06 Dec 2020, 22:10
ފާއިތުވި 24 ގަޑިއިރުގެ ތެރޭގައި ރާއްޖެއިން ކޮވިޑް-19 އަށް ޕޮޒިޓިވް ވެފައިވަނީ 39 މީހުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން މިރޭ އާންމުކުރި ކޮވިޑް19ގެ ތަފާސް ހިސާބުތަކުން ދައްކާ ގޮތުން ރޭ އިރުއޮއްސި 6:00 އިން މިރޭ އިރުއޮއްސި 6:00 އަށް ވަނީ 2،267 ސާމްޕަލްސް ނަގާފައެވެ.
އަލަށް ޕޮޒިޓިވްވި މީހުންގެ ތެރެއިން 37 މީހުންނަކީ މާލެއިން ކޮވިޑް-19 އަށް ޕޮޒިޓިވްވި މީހުންނެވެ.
މިއަދު ކޮވިޑް-19 އަށް ޕޮޒިޓިވްވި މީހުންގެ އަދަދަކީ އިއްޔެއާ އަޅާ ބަލާއިރު އިތުރު އަދަދެކެވެ. އެގޮތުން އިއްޔެ ކޮވިޑް-19 އަށް ޕޮޒިޓިވް ވެފައިވަނީ 16 މީހުންނެވެ.
މިއަދު ޕޮޒިޓިވްވި މީހުންނާއެކު ރާއްޖެއިން ކޮވިޑަށް ޕޮޒިޓިވްވި ޖުމްލަ މީހުންގެ އަދަދު ވަނީ 13،198 އަށް އަރާފައެވެ.
ކޮވިޑް-19 ޖެހި އެ ބަލިން ރަނގަޅުވި މީހުންގެ އަދަދު ވަނީ މިހާރު 12،321 އަށް އަރާފައެވެ. އޭގެތެރެއިން މިއަދު ކޮވިޑް-19 ބަލިން ރަނގަޅު ވެފައިވަނީ 57 ކޭސް އެވެ.
މިހާތަނަށް ބަލީގައި މަރުވި މީހުންގެ އަދަދަކީ، 47 އެވެ.