10 Sep 2020, 08:10
ކޮވިޑް19 ޖެހުމަށްފަހު ބަލިން ރަނގަޅުވާ މީހުންނަށް، ބަލީގެ ދުވަސްވަރު ދިމާވާ ކަންތައް ބައެއް ފަހަރު ދިގުދެމިގެންދާ ކަމަށް ޑރ. މޫސާ މުރާދު ވިދާޅުވެއްޖެ އެވެ.
ރޭ އެޗްއީއޯސީ އިން ބޭއްވި ނޫސްވެރިންގެ ބައްދަލުވުމުގައި ޑރ. މުރާދު ވިދާޅުވީ ބައްޔާ ގުޅޭ ގިނަ ދިރާސާތައް ހެދެމުންދާ ކަމަށާއި ކުރިން ނޭނގޭ ގިނަ މައުލޫމާތުތަައް މިހާރު އެނގެމުންދާ ކަމަށެވެ.
"ބަލިން ރަނގަޅުވުމަށްފަހު ދެން ދިމާވާ މައްސަލަތަކަކީ ކޮބައިތޯ، ނުވަތަ ބަލިން ރަނގަޅުވުމަށްފަހު ވެސް ބަލީގައި އެ ދިމާވި އަލަމާތްތައް ދިގުދެމިގެން ހިނގައިދާނެތޯ؟ އެގޮތުން ފާހަގަކޮށްލަން ޖެހެނީ ބަލީގެ ދުވަސްވަރު އެ ދިމާވާ އަލާމާތްތައް، ބަލިން ރަނގަޅުވި ނަަމަވެސް ތަންކޮޅެއް ގިނަ ދުވަހަށް ދިގުދެމިގެން އެބަދޭ. ބައެއް ތަންތަނުގައި މީގެ ސްޓަޑީތައް ހަދާފައިވެސް އެބަހުރި،" ޑރ. މުރާދު ވިދާޅުވި އެވެ.
އޭނާ ވިދާޅުވީ ކޮވިޑް19 ގެ ބަލިމީހުންގެ ފުށުން ފެންނަ އަލާމާތްތަކުގެ ތެރެއިން ވަރުބަލިވުމަކީ ގިނަ ދުވަހަށް ދެމިގެންދާ އަލަމާތެއްގެ ގޮތުގައި ފާހަގަ ވެފައިވާ ކަމަށެވެ.
"އޭގެ އިތުރަށް ބަލިން ރަނގަޅުވިޔަސް ބައެއް މީހުންނަށް ނޭވާލާން އުނދަގޫވުމުގެ އަލަމާތްވެސް އެބަދިމާވޭ. އޭގެ އިތުރަށް މޭގައި ރިއްސުން، ގައިގައި ރިއްސުން ހުޅު ހުޅުގައި ރިއްސުން ފަދަ އަލާމާތްތައްވެސް ކޮންމެސް ޕަސެންޓެއްގެ މީހުންނަށް އެބަ ދިމާވޭ ބަލިން ރަނގަޅުވިޔަސް،" ޑރ. ވިދާޅުވި އެވެ.
މީގެ އިތުރުން ވަސް ނުދުވުން، ރަހަ ނުލުން ފަދަ އަލަމާތްތައްވެސް ބައެއް ފަހަރު ދިގު ދެމިގެންދާ ކަމަށް ޑރ މުރާދު ވިދާޅުވި އެވެ.
"ރާއްޖޭގައިވެސް އަޅުގަނޑުމެންނަށް ދައްކަން އަންނަ ޕޭޝަންޓުންގެ ތެރެއިން އެންމެ ބޮޑަށް ފާހަގަ ކުރެވެނީ ވަރުބަލިކަމާ، ތަންތަނުގައި ރިއްސުމާ އައްސިވުމާ ކާހިތްނުވުން ފަދަ އަލަމާތްތައް ތަންކޮޅެއް ގިނަ ދުވަހަށް ދިގުދެމިގެން އެބަދާކަމަށް ބައެއް ބަލިމީހުންގެ. އެމީހުން ކޮވިޑުން ރަނގަޅުވިޔަސް،" ޑރ. ވިދާޅުވިއެވެ.
ޑރ. މުރާދު ވިދާޅުވީ ކޮވިޑުން ރަނގަޅުވާ މީހުންނަށް ދިގުމުއްދަތަކަށް ދިމާވެދާނެ ސިއްހީ މައްސަލަތައް އަދި ސާފުކޮށް ދެނެގަނެވިފައި ނުވާ ކަމަށެވެ.
"އެހެންނަމަވެސް ހިތުގެ މައްސަލަތައް ފަދަ މައްސަލަތައް ދިމާވާކަމަށް ކޮންމެވެސް ވަރަކަށް ރިޕޯޓުތައް ލިބިފައި އެބަހުރޭ. އެހެންވީމާ މިކަހަލަ މައުލޫމާތުތައް މުޅިން ކަށަވަރު ކުރުމަށް ތަންކޮޅެއް ގިނަ ދުވަސް ނަގާނެ ބަލީގައި މިވީ މުއްދަތަށް ބަލާފައި،" ޑރ މުރާދު ވިދާޅުވި އެވެ.