04 Nov 2020, 13:07
ރެއާލް މެޑްރިޑްގެ ސެންޓްރަލް ޑިފެންޑަރު ސާޖިއޯ ރާމޯސް އެ ޓީމަށް 100 ލަނޑު ޖަހައިދިން މެޗުގައި އިންޓަ މިލާން ބަލިކޮށް ޗެމްޕިއަންސް ލީގުގެ ފުރަތަމަ މޮޅު ރެއާލުން ހޯދައިފި އެވެ.
ރެއާލްގެ އަމިއްލަ ދަނޑުގައި ރޭ ކުޅުނު މެޗުން އިންޓަގެ މައްޗަށް އެ ޓީމުން ކުރި ހޯދީ 2-3 ގެ ނަތީޖާއަކުންނެވެ. މި މޮޅާ އެކު ކުޅުނު ތިން މެޗުން ހޯދި ހަތަރު ޕޮއިންޓާ އެކު ރެއާލް އޮތީ ޗެމްޕިއަންސް ލީގުގެ ގުރޫޕް ބީގެ ތިންވަނައިގަ އެވެ. އެ ގުރޫޕުގައި ދެން އޮތް ޝަކްތަރު ޑޮނެސްކާއި ބުރޮޝެއާ މޮންޗެންގަލްޑްބަޝް ރޭ ކުޅުނު މެޗު 0-6 އިން މޮންޗެންގަލްޑްބަޝް ކާމިޔާބު ކުރި އިރު، އެ މެޗުން ލިބުނު މޮޅާ އެކު އެ ޓީމު ވަނީ އެއްވަނައަށް އަރައިފަ އެވެ.
ކުރީގެ ދެމެޗުން ލިބުނު އެއް ޕޮއިންޓާ އެކު ރޭ ރެއާލަށް މޮޅު ހޯދުން އޮތީ މުހިއްމު ކަމަކަށްވެފަ އެވެ. ސްޕެނިޝް ލީގުގައި ދައްކާ މޮޅު ކުޅުން ޗެމްޕިއަންސް ލީގުގައި ނުފެންނާތީ އެ ޓީމަށް ފާޑުކިޔުންތައް އަމާޒުވެފައިވާ މި ދަނޑިވަޅުގައި، ޗެމްޕިއަންސް ލީގުގެ ރަސްގެފާނު ރެއާލް ރޭގެ މެޗުން މޮޅުވީ ކިރިޔާ އެވެ.
މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެން ދިޔަ އިރު ރެއާލްގެ ކުރީގެ ކުޅުންތެރިޔާ އަޝްރަފް ހަކީމީއަށް ހެދުނު ބޮޑު ގޯހެއްގެ ފައިދާ ނަގައި ރެއާލަށް ލީޑު ނަގައިދިނީ ކަރީމް ބެންޒީމާ އެވެ. އެއަށްފަހު ފުރަތަމަ ހާފު ނިމެންދަނިކޮށް ރާމޯސް ވަނީ އިތުރު ގޯލެއް ޖަހައި ރެއާލްގެ ލީޑު ފުޅާ ކޮށްދީފަ އެވެ. މި ގޯލަކީ 2005 ވަނަ އަހަރު ރެއާލަށް ބަދަލުވި ސެންޓްރަލް ޑިފެންޑަރު އެ ޓީމަށް ޖަހައިދިނީ 100 ވަނަ ގޯލެވެ.
ރާމޯސް ގޯލު ޖެހިތާ މާގިނަ އިރުތަކެއް ނުވަނީސް އިންޓަގެ ލައުޓޯރޯ މާޓީނެޒް އެ ޓީމަށް ގޯލެއް ޖަހައިދީ ލީޑު ވަނީ ކުޑަ ކޮށްފަ އެވެ.
ދެވަނަ ހާފު ފަށައިގެން އިންޓަ މިލާނުން ކުޅުން ރަނގަޅު ކުރި އިރު، އެ ޓީމުން ވަނީ އީވާން ޕެރިސިޗްގެ ގޯލުން ނަތީޖާ ހަމަހަމަ ކޮށްފަ އެވެ. ފަހަތުން އަރައި އިންޓައިން ޖެހި ދެ ގޯލާ އެކު އެ ޓީމަށް ހިތްވަރެއް ލިބި ގިނަ ހަމަލާތަކެއް އުފެއްދި ނަމަވެސް ރެއާލުން ގޮތްދޫނުކޮށް އެ ހަމަލާތައް ވަނީ ދިފާއުކޮށްފަ އެވެ.
ނަމަވެސް ބަދަލު ކުޅުންތެރިންގެ ގޮތުގައި ކުޅެން ނުކުން ވިނިޝަސް ޖޫނިއާ ދިން ޕާހަކުން ރެއާލަށް މެޗުން ތިން ޕޮއިންޓް ކަށަވަރު ކޮށްދިނީ ޒުވާން ފޯވާޑް ރޮޑްރީގޯ އެވެ.