07 Sep 2020, 23:24
ނުވަ އަހަރަށް ފަހު މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ އެކްސްކޯ މެމްބަރުން އިންތިހާބުކޮށް އަލުން މަސައްކަތް ފެށުމުން، އިންޓަނޭޝަނަލް ފެޑަރޭޝަން އޮފް ޖާނަލިސްޓްސް (އައިއެފްޖޭ) އާއި ރިޕޯޓާސް ވިތައުޓް ބޯޑާސް (އާރްއެސްއެފް) އިން މަރުހަބާ ކިޔައިފި އެވެ.
އައިއެފްޖޭގެ އޭޝިއާ ސަރަހައްދުގެ ޑިރެކްޓަރު ޖޭން ވާތިންގޓަން، އެމްޖޭއޭގެ ރައީސް މުހައްމަދު ހަމްދޫނަށް މިއަދު ފޮނުއްވި ސިޓީއެއްގައި ވިދާޅުވެފައި ވަނީ އެމްޖޭއޭގެ މަސައްކަތް އަލުން ފެށިގެން ދިއުމަކީ ރާއްޖޭގައި މީޑިއާގެ ހައްގުތަކާ ގުޅޭގޮތުން ހޯދުނު މުހިންމު ކާމިޔާބެއް ކަމަށެވެ.
އެމްޖޭއޭއަކީ 2009 ވަނަ އަހަރު އުފަންވި ޖަމިއްޔާއެކެވެ. އެ ޖަމިއްޔާއިން ވަނީ ދިވެހި ނޫސްވެރިކަމަށް ދިމާވި އެތަކެއް ގޮންޖެހުމަކަށް މީގެ ކުރިން އެޑްރެސްކޮށް އަޑުއުފުލާ އެކަމުގައި ގިނަ ކާމިޔާބީތަކެއްވެސް ހާސިލު ކޮށްފަ އެވެ. އަދި ދިވެހި ނޫސްވެރިންނަށް ތަމްރީނާއި، ކިޔެވުމުގެ ގިނަ ފުރުސަތުތަކެއް ވެސް ވަނީ ހޯދައިދީފަ އެވެ.
އެކަން ފާހަގަކޮށް، ޖޭން ވާތިންގޓަން ވިދާޅުވީ އަލަށް އިންތިހާބުވި އެކްސްކޯ މެމްބަރުންނާ އެކު "ނޫސްވެރިންގެ އަޑު"ގެ ގޮތުގައި ހިދުމަތް ކުރުމުގެ އިތުރުން ހިތްވަރެއް ލިބި، މުޖުތަމައުގެ ކުރިއެރުމަށް މަސައްކަތް ކުރުމުގައި ކުރިއަށްދާނެ ކަމަށް އުންމީދު ކުރައްވާ ކަމަށެވެ. އަދި ނޫސްވެރިންގެ ހައްގުގައި ހިތްވަރާއެކު މަސައްކަތް ކުރާނެ ޖަމިއްޔާއެއް ބިނާކުރުމަށް އެމްޖޭއޭ އިން ކުރާ މަސައްކަތުގައި އައިއެފްޖޭގެ ފުރިހަމަ އެއްބާރުލުން ލިބޭނެކަމަށް ވެސް ސިޓީގައި ވިދާޅުވެފައިވެ އެވެ.
އެމްޖޭއޭ އަކީ މީގެ ކުރިން އައިއެފްޖޭގެ މެމްބަރެކެވެ. އެހެން ނަމަވެސް، އެމްޖޭއޭ ނުހިނގާ އޮންނަތާ ގިނަ ދުވަސްތަކެއް ވުމަށް ފަހު، އަލުން މަސައްކަތް ފަށައިގަތުމުން އައިއެފްޖޭއޭގެ މެންބަރަކަށް ވުމަށް އެމްޖޭއޭއަށް ރަސްމީކޮށް ދައުވަތު ދޭ ކަމަށް ވެސް އެ ސިޓީގައި އޭނާ ވިދާޅުވެފައިވެ އެވެ.
އައިއެފްޖޭގެ އިތުރުން، ރިޕޯޓާސް ވިތައުޓް ބޯޑާޒް (އާރްއެސްއެފް) އިން ވެސް ވަނީ އެމްޖޭއޭއަށް މަރުހަބާ ކިޔައިފަ އެވެ. އާރްއެސްއެފް އިން ކުރި ޓުވީޓެއްގައި ބުނީ ނޫސްވެރިކަމުގެ މިނިވަންކަމަށް ކުރާ މަސައްކަތަކީ ދުވަހަކުވެސް ނިމުމެއް ނެތް ހަނގުރާމައަކަށް ވާއިރު، އެމްޖޭއޭ ފަދަ ބައިވެރިޔަކު އިތުރުވުމަކީ އުފަލެއް ކަމަށެވެ.
އެންމެ ފަހުން އެމްޖޭއޭގެ އެކްސްކޯއަށް މެމްބަރުން އިންތިހާބުކޮށް އެ ޖަމިއްޔާ ހިންގީ މީގެ ނުވަ އަަހަރު ކުރިން 2011 ވަނަ އަހަރު އެވެ. އަދި 2014 ވަނަ އަހަރުވެސް އެމްޖޭއޭގެ އިންތިހާބު ބޭއްވި ނަމަވެސް، އަހަރީ އާންމު ޖަލްސާގައި ހިނގި ހަމަނުޖެހުންތަކަށް ފަހު ޖަމިއްޔާގެ ހިންގުން ހުއްޓުމަކަށް އައެވެ.
ނޫސްވެރިންގެ ހިތްހަމަނުޖެހުންތަކާ ހެދި ހަމަނުޖެހުން ބޮޑުވެ 2014 ވަނަ އަހަރުން ފެށިގެން އެމްޖޭއޭގެ ހިންގާ ކޮމިޓީއެއް އިންތިހާބު ނުކުރެވި، އެ ޖަމިއްޔާގެ ހަރަކާތްތައް ހުއްޓިފައި އޮއްވާ ޖަމިއްޔާތަކުގެ ބެލެނިވެރި ފަރާތް ޔޫތު މިނިސްޓްރީއިން ވަނީ މި މަހުގެ 13ގެ ކުރިން ޖަމިއްޔާގެ އާ ހިންގާ ކޮމިޓީއެއް އިންތިހާބުކޮށް އެކަން އެންގުމަށް ފުރުސަތު ދީފަ އެވެ.
އެ އެންގުމާއެކު މި މަހުގެ ފަސް ވަނަ ދުވަހު އެމްޖޭއޭއިން ހާއްސަގޮތުން ކުރާ އާންމު ޖަލްސާއެއް އޮންލައިންކޮށް ބާއްވައި، އެކްސްކޯއަށް ވަނީ މެންބަރުން އިންތިހާބުކޮށްފަ އެވެ. އެ ބައްދަލުވުމުގައި 130 މެންބަރަކު ބައިވެރިވި އެވެ.