07 Dec 2020, 14:32
ޕްރިމިއަރ ލީގުގައި ރޭ އާސެނަލް އާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް، ޓޮޓަންހެމް ހޮޓްސްޕާ އަނެއްކާވެސް ލީގު ތާވަލްގެ އެއްވަނައަށް ޖެހިލައިފި އެވެ.
ރޭގެ ކާމިޔާބިއާއެކު މިހާތަނަށް ލީގުގައި 11 މެޗު ކުޅެފައިވާ ޓޮޓަންހެމް ތާވަލްގެ އެއްވަނައަށް ޖެހިލާފައި ވަނީ ރޭގެ ތިން ޕޮއިންޓާއެކު މުޅިއަކު 24 ޕޮއިންޓް ހޯދައިގެނެވެ. ޓޮޓަންހެމް ވަނީ މިހާތަނަށް ލީގުގައި ކުޅުނު މެޗުތަކުގެ ތެރެއިން ހަތް މެޗުން މޮޅުވެ ތިން މެޗު އެއްވަރުކޮށްފަ އެވެ.
ރޭގެ މެޗުގައި ޓޮޓަންހެމްގެ ދެ ލަނޑުވެސް ފެނިގެން ދިޔައީ ފުރަތަމަ ހާފުގަ އެވެ. އެ ޓީމު މެޗުގައި ޖެހި ފުރަތަމަ ލަނޑު މެޗުގެ 13 ވަނަ މިނެޓުގައި އެ ޓީމަށް ކާމިޔާބުކޮށްދިނީ ޕެނަލްޓީ އޭރިއާ ބޭރުން ހެދި ޝޮޓަކުން އެ ޓީމްގެ ސޮން ހެންގް-މިން އެވެ.
މެޗުގެ ދެވަނަ ލަނޑު ފުރަތަމަ ހާފްގެ އިތުރު ވަގުތުގެ ތެރޭގައި ޓޮޓަންހެމްއަށް ކާމިޔާބު ކޮށްދިނީ ހެރީ ކޭން އެވެ. ސޮން ހެންގް-މިން ދިން ޕާހަކުން އޭނާ އެ ލަނޑު ކާމިޔާބުކޮށްފައި ވަނީ އަރިމަތިން އަރާ ހަނި އެންގަލްއަކުން ގޯލް ދަނޑިގައި ޖައްސާ ގޯލްގެ ތެރެއަށް ބޯޅަ ފޮނުވާލައިންނެވެ.
މެޗުގެ ދެވަނަ ހާފްގައި އާސެނަލް އިން ވަނީ ކުޅުން ރަނގަޅުކޮށް އެ ޓީމުގެ ހަމަލާތައް ވަރުގަދަ ކޮށްފަ އެވެ. އެގޮތުން އާސެނަލްގެ އެލެކްޒޭންޑާ ލަކަޒެޓް އެ ޓީމަށް ލިބުނު ފްރީ ފޮނުވާލި ހަމަލާ ފާހަގަ ކޮށްލެވޭ އިރު، ޓޮޓެންހަމްގެ ކީޕަރަށް ވަނީ އޭނާގެ ނުރައްކަތެރި ހެޑަރ އެއްވެސް ދިފާއު ކުރަން ޖެހިފަ އެވެ.
މެޗުގެ ބޮޑުބައިގައި އާސެނަލްއިން ބޯޅަ ހިފައްޓައިން ރަނގަޅު ކުޅުމެއް ދެއްކި ނަމަވެސް، އެ ޓީމަށް ވަނީ ލަނޑެއް ކާމިޔާބު ކުރެވޭގޮތް ނުވެފަ އެވެ. އެ މެޗުގެ ނާކަމިޔަބީއާއެކު އާސެނަލް ވަނީ 13 ޕޮއިންޓާއެކު ލީގު ތާވަލްގެ 15 ވަނައަށް ވެއްޓިފަ އެވެ.