04 Nov 2020, 20:09
ފަތުރުވެރިންނަށް ހިދުމަތްދޭ ބައެއް ތަންތަނުން، ކޮވިޑް19 އާ ގުޅިގެން އެކުލަވާލާފައިވާ އެސްއޯޕީ އާއި ގައިޑްލައިންތަކަށް ފުރިހަމައަށް އަމަލުނުކުރާކަމަށާއި، އުސޫލާ ހިލާފުވާނަމަ، ދޫކޮށްފައިވާ ހުއްދަ ސަސްޕެންޑުކުރަން ޖެހިދާނެކަން ޓޫރިޒަމް މިނިސްޓްރީން އަންގައިފިއެވެ.
ރާއްޖޭގެ މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތައް ހުޅުވުމުގެ ހުއްދަ ދިންފަހުން މިހާތަނަށް 49 ގެސްޓްހައުސް އަކަށް ވަނީ ހުއްދަ ދީފައެވެ.
ޓޫރިޒަމް މިނިސްޓްރީ އިން އާންމުކޮށްފައިވާ ތަފާސް ހިސާބަށް ބަލާއިރު، މިމަހުގެ އެއްވަނަ ދުވަހުގެ ނިޔަލަށް ކ. އަތޮޅާއި ނ. އަތޮޅު އަދި އއ. އަތޮޅާއި ވ. އަތޮޅުގެ އިތުރުން އައްޑޫ ސިޓީގައި ގެސްޓްހައުސް ހުޅުވުމަށް ވަނީ ހުއްދަ ދީފަ އެވެ.
ޓޫރިޒަމް މިނިސްޓްރީން މިއަދު ރާއްޖޭގެ ހުރިހާ ޓޫރިސްޓު ފެސިލިޓީތަކަށް ފޮނުވި ސާކިއުލާއެއްގައި ބުނެފައި ވަނީ ޓޫރިސްޓު ފެސިލިޓީތައް އޮޕަރޭޓުކުރުމުގެ ހުއްދަ ދީފައި ވަނީ، އެކުލަވާލާފައިވާ ގައިޑްލައިންތަކާ އެއްގޮތަށް ފުރިހަމައަށް އަމަލުކުރާ ގޮތަށް ކަމަށެވެ.
އަދި ގިނަ ތަންތަނުން އުސޫލުތަކަށް ބޯލަނބާކަން މިނިސްޓްރީން ވަނީ ފާހަގަކޮށްފައެވެ.
އެހެން ނަމަވެސް ބައެއް ތަންތަނުން އެސްއޯޕީ އާއި ގައިޑްލައިންތަކަށް ފުރިހަމައަށް ބޯނުލަނބާކަން މިނިސްޓްރީގެ ސަމާލުކަމަށް އައިސްފައިވާ ކަމަށެވެ.
އުސޫލެއްގެ ދަށުން ތަންތަން އޮޕަރޭޓުކުރުމަށް އަންގާފައި ވަނީ މުވައްޒަފުންނާއި، ފަތުރުވެރިންނާއި އަދި އާންމު ރައްޔިތުންގެ ސަލާމަތާ ރައްކާތެރިކަމަށްޓަކައި ކަން ވެސް މިނިސްޓްރީން ވަނީ ފާހަގަކޮށްފައެވެ.
އެހެންކަމުން އުސޫލުތަކާ ހިލާފުވާނަމަ، އިތުރު އިންޒާރެއް ދިނުމެއް ނެތި އެތަންތަނަށް ދޫކޮށްފައިވާ ހުއްދަ ސަސްޕެންޑުކުރަން ޖެހިދާނެ ކަމަށް މިނިސްޓްރީން ވަނީ ބުނެފައެވެ.
އަދި ހުއްދަ ސަސްޕެންޑު ކުރުމާ ގުޅިގެން ދިމާވެދާނެ އެންމެހާ ގެއްލުމަކަށް ޒިންމާ ނަގަންޖެހޭނީ އުސޫލާ ހިލާފުވި ފެސިލިޓީއަކުން ކަމަށް ވެސް މިނިސްޓްރީން ވަނީ އަންގައިފައެވެ.
ކޮވިޑް19 އާ ގުޅިގެން ހަތް މަސްވަންދެން ގެސްޓްހައުސްތައް ބަންދުކޮށްފައި އޮތުމަށް ފަހު އަލުން ގެސްޓްހައުސްތައް ހުޅުވާލުމުގެ ހުއްދަ ދެނީ، ރައްކާތެރިކަމުގެ ގޮތުން ގިނަ ފިޔަވަޅުތަކެއް އެޅުމުންނެވެ.
ގެސްޓްހައުސްތައް ހުޅުވާ ރަށްރަށުގައި ފަތުރުވެރިންނާއި އާންމުން ހިމެނޭ ގޮތުން، އެންމެން މާސްކް އެޅުން ވަނީ މަޖުބޫރުކޮށްފަ އެވެ.
ގެސްޓްހައުސް ހުޅުވުމުގެ ހުއްދަ ދެނީ ރަށުފެންވަރުގައި ފުރިހަމަކުރަންޖެހޭ ކަންތައް ފުރިހަމަކޮށް، އެރަށެއްގައި ގެސްޓްހައުސް ހިންގުމުގެ ހުއްދަ ދިނުނަށް ރަށު ކައުންސިލްގެ އިއުތިރާޒު ނެތްނަމަ އެވެ. ކޮންމެ ރަށެއްގައި ވެސް ހާއްސަ ފްލޫކްލިނިކަކާއި އައިސޮލޭޝަނަށް ހާއްސަ އެނދު ބަހައްޓަން ޖެހެ އެވެ.
ރާއްޖޭގެ 86 ރަށުގައި 10،000 އަށްވުރެ ގިނަ ގެސްޓްހައުސް އެނދު ހުރި އިރު 6000 އަށްވުރެ ގިނަ ރައްޔިތުންގެ އާމްދަނީ އާއި ވަޒީފާ ގުޅިފައި ވަނީ ގެސްޓްހައުސް ސިނާއަތަށެވެ. ރާއްޖެއަށް ޒިޔާރަތްކުރާ ފަތުރުވެރިންގެ 10 ޕަސެންޓަކީ ގެސްޓްހައުސްތަކަށް އަންނަ ފަތުރުވެރިން ކަމަށް ޓޫރިޒަމް މިނިސްޓްރީ އިން ބުންޏެވެ.
ޓޫރިޒަމް މިނިސްޓްރީ އާ ހަވާލާދީ ބައެއް މީޑިއާތަކުން ބުނީ މި މަހުގެ އެއްވަނަ ދުވަހުގެ ނިޔަލަށް 41،000 އަށް ވުރެ ގިނަ ފަތުރުވެރިން ރާއްޖެ އައިސްފައިވާ ކަމަށެވެ. އޭގެ ތެރެއިން 1،210 ފަތުރުވެރިން އައިސްފައި ވަނީ ގެސްޓްހައުސް ތަކަށެވެ. އެންމެ ގިނަ ފަތުރުވެރިން އައިސްފައި ވަނީ މާފުއްޓަށެވެ. މާފުއްޓަށް 548 ފަތުރުވެރިން ޒިޔާރަތްކޮށްފައިވާ ކަމަށް މިނިސްޓްރީ އިން ބުނެފައިވެ އެވެ.