05 Oct 2020, 13:18
ދުނިޔޭގެ އެންމެ ފައިދާ ބޮޑު އެނަޖީ ޑްރިންކް ކުންފުނި ކަމަށްވާ ރެޑްބުލް ކުންފުނީގެ އޯނަރުގެ ދަރިފުޅު ވޯރަޔުތު ޔޫވިދްޔާ ހޯދަން އިންޓަނޭޝަނަލް ކްރިމިނަލް ޕޮލިސް އޮގަނައިޒޭޝަން (އިންޓަޕޯލް) އިން "ރެޑް ނޯޓިސް" އެއް ނެރެފި އެވެ.
ބައިނަލް އަގުވާމީގޮތުން ލޭބަލް ކުރާ ކުށްވެރިން ހޯދުމަށް ނެރޭ ރެޑް ނޯޓިސްއެއް ރެޑްބުލް ކުންފުނީގެ ވާރުތަވެރިޔާ ވޯރަޔުތު ހޯދަން ނެރެފައި ވަނީ 2012 ވަނަ އަހަރު އޭނާ ދުއްވި "ލަގްޒަރީ ކާރު" ތައިލެންޑުގެ ފުލުހެއް ގައިގައި ޖައްސާ މަރާލި މައްސަލައިގަ އެވެ. ގިނަ އަހަރުތަކެއް ވަންދެން ގޮތެއް ނުނިމި އޮތް މި މައްސަލަ ކުރިއަށް ނުގެންދެވި އޮތީ މީގެ އަހަރުތަކެއް ކުރިން ވޯރަޔުތު އޭނަގެ ޕްރައިވެޓް ޖެޓުގައި ތައިލެންޑުން ފިލުމުންނެވެ.
ވޯރަޔުތު ނުވަތަ "ބޮސް"ގެ ނަމުން މަޝްހޫރުވެފައިވާ ބިލިއަނަރަކީ މުޅި ތައިލެންޑުގެ ވެސް އެންމެ ނުފޫޒު ގަދަ އެކަކެވެ. އޭނާގެ މައްޗަށް ސާބިތުވެފައިވާ ކުށްތަކުގެ ތެރޭގައި ގަސްތުގައި މީހަކު މެރުމާއި، ޑްރަގު ބޭނުންކުރުމުގެ ދައުވާ ވެސް އުފުލާފައިވާ އިރު ފުލުސް މީހާ ގައިގައި ކާރުން ޖައްސާ މަރާލި މައްސަލަ މިދިޔަ ޖުލައި މަހުގެ ތެރޭގައި ވަނީ ކޯޓުގައި ވޯރަޔުތާ އެއްކޮޅަށް ނިންމައިފަ އެވެ.
އެހެން ނަމަވެސް އެ ހުކުމާ ގުޅިގެން ގިނަ ބަޔަކު މުޒާހަރާކޮށް ތައިލެންޑުގެ ރައްޔިތުންގެ ކަންބޮޑުވުމާ އެކު އެ މައްސަލަ އަލުން ބެލުމަށް އެޓާނީ ޖެނަރަލު އޮފީހުން ވަނީ ނިންމާފަ އެވެ.
އެހެން ނަމަވެސް 2017 ވަނަ އަހަރު ޕްރައިވެޓް ޖެޓެއްގައި ވޯރަޔުތު ތައިލެންޑުން ފިލުމާ ގުޅިގެން އޭނަގެ މައްސަލަ ކުރިއަށް ނުގެންދެވޭތީ އޭނާ ހޯދުމަށް އެގައުމުގެ ސަރުކާރުން ވަނީ އިންޓަޕޯލްގެ އެހީއަށް އެދިފަ އެވެ. އަދި އިއްޔެގެ ވަގުތެއްގައި އޭނާ ހޯދަން އިންޓަޕޯލުން ވަނީ އެ އިދާރައިގެ އެންމެ މަތީ ދަރަޖައިގެ ނޯޓިސް "ރެޑް ނޯޓިސް" ނެރެފަ އެވެ.
"އިންޓަޕޯލްގެ ނިންމުމާ އެކު އޭނާ [ވޯރަޔުތު ޔޫވިދްޔާ] ހޯދުމުގައި އެހީތެރިކަން ފޯރުކޮށްދިނުމަށް އެދި އިންޓަ ޕޯލުގެ މެމްބަރު 194 ގައުމެއްގެ ކިބައިން އެދުމަށް މިހާރު ތައްޔާރުވަނީ." ތައިލެންޑުގެ ފުލުހުންގެ އިދާރައިގެ ސްޕޯކްޕާސަން ކޮލޮނެލް ކިސާނާ ޕައްޓަނަޗަރޮއެން ވިދާޅުވެފައިވެ އެވެ.
ރެޑްބުލް ކުންފުނީގެ ވެރިންނަކީ ތައިލެންޑުގެ ދެވަނައަށް އެންމެ މުއްސަނދި އާއިލާ އެވެ. ފޯބްސް އިން އެންމެ ފަހުން ހާމަކުރި ތަފާސް ހިސާބުތައް ދައްކާ ގޮތުން ރެޑްބުލްގެ ކޯ ފައުންޑަރު ޗަލެއޯ ޔޫވިދްޔާގެ މިލްކިއްޔާތުގައި ގައިގަނޑަކަށް 20.2 ބިލިއަން ޑޮލަރު ހުންނާނެ އެވެ.