06 Sep 2020, 08:06
ޒުވާން އެކްޓަރު ސުޝާންތު ސިންހް ރާޖްޕުތު މަރުވިއިރު އެގޭގައި މަސައްކަތްކުރި ހައުސް ކީޕާ ދިޕޭޝް ސާވަންތު ހައްޔަރުކޮށްފި އެވެ.
ރޭގެ ވަގުތެއްގައި ދިޕޭޝް ހައްޔަރުކުރީ އިންޑިއާގެ ނާކޮޓިކްސް ކޮންޓްރޯލް ބިއުރޯ (އެންސީބީ) އިންނެވެ. ސުޝާންތުގެ މަރުގެ ތަހުގީގުގެ ދަށުން އޭނާ ހައްޔަރުކުރިއިރު ހުކުރު ދުވަހު ވަނީ ރިއާ ޗަކްރަބޯޓީގެ ކޮއްކޮ ޝޮވިކް ޗަކްރަބޯޓީ އާއި ސުޝާންތުގެ ހައުސް ކީޕިން މެނޭޖަރު ސެމިއުލް މިރަންޑާ ވެސް ހައްޔަރުކޮށްފަ އެވެ. އަދި ކޯޓުން އެދެމީހުންނަށް ވަނީ ހަތަރު ދުވަހުގެ ބަންދެއް ދީފަ އެވެ.
ދިޕޭޝް ހައްޔަރުކުރި އިރު ވޭތުވެދިޔަ ދުވަސްތަކުގައި އެންސީބީގެ ތަހުގީގަށް އެކި ފަހަރު އެކި ގޮތަށް އޭނާ ވަނީ ޖަވާބުދާރީވެފަ އެވެ. ސުޝާންތުގެ މަރާ އެކު ޑުރަގުގެ ވާހަކަތައް ދެކެވެމުން އަންނައިރު ދިޕޭޝް ވެސް ޑުރަގުގެ ކަންތައްތަކުގައި ރިއާ އާއި އޭނާގެ ކޮއްކޮގެ އިތުރުން ސެމިއުލް އާ ބައިވެރިވިކަމަށް ހެކިތައް ވަނީ ލިބިފަ އެވެ. އަދި އޭނާގެ ޗެޓު ލޮގްތައް ވެސް މިހާރު ވަނީ އާންމުވެފަ އެވެ. އޭނާ ހައްޔަރުކުރި އިރު މީގެ ކުރިން ދިޕޭޝް ވަނީ ސުޝާންތުގެ އިލެކްޓްރޯނިކް ހުރިހާ ޑިވައިސްތަކެއްގެ ޑާޓާ ފޮހެލަން އައިޓީ ޕްރޮފެޝަނުންތަކެއް އެގެއަށް އައިސް އެ ޑާޓާތައް ފޮހެލާފައިވާ ކަމަށް އެއްބަސްވެފަ އެވެ.
ސީބީއައިއިން އެންމެ ފަހުގެ ޚަބަރުތަކަށް ބަލާއިރު އިއްޔެ ސީބީއައިގެ ޓީމުން ވަނީ ސުޝާންތުގެ ދައްތަ މީތޫ ސިންހް އާ އެކު، ސުޝާންތު މަރުވި އިރު ދިރިއުޅުނު ގެއަށް ގޮސްފަ އެވެ. އަދި މީތޫ ސިންހް، ސުޝާންތުގެ ރަހުމަތްތެރިޔާ ސްމިތާ ޕާރިކްގެ އިތުރުން ސުޝާންތުގެ ރަހުމަތްތެރިޔާ މަހޭޝް ޝެޓީ އާ ސީބީއައި އިން ވަނީ ސުވާލުކޮށްފަ އެވެ. ހަމައެއާ އެކު ސަންދީޕް ސިންހް އާ ވެސް ސީބީއައި އިން އިއްޔެ ވަނީ ސުވާލުކޮށްފަ އެވެ.