10 Sep 2020, 15:46
ވޮޝިންޓަން (ސެޕްޓެމްބަރު 10): އެމެރިކާގެ ގައުމީ ސަލާމަތަށް ނުރައްކަލެއްގެ ގޮތުގައި އެގައުމުން ދެކޭ ޗައިނާގެ 1،000 ދަރިވަރެއްގެ ސްޓޫޑެންޓް ވިސާ ބާތިލުކޮށްފި އެވެ.
އެމެރިކާގެ ޑިޕާޓްމެންޓް އޮފް ހޯމްލޭންޑް ސެކިއުރިޓީގައި އިސްކޮށް ހުންނަވާ ޗެޑް ވުލްފް ވިދާޅުވި ގޮތުގައި އެގައުމުން ވިސާ ބާތިލު ކުރަނީ "ޗައިނާގެ އަސްކަރިއްޔާއާ ގުޅުން ހުރި އެގައުމުގެ ދަރިވަރުންނާއި އެމެރިކާގައި ރިސާޗު ހަދާ އެގައުމުގެ ބައެއް ރައްޔިތުންގެ" އެވެ. އަދި ޗައިނާއިން ހަމަހަމަ ކަމެއް ނެތް ވިޔަފާރީގެ އުސޫލުތައް ގެންގުޅޭ ކަމަށާއި އެގައުމުން ޖާސޫސުކޮށް، އެމެރިކާގެ ކޮރޯނާވައިރަސް ދިރާސާތައް ވަގަށް ނަގަން މަސައްކަތް ކުރާ ކަމަށް ތުހުމަތު ކުރައްވާފަ އެވެ.
މީގެ އިތުރުން އެމެރިކާގައި ކިޔަވާ ޗައިނާގެ ބައެއް ދަރިވަރުން ސްޓޫޑެންޓް ވިސާގެ ބޭނުން ނަހަމަ ގޮތުގައި ހިފާ ކަމަށް ވުލްފް ވިދާޅުވި އެވެ.
އެމެރިކާއިން އެ ފިޔަވަޅު އެޅީ، ޗައިނާގެ އަސްކަރިއްޔާއާ އެކު މަސައްކަތް ކުރާ ނުވަތަ ޕީޕަލްސް ލިބަރޭޝަން އާމީ (ޕީއެލްއޭ)އަށް ތާއިދު ކުރާ ޗައިނާގެ ބައެއް ރައްޔިތުން ސްޓޫޑެންޓް ވިސާގައި އެގައުމަށް ވަނުން މަނާ ކުރާނެ ކަމަށް މިދިޔަ މެއި މަހު ރައީސް ޑޮނަލްޑް ޓްރަމްޕް ވިދާޅުވި ފަހުންނެވެ.
ޓްރަމްޕް އެ އިއުލާން ކުރެއްވީ އެކި ސަބަބުތަކާ ހެދި އެމެރިކާ އާއި ޗައިނާގެ ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. އެ ސަބަބުތަކުގެ ތެރޭގައި ދެ ގައުމުގެ މެދުގައި އޮތް ވިޔަފާރީގެ ހަނގުރާމަ އާއި ކޮރޯނާވައިރަސް ބަލިމަޑުކަމާއި ޗައިނާއިން ހޮންކޮންގް އާއި އެގައުމުގައި މުސްލިމުން ދިރިއުޅޭ ޝިންޖިއަންގުގައި އަމަލު ކުރަމުންދާ ގޮތްތަކަށް އެމެރިކާއިން ފާޑު ކިޔުން ހިމެނެ އެވެ.