޮށްގެން ރަނގަޅަށް ކުޅެފައި ވާކަމަށާއި، ނަމަވެސް ހެދުނު މިސްޓޭކަކުން އާސެނަލަށް މެޗު ކާމިޔާބު ކުވީކަމަށް އޭނާ ވަނީ ބުނެފަ އެވެ.