28 Aug 2020, 09:35
އެމެރިކާގެ މަޝްހޫރު ލަވަކިޔުންތެރިޔާ ކޭޓީ ޕެރީ ވިހައިފި އެވެ.
އިއްޔެގެ ވަގުތެއްގައި ކޭޓީ އޭނާގެ އަލަތު ދަރިފުޅު ވިހޭއިރު އެ ދަރިފުޅުގެ މޫނު ނުފެންނަ ގޮތަށް ފޮޓޯއެއް ނެގުމަށްފަހު ވަނީ އިންސްޓަގްރާމްކޮށްފަ އެވެ. އެ ދަރިފުޅަށް އޭނާ ދީފައިވާ ނަމަކީ، ޑެއިޒީ ޑަވް ބްލޫމް އެވެ.
ކޭޓީ އާއި އޭނާގެ ލޯބިވެރިޔާ އަދި ފިލްމީ ތަރި އޯލަންޑޯ ބްލޫމް ވެސް ވަނީ ދަރިފުޅާއެކު ނަގާފައިވާ ފޮޓޯ އިންސްޓަގްރާމް ކޮށްފަ އެވެ. އެއާއެކު ދެތަރިންގެ ފޭނުން އަންނަނީ ދެތަރިންނަށް މަރުހަބާ ކިޔަމުންނެވެ.
ކޭޓީ ޕެރީ އާއި އޭނާގެ ލޯބިވެރިޔާ އޯލަންޑޯ ބްލޫމް އެންގޭޖްވީ މިދިޔަ އަހަރުގެ ލޯބިވެރިންގެ ދުވަހު އެވެ.
އުމުރުން 35 އަހަރުގެ ލަވަކިޔުންތެރިޔާ ކޭޓީ ޕެރީ އާއި އޭނާގެ ލޯބިވެރިޔާ އޯލަންޑޯ ބްލޫމް 43، ލޯބީގެ ގޮތުން ގުޅުނީ 2016 ވަނަ އަހަރު އެވެ. ނަމަވެސް އޭގެ އަނެއް އަހަރު ރުޅިވި ނަމަވެސް ރުޅިވިތާ 10 މަސްތެރޭ ދެތަރިން ވަނީ އަލުން ގުޅިފަ އެވެ.
ކޭޓީ ކުރިން އިނދެގެން އުޅުނީ ކޮމީޑިއަން ރުސެލް ބްރޭންޑް އާ އެވެ. އެދެމީހުން ކައިވެނިކުރީ 2010 ވަނަ އަހަރު އެވެ. އަދި ކައިވެނި ރޫޅުނީ 2012 ވަނަ އަހަރު އެވެ. އޯލަންޑް ކުރިން މިރަންޑާއާ އިން އިރު އެދެމީހުންނަށް ވަނީ 2011 ވަނަ އަހަރު ފިރިހެން ދަރިއަކުވެސް ލިބިފަ އެވެ. އެދެމީހުންގެ ކައިވެނި ރޫޅުނީ 2013 ވަނަ އަހަރު އެވެ.