16 Nov 2020, 12:24
ހަނޯއި (ނޮވެމްބަރު 16) : ދުނިޔޭގެ ވިޔަފާރީގެ އެންމެ ބޮޑު ސަރައްދު ގާއިމުކުރުމުގެ އެއްބަސްވުމުގައި ދެކުނު އިރުމަތީ އޭޝިއާ އާއި އޭޝިއާ ޕެސިފިކް ގެ ގައުމުތަށް ސޮއިކޮށްފި އެވެ.
އެމެރިކާ ނުހިމެނޭ ގޮތަށް ޗައިނާ އިސް ދައުރެއް އަދާކޮށްގެން އުފެއްދި ވިޔަފާރީގެ މިސަރަހައްދު ވެގެންދާނީ މުޅި ދުނިޔޭގެ ވިޔަފާރީގެ 30 ޕަސެންޓް ދުނިޔޭގެ އާބާދީގެ 30 ޕަސެންޓް (2.2 ބިލިއަން މީހުން) ހިއްސާކުރާ ވިޔަފާރީގެ ސަރަހައްދަށެވެ. އާސިޔާންގެ 10 ގައުމާއި އޭޝިޔާ ޕެސިފިކްގެ އިތުރު ފަސް ގައުމު ހިމެނޭ ގޮތަށް ރީޖަނަލް ކޮމްޕްރިހެންސިވް އެކޮނޮމިކް ޕާޓްނަޝިޕް (އާރްސީއީޕީ)ގެ ނަމުގައި އަލަށް ވުޖޫދަށް އައި މިޖަމާއަތްވެގެންދާނީ ދުނިޔޭގެ އެންމެ ބޮޑު ވިޔަފާރީގެ ޖަމާއަތަށެވެ.
މިއީ ޔޫރަޕްގެ އިއްތިޙާދަށްވުރެވެސް ބޮޑު އިގްތިސާދީ ޖަމާއަތެއް
އާސިޔާންގެ 10 ގައުމުގެ އިތުރުން އޮސްޓްރޭލިޔާ، ޗައިނާ، ޖަޕާން، ދެކުނު ކޮރެޔާ އަދި ނިއުޒީލޭންޑް ހިމެނޭ މިޖަމާއަތަކީ ޔޫރަޕްގެ އިއްތިޙާދަށް ވުރެ އިގްތިސާދީ ގޮތުންނާއި ވިޔަފާރީގެ ގޮތުން މާބޮޑު އަދި މާބިޔަ ޖަމާއަތެކެވެ. މާ މުއްސަނދި އަދި މާ އުފެއްދުންތެރި ޖަމާއަތެކެވެ.
މި މިޖަމާއަތް އިއްޔެ މިއުފެދުނީ މި 15 ގައުމުގެ މެދުގައި އަށް އަހަރުވަންދެން ކުރިޔަށްދިޔަ ދަތި އަދި އުނދަގޫ މަޝްވަރާތަކަކަށްފަހު އެވެ. މި ސަރަހައްދާއި މިޖަމާއަތް ވުޖޫދަށް ގެނައުމުގެ އެއްބަސްވުމުގައި ސޮއިކުރީ ވިއެޓްނާމްގެ ބޮޑުވަޒީރު އިންގޫޔެން ޒުއާން ފޫކްގެ ރިޔާސަތުގައި ވާޗުއަލްކޮށް ބޭއްވި އާސިޔާންގެ އެންމެ އިސްވެރިންގެ 37 ވަނަ ބައްދަލުވުގެ ހަވާސާގަ އެވެ.
ވާޗުއަލްކޮށް ސޮއިކުރުމުގެ ކަންތަށް ކުރިޔަށް ގެންދަނީ
މި އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ވިއެޓްނާމުގެ ބޮޑުވަޒީރު އިންގޫޔެން ޒުއާން ފޫކް ވިދާޅުވީ މިއީ އަށް އަހަރަށް ދިގުދެމިގެން ދިޔަ ދަތި އުނދަގޫ އެހެނަސް ހުރިހާ ގައުމުތަކެއްގެ ވިޔަފާރީގެ މަސްލަހަތުތަކަށް ހިޔާމަތް ކުރެވޭގޮތަށް ކުރެވުނު މަޝްވަރާތަކަކަށް ފަހު ސޮއިކުރި އެއްބަސްވުމެއް ކަމުގަ އެވެ.
މި ވަރުގަދަ ޖަމާއަތުގައި އިންޑިއާއާއި އެމެރިކާ ބައިވެރިއެއް ނުވޭ
މި ވަރުގަދަ ޖަމާއަތުގައި އޭޝިއާގެ އެންމެ ބޮޑު ތިންވަނަ އިގްތިސާދު ކަމަށްވާ އިންޑިއާ ބައިވެރިއެއް ނުވެ އެވެ. އަދި ދުނިޔޭގެ އެއްވަނަ އިގްތިސާދުގެ ގޮތުގައި ސިފަކުރެވޭ އެމެރިކާ ވެސް ބައިވެރިއެއް ނުވެ އެވެ. ރީޖަނަލް ކޮމްޕްރިހެންސިވް އެކޮނޮމިކް ޕާޓްނަޝިޕް (އާރްސީއީޕީ) ވުޖޫދަށް ގެނައުމުގެ މަޝްވަރާތަކުގައި އެންމެ ފުރަތަމަ އިންޑިއާ ބައިވެރިވި އެވެ. ނަމަވެސް، އެއްބަސްވުމާ ހަމައަށް އާދެވުމުގެ ކުރިން އިންޑިއާ ވަނީ މަޝްވަރާތަކުން އަމިއްލައަށް ވަކިވެފަ އެވެ. އިންޑިއާ މަޝްވަރާތަކުން ވަކިވީ އެމެރިކާގެ ނުފޫޒުގައި ކަމަށް ވުމުގެ އިތުރުން ޗައިނާއާމެދު އިންޑިއާ ގެންގުޅޭ ވާދަވެރިކަމަކީ ވެސް މި މަޝްވަރާތަކުން އިންޑިއާ ވަކިވި ސަބަބެއްކަމުގައި ވަނީ ބެލެވިފަ އެވެ.
ދުނިޔޭގެ ވިޔަފާރީގެ އެންމެ ބޮޑު ދެ އެއްބަސްވުމުންވެސް އެމެރިކާ ބާކީވެފައި
އެމެރިކާއަށް ބަލާއިރު މި ބިޔަ ވިޔަފާރީގެ ބްލޮކުން އެމެރިކާ ބާކީވެފައިވުމުގެ އިތުރުން އޭޝިއާ ޕެސިފިކްގެ 11 ގައުމަކާއެކު އެމެރިކާ ކުރިން ސޮއިކޮށްފައިވާ "ޓްރާންސް ޕެސިފިކް ޕާޓްނަޝިޕް" އެއްބަސްވުމުން ވެސް ޓްރަމްޕްގެ ވެރިކަމުގައި އެމެރިކާ ވަނީ ވަކިވެފަ އެވެ. "އާރްސީއީޕީ" އެއްބަސްވުމުގައި ވެސް އެމެރިކާ ބައިވެރި ނުވާތީ ދުނިޔޭގައި އެންމެ ބާރަށް ކުރިއަރަމުން އަންނަ އިގްތިސާދުތަށް ހިމެނޭ ވިޔަފާރީގެ ބޮޑު ދެ އެއްބަސްވުމުން ވެސް އެމެރިކާ މިވަނީ އެކަހެރިވެ ބާކީވެފަ އެވެ.
އާސިޔާންގެ ގައުމުތަކުގެ ތެރޭގައި ހިމެނެނީ ބުރުނާއީ، އިންޑޮނޭޝިޔާ، ކެމްބޯޑިޔާ، ލާއޯސް، މެލޭޝިޔާ، ތައިލޭންޑް ފިލިޕީންސް، މިޔަންމާ، ސިންގަޕޫރު، އަދި ވިއެޓްނާމެވެ. މި 10 ގައުމުގެ އިތުރުން ރީޖަނަލް ކޮމްޕްރިހެންސިވް އެކޮނޮމިކް ޕާޓްނަޝިޕް (އާރްސީއީޕީ) ސަރަހައްދުގެ އެއްބަސްވުމުގައި ހިމެނެނީ އޮސްޓްރޭލިޔާ، ޗައިނާ، ޖަޕާން، ދެކުނު ކޮރެޔާ އަދި ނިއުޒީލޭންޑް އެވެ. (ނޫސްއެޖެންސީތަށް)