08 Dec 2020, 09:40
ވޮޝިންޓަން (ޑިސެމްބަރު 8) : އެމެރިކާގެ ރައީސުލް މުންތަޚަބު ޖޯ ބައިޑަން އޭނާގެ ސަރުކާރުގެ ދިފާއީ ވަޒީރުކަމަށް އައްޔަން ކުރަން އިޚްތިޔާރު ކުރައްވާފައިވަނީ ކަޅު ނަސްލުގެ އެމެރިކާގެ ކުރީގެ ޖެނެރަލެއް ކަމަށްވާ ލޮއިޑް އޮސްޓިން ކަމަށް ބައިޑެން ގެ ޓީމާ ހަވާލާދީ އެމެރިކާގެ ޚަބަރުފަތުރާ ވަސީލަތްތަށް (މީޑިއާ) އިން ބުނެފިއެވެ.
އެމެރިކާ ސިފައިންގެ ޚިދުމުގައި 40 އަހަރު ހޭދަކުރުމަށްފަހު ރިޓަޔަޑް ޖެނަރަލް އޮސްޓިން މަގާމުން ވަކިވެވަޑައިގެންފައިވަނީ 2106 ވަނަ އަހަރު އެވެ. ސިފައިން ގެ ޚިދުމަތުން ވަކިވެވަޑައިގެންނެވިއިރު އޮސްޓިން ހުންނެވީ އެމެރިކާގެ ސެންޓްރަލް ކޮމާންޑްގެ ވެރިޔާގެ މަގާމުގައެވެ. އޮސްޓިން ވެގެންދާނީ ދިފާއީ ވަޒީރުކަމަށް އައްޔަންކުރާ ކަޅު ނަސްލުގެ ފުރަތަމަ ޝަޚްސިއްޔަތު ކަމުގައެވެ.
އެމެރިކާގެ ސިފައިންގެ ވެރިޔާ (ޖޮއިންޓް ޗީފް އޮފް ސްޓާފް) ކަމުގެ މަގާމު ކަޅު ނަސްލުގެ ބޭފުޅެއްކަމަށްވާ ކޮލިން ޕަވަލް އަދާކުރައްވާފައި ވެއެވެ. އެއަށްފަހު ޕަވަލްވަނީ އެމެރިކާގެ ޚާރިޖީ ވަޒީރުކަމުގެ މަގާމުވެސް އަދާކުރައްވާފައެވެ. ބައިޑަންގެ ޓީމާ ހަވާލާދީ އެމެރިކާގެ މީޑިއާ ބުނާގޮތުން އޭނާގެ ސަރުކާރުގެ ސިއްހަތާބެހޭ ވަޒީރުކަމަށް އައްޔަންކުރައްވާނީ ހަވިޔަރ ބެސޭރާ އެވެ. ބެރޭސާއަކީ ކެލިފޯނިޔާ ގެ ލޯކަލް ސަރުކާރުގެ އެޓާނީ ޖެނެރަލް އެވެ.
އަނެއްކޮޅުން އެމެރިކާގެ "ނެޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑިޒީޒަސް" ގެ ވެރިޔާ އެންތަނީ ފައުޗީއަށް އެމެރިކާގެ ރައީސްގެ ސިއްހަތާބެހޭ މުސްތަޝާރުކަމުގެ މަގާމު ދެއްވުމަށް ބައިޑަން ނިންމަވާފައިވާ ކަމަށްވެސް ޚަބަރުތައް ބުނެއެވެ. މުސްތަޝާރުކަން ދެއްވި ނަމަވެސް "ނެޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑިޒީޒަސް" ގެ ވެރިޔާގެ މަގާމުގައިވެސް ހުންނަވާނީ ފައުޗީއެވެ. ފައުޗީއަކީ އޭނާ މަގާމުން ވަކިކުރާނެކަމުގެ އިންޒާރު ރައީސް ޑޮނަލްޑް ޓްރަމްޕް ދެއްވާފައިވާ ބޭފުޅެކެވެ.
ބައިޑަން ވަނީ ވައިޓް ހައުސްގެ ކޮރޯނާވައިރަސް ކޯޑިނޭޓަރުގެ މަގާމަށް ވިޔަފާރިވެރިޔާ ޖެފް ޒަޔަންޓްސް އިޚްތިޔާރު ކުރައްވާފައެވެ. ޖެފް އަކީ ވިޔަފާރިވެރިއެކެވެ.
(ނޫސްއެޖެންސީތައް)