05 Nov 2020, 16:11
އާޓް ސްޓޫޑިއޯއެއްގެ ތެރޭގައި އަންހެން ކުއްޖަކު ރޭޕްކުރިކަން ސާބިތުވެ ކުރެހުންތެރިއެއް ކަމަށްވާ، ގދ. ތިނަދޫ، ހުޅަނގުގެ، ހަސަން ފާއިޒު (ޖޭސަން) 15 އަހަރަށް ޖަލަށް ލުމަށް ކުރިމިނަލް ކޯޓުން މިއަދު ހުކުމްކޮށްފި އެވެ.
އެ މައްސަލަ ފެންމަތިވީ 2018 ވަނަ އަހަރުގެ ޖެނުއަރީ މަހުގެ ތެރޭގަ އެވެ. އެ މައްސަލައިގެ ތަހުގީގު ނިންމާ 2018 ޖެނުއަރީގައި އެ މައްސަލައިގައި ދައުވާ ކުރަން ޕީޖީއަށް ފުލުހުން މައްސަލަ ފޮނުވި އެވެ.
ޖޭސަންގެ މައްޗަށް ތުހުމަތު ކުރެވިފައި ވަނީ، އާޓް ޕްރޮޖެކްޓެއްގެ ކަމެއްގައި މަޝްވަރާކޮށްލަން ކަމަށް ބުނެ އޭނާ ހިންގާ ސްޓޫޑިއޯއަކަށް 19 އަހަރުގެ އަންހެން އާޓިސްޓަކު ގެންދިޔުމަށް ފަހު އެތަނުގެ ތެރޭ ޖޭސަން އެ ކުއްޖާ ރޭޕްކުރި ކަމަށެވެ. އެ މައްސަލަ ސިއްރުކުރުމަށް، ފައިސާ ހުށަހެޅި ކަމަށާއި ފުލުހުހަށް ދިޔަ ނަމަވެސް "ކަމެއް ނުވާނެ ކަމަށް" ބުނެ ޖޭސަން ބިރު ދެއްކި ކަމަށް އަންހެން ކުއްޖާ އޭރު މީޑިއާތަކުގައި ބުނެފައިވެ އެވެ.
ނަމަވެސް ޖޭސަން ވެސް އޭރު ވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށް، ރުހުމުގައިވެސް އަދި ނުރުހުމުގައިވެސް އަންހެން ކުއްޖާގެ ގައިގާ އަތްލާފައި ނުވާނެ ކަމަށް މީޑިއާތަކުގައ ބުނެފަ އެވެ.
ޖޭސަން އަކީ ވިލިމާލޭ ދާއިރާގެ ކުރީގެ މެންބަރު އަހުމަދު ނިހާން ހުސެން މަނިކުގެ ކޮއްކޮ އެކެވެ. އެ މައްސަލަ ފެންމަތިވި އިރު ނިހާނަކީ، އޭރު ވެރިކަން ކުރާ ޕާޓީ ޕީޕީއެމްގެ ޕީޖީ ލީޑަރު ކަމަށް ވުމުން އެ މައްސަލަ ނުބަލާނެ ކަމަށް ބުނެ އިދިކޮޅު ފަރާތްތަކުން އޭރު ސަރުކާރަށް ފާޑުކިޔެވެ. އަދި އެ މައްސަލައަށް ބޮޑު ސަމާލުކަމެއް ވެސް ލިބުނެވެ.