07 Oct 2020, 18:15
ގޮތް ނޭނގޭ ނަންބަރުތަކުން މިސްކޯލުތަކެއް ފުލުފުލުގައި އަންނަތާ މިހާރު ދެތިން ދުވަހެއް ވެއްޖެ އެެވެ. އިރުއިރުކޮޅާ މިސްކޯލްތައް އަންނާތީ ގިނަ ބަޔަކު ކަންބޮޑުވެގެން ވެސް އެބަ އުޅެ އެވެ.
ބައެއް މީހުންނަށް ރަޝިއާގެ ނަންބަރުތަކުން ކޯލްތައް ލިބޭއިރު އަނެއްބައި މީހުންނަށް ސްވިޒަލެންޑުންވެސް ކޯލްތައް ލިބެ އެވެ. ނުވިތާކަށް މެސެޖުވެސް އެ ނަންބަރުތަކުން ލިބެ އެވެ.
"މިއީ އެންމެ ފަހުގެ އިންޒާރު، ހަމަ މިހާރު ގުޅާ މި ނަންބަރަށް،" ނުދަންނަ ރަޝިއާގެ ނަންބަރަކުން ރާއްޖޭގެ މީހަކަށް ކޮށްފައި އޮތް މެސެޖެއްގައިވެ އެވެ.
އެ މެސެޖު ލިބުމާއެކު ބައެއް މީހުން އެ ނަންބަރަށް ގުޅި އެވެ. ރަޝިއާގެ ނަންބަރަކުން އައި އެ ކޯލަށް ގުޅުމުން އިވުނީ އަރަބިން މީހަކު ވާހަކަ ދައްކާކަހަލަ އަޑެކެވެ.
މިއީ ހަގީގަތުގައި ފޭކް ސްކޭމް ކޯލްތަކެކެވެ. ދުނިޔޭގެ އެކި ކަންކޮޅުތަކުގައި މީހުން ހިންގާ ސްކޭމްތަކާ ގުޅޭ ގޮތުން މައުލޫމާތު ގެނެސްދޭ ވެބްސައިޓް "ސްކޭމްވޮޗް"ގައި ބުނެފައިވާ ގޮތުގައި މިއީ އިންޓަނޭޝަނަލް ސްކޭމަރުން ކުޅޭ ބޮޑު ގޭމެކެވެ. އެއަށް "ވަންގިރި" ސްކޭމްއޭވެސް ކިޔައި އުޅެެ އެވެ.
އެފަދަ ކޯލްތައް ރާއްޖޭގެ މީހުންނަށް ލިބޭއިރު ދުނިޔޭގެ އެހެން ގައުމުތަކުގައި ދިރިއުޅޭ މީހުންނަށް ވެސް ރާއްޖޭގެ ނަންބަރުތަކުން ވެސް އެފަދަ ކޯލްތައް ލިބެ އެވެ.
އޭގެން ނަންބަރަކުން މިސްކޯލެއް ލިބިގެން ގުޅައިފިނަމަ ކުރިން ރެކޯޑްކޮށްފައިވާ އަޑެއް ގިނަ ފަހަރު އިވެ އެވެ. ގުޅާ މީހާގެ ބޭނުމަކީ ވީހާވެސް ގިނައިރަކު އެމީހަކު އެ ކޯލުގައި ބެހެއްޓުމެވެ. އެއާއެކު ގުޅި މީހާގެ ފޯނުން ގިނަ އަދަދެއްގެ ފައިސާތައް އެއް ފަހަރާ ކެނޑިގެންދެ އެވެ.
ސަަބަބަކީ ގޮތްނޭނގޭ އެ ނަންބަރުތަކަށް ގުޅުމުން ކަނެކްޓުވަނީ އިންޓަނޭޝަނަލް ހޮޓްލައިންއަކަށް ކަމަށްވާތީ އެެވެ. އަދި އެ ހޮޓްލައިންތަކަށް ކަނެކްޓްވުމަށް ވަކި ފީއެއް ޗާޖުކުރެވިގެންދެ އެވެ. އެ ޗާޖުތައް ޕްރިމިއަމް ސާވިސްގެ ގޮތުގައި ބިލްކުރެވިފައިވެސް ހުރެ އެވެ.
އެފަދަ ކޯލެއް ލިބިއްޖެނަމަ ހަދާނީ ކިހިނެއް؟
އެންމެ ބުއްދިވެރީ ބޭރު ނަންބަރަކުން ލިބޭ އެފަދަ ގޮތް ނޭނގޭ ކޯލްތަކަށް ޖަވާބު ނުދިީ އަދި އެ ނަންބަރުތަކަށް އަލުން ގުޅުމުން ދުރުވުމެވެެ.
ހުދު ދިރާގަށްވެސް އެކަން ފާހަގަކުރެވިގެން މިހާރު ވަނީ އެފަދަ ކޯލްތަކަށް ފާރަވެރިވި އެފަދަ ކޯލްތަަކަށް ޖަވާބުނުދީ އަދި އެ ކޯލްތައް "ރިޓާން" ނުކުރެމަށް ކަސްޓަމަރުންނަށް ނަސޭހަތް ދީފަ އެވެ. އަދި އެފަދަ ކޯލެއް ކުރެވިއްޖެނަމަ އެންމެ ރަނގަޅު ގޮތަކީ ދިރާގު ނުވަތަ އުރީދޫގެ ސަމާލުކަމަށް އެކަން ގެނައުމެވެ.
އެކަން އާންމު އެހެން މީހުންގެ ސަމާލުކަމަށް ގެނައުން ވެސް އެއީ ފަރުދީ ގޮތުން އަދާކުރެވިދާނެ ޒިންމާ އެކެވެ. ފަހަރެއްގައި އާއިލާގެ މެންބަރަކަށް ނުވަތަ ރައްޓެއް ސަކަށް ވެސް އެފަދަ ކޯލްތައް ލިބުން ގާތެެވެ.
އެފަދަ ކޯލްތައް ކޮށްގެން ބިލަށް އަރާ އަދަދު އިނގިރޭސިވިލާތުގައި މުވާސަލާތީ ހިދުމަތްދޭ ވޮޑެފޯންއިން ރިފަންޑްވެސްކޮށްދެ އެވެ. އެކަމަކު ރާއްޖޭގައި އަދި އެކަހަލަ ގޮތެއް ނެތެވެ. އެހެން ވީމާ އޮތް ގޮތަކީ އަމިއްލައަށް ހޭލުންތެރިވެ، އެފަދަ ކޯލްތަކާއި މެސެޖްތަކަށް އަޅާނުލުމެވެ.