28 Oct 2020, 12:35
ދޯހާ (އޮކްޓޯބަރު 28): ގަތަރުގެ ވެރިރަށް ދޯހާގައި އޮންނަ ހަމަދު އިންޓަނޭޝަނަލް އެއާޕޯޓު (އެޗްއައިއޭ)އިން މި މަހުގެ ދޭއްގައި ފުރަން އޮތް 10 ފްލައިޓެއްގައި ތިބި އަންހެނުން ބަރަހަނާކޮށްގެން ފާސްކުރި މައްސަލަ ތަހުގީގު ކުރާނެކަން ގަތަރުން އިއުލާންކޮށްފި އެވެ.
ދޯހާ އެއާޕޯޓުން އަންހެން ފަސިންޖަރުން ފާސް ކުރީ އެ ދުވަހުގެ އެއާޕޯޓުގެ ފާހާނާއަކުން އަލަށް އުފަންވި ތުއްތު ކުއްޖަކު ފެނުމުން އެކުއްޖާގެ މަންމަ ހޯދުމަށް ކަމަށް އެ އެއާޕޯޓުން ބުންޏެވެ. އަދި ގަތަރުގެ ސަރުކާރުން ނެރުނު ބަޔާނެއްގައިވާ ގޮތުން އެ ކުއްޖާ އޮތީ ޕްލާސްޓިކް ކޮތަޅަކަށް އަޅާ، ކުނިބުނީގެ ތެރޭގައި ފޮރުވާފަ އެވެ.
އެހެންކަމުން ކުއްޖާ ފެނުނު ސަރަހައްދުންނާއި ފްލައިޓުތަކުން ކުއްޖާގެ ބެލެނިވެރިން ވީހާވެސް އަވަހަކަށް ހޯދުމަށް އެއާޕޯޓުން މަސައްކަތް ފެށި އެވެ.
"އެ ކުށް ކުރި މީހުން ހޯދުމަށް ވަރަށް އަވަސް އަރުވާލައިގެން ފެށި މަސައްކަތުގެ މަގުސަދަކީ އެމީހުން ފިލައިގެން ދިޔުން ހުއްޓުވުން ކަމަށްވީ ނަމަވެސް، އެ މަސައްކަތުގެ ތެރޭގައި އެއްވެސް ދަތުރުވެރިއެއްގެ އަމިއްލަ މިނިވަންކަމަށް ހުރަސް އެޅި، ނުތަނަވަސްކަމަށް މަގުފަހިވި ކަމުގައިވާ ނަމަ ގަތަރުން ހިތާމަ ކުރަން. އަދި މައްސަލަ ވަރަށް ފުރިހަމަކޮށް، ދެފުށްފެންނަ ގޮތަކަށް ތަހުގީގު ކުރަން ސަރުކާރުން އަންގައިފިން،" ގަތަރުން ބުންޏެވެ.
މީގެ އިތުރުން ގަތަރުގެ ސަރުކާރުން ވަނީ އެ ހާދިސާއާ ގުޅިގެން މާފަށް އެދި، އެ މައްސަލައިގައި ޝާމިލުވާ ގައުމުތަކާ ތަހުގީގުގެ ނަތީޖާ ހިއްސާ ކުރާނެ ކަމަށް ބުނެފަ އެވެ. އަދި އެއާޕޯޓުން ފެނުނު ކުއްޖާއަށް ދޯހާގައި ފަރުވާ ދެމުންދާ ކަމަށް ބުނެފަ އެވެ.
އެޗްއައިއޭގައި ހިނގި އެ ހާދިސާ ފެންމަތިވީ ދޯހާ އެއާޕޯޓުގައި އޮސްޓްރޭލިއާގެ އަންހެނުންތަކެއް ބަރަހަނާކޮށް ފާސް ކުރި ކަމަށް އެގައުމުގެ މީޑިއާތަކުން ރިޕޯޓު ކުރި ފަހުންނެވެ.
އޮސްޓްރޭލިއާގެ ސެވެން ނެޓްވޯކް ނިއުސް އިން ބުނި ގޮތުގައި މިމަހުގެ ދޭއްގައި ދޯހާއިން އެގައުމަށް ދާން އޮތް ފްލައިޓެއްގައި ތިބި އަންހެނުންތަކެއް ފުރަން އުޅެނިކޮށް، އެއާޕޯޓުގެ އޮފިޝަލުން ގޮސް އެ މީހުން ބޯޓުން ފޭބުމަށް އަންގާ، އެމްބިއުލާންސަކަށް އެރުވި އެވެ. އަދި އެ މީހުން ބަރަހަނާކޮށް، އެމީހުންގެ އިޒުނައާ ނުލައި ހަށިގަނޑު ބަލާ ފާސް ކުރި އެވެ.
އެ ހާދިސާގައި، ގަތަރު އެއާވޭސްގެ ފްލައިޓެއްގައި ތިބި ބަޔަކު ވެސް ބޯޓުން ބޭލި ކަމަށް ރިޕޯޓުތަކުގައިވެ އެވެ. ނަމަވެސް 10 ފްލައިޓަކުން މީހުން ބޭލުވި އިރު އޭގެ ތެރޭގައި ހިމެނެނީ ކޮން ގައުމަކަށް ނިސްބަތްވާ މީހުންކަން ގަތަރުން ހާމަ ނުކުރެ އެވެ.