08 Nov 2020, 11:13
ސްޕެނިޝް ލީގުގައި އެންމެ ފަހުން ކުޅުނު ހަތަރު މެޗުގައި ވެސް މޮޅެއް ނުލިބި އޮތް ބާސެލޯނާ ރޭ ރެއާލް ބެޓިސް އަތުން ކުރި ހޯދައިފި އެވެ.
ބާސެލޯނާގެ ކޭމްޕް ނޫ ސްޓޭޑިއަމުގައި ރޭ ކުޅުނު އެ މެޗުން ބެޓިސްގެ މައްޗަށް އެ ޓީމުން ކުރި ހޯދީ 5-2 ގެ ނަތީޖާއަކުންނެވެ. ސްޕެނިޝް ލީގުގެ ގަދަ 10 ގެ ބޭރުގައި އޮތް ބާސެލޯނާއިން މި ހޯދި މޮޅާ އެކު ވަނީ ތާވަލުގެ އަށްވަނައަށް ޖެހިލައިފަ އެވެ. ހަތް މެޗުން 11 ޕޮއިންޓް ހޯދައިގެން ބާސެލޯނާއިން އަލުން އަނބުރާ މޮޅުވުމުގެ ރޭހަށް ވަން އިރު، އެންމެ ފަހުން ކުޅުނު ހަތަރު މެޗުގައި ދެ ބައްޔާއި ދެ އެއްވަރު އެ ޓީމުން ވަނީ ވެފަ އެވެ.
އިންޓަނޭޝަނަލް ބްރޭކަށް ދިއުމުގެ ކުރިން ކުޅޭ ލީގުގެ ފަހު ބުރުގައި ބާސެލޯނާއިން ރޭގެ މެޗަށް ނުކުތީ އެ ޓީމުގެ ކެޕްޓަން ލިއޮނެލް މެސީ ނުލަ އެވެ. ޗެމްޕިއަންސް ލީގުގައި އެންމެފަހުން ޑައިނަމޯ ކިއެވް އަތުން ބާސާ މޮޅުވި މެޗުގައި ލިބުނު ކުޑަ އަނިޔާއެއްގެ ސަބަބުން މެސީ ބެންޗުން ފެށި އިރު، މެޗުގައި ފުރަތަމައިން ގޯލު ޖަހައި ލީޑު ނެގީ ވެސް އެ ޓީމުންނެވެ.
މެޗުގެ 22 ވަނަ މިނަޓުގައި ބާސެލޯނާއަށް އެ ގޯލު ޖަހައިދިނީ އުސްމާން ޑެމްބެލޭ އެވެ. އެއަށްފަހު ވެސް ލީޑު ފުޅާ ކުރަން ބާސެލޯނާއަށް ރަނގަޅު ހުސް ފުރުސަތުތަކެއް ލިބިގެން ދިޔައިރު، އެ ޓީމުގެ އަންސޫ ފާޓީއަށް އިދިކޮޅު ޓީމުގެ ޑިފެންޑަރަކު ކުރި ފައުލަކާ ގުޅިގެން ބާސެލޯނާއަށް ވަނީ އެ ހާފުގައި ޕެނަލްޓީއެއް ލިބިފަ އެވެ. އެކަމަކު އެންޓޮއިން ގްރީޒްމަން ފޮނުވާލި އެ ޕެނަލްޓީ ބެޓިސްގެ ކީޕަރު ކްލޯޑިއޯ ބްރާވޯ ވަނީ ދިފާއުކޮށްފަ އެވެ.
ބާސެލޯނާއަށް ލިބުނު ފުރުސަތުތައް ބޭނުން ނުހިފި ދިޔައިރު، ފުރަތަމަ ހާފުގެ އިތުރު ވަގުތު ބެޓިސްއަށް ނަތީޖާ ހަމަހަމަ ކޮށްދިނީ ބާސެލޯނާގެ ކުރީގެ ކުޅުންތެރިޔާ އެންޓޯނިއޯ ސަނާބްރިއާ އެވެ.
ދެވަނަ ހާފަށް ބާސެލޯނާއިން ކުރިމަތިލީ ކެޕްޓަން މެސީ ޓީމުގައި ހިމަނައިގެންނެވެ. އަންސޫ ފާޓީގެ ބަދަލުގައި ކުޅެން ނުކުން މެސީ ވަނީ އިސާހިތަކު ތަފާތު ދައްކާ ބާސެލޯނާގެ ދެވަނަ ގޯލެއް ޖެހުމަށް ފުރުސަތު ތަނަވަސްކޮށްދީފަ އެވެ. އެ ގޯލު މުޅިން ހުސްކޮށް ހުރެ ޖަހައިދިނީ ގްރީޒްމަން އެވެ.
މެސީގެ ތަފާތު މޮޅު ކުޅުމެއް ފެނިގެން ދިޔަ އެ މެޗުގައި ބާސެލޯނާއަށް އޭނާ ވަނީ ދެ ގޯލު ޖަހައިދީފަ އެވެ. އޭގެ ތެރެއިން އެއް ގޯލަކީ ޕެނަލްޓީ އެކެވެ. މެސީ ކުޅުމުގެ ތެރެއިން ރޭގެ މެޗުގައި ޖެހި ގޯލަކީ މި ސީޒަނުގައި އޭނާ އޯޕަން ކުޅުމުގެ ތެރެއިން ޖެހި ހަމައެކަނި ގޯލެވެ.
ބެޓިސްގެ ދެވަނަ ލަނޑު އެ ޓީމަށް ޖަހައިދިނީ ފަހު ހާފުގައި ބަދަލު ކުޅުންތެރިއެްްގެ ގޮތުގައި ނުކުން ލޮރެން މޮރޯން އެވެ. ބާސެލޯނާގެ ފަހު ގޯލަކީ އެ ޓީމުގެ ޒުވާން ފޯވާޑް ޕެޑްރީ ޖަހައިދިން ގޯލެކެވެ.