26 Aug 2020, 07:18
ކޭޕް ޓައުން/ އަލްޖަޒީރާ (އޮގަސްޓު 26): ދެކުނު އެފްރިކާގެ ޑާބަން ސިޓީގައި 139 އަހަރުވީ މިސްކިތެއް ހުރި އިމާރާތުގައި މިދިޔަ ހޯމަ ދުވަހު ރޯވި ހާދިސާގައި މިސްކިތަށް ގެއްލުން ނުލިބޭ ކަމަށް އެސިޓީގެ ފަޔާ ޑިޕާޓްމެންޓުން ބުނެފި އެވެ.
ޑާބަންގެ ފަޔާ ޑިޕާޓްމެންޓުން ބުނި ގޮތުގައި އަލިފާން ރޯވީ ޖުމްޢަ މަސްޖިދުގެ އިތުރުން ފިހާރަތަކާއި މީހުން ދިރިއުޅޭ ފްލެޓުތަކެއް ހުރި އިމާރާތެއްގަ އެވެ. އަދި އެ ހާދިސާގައި ގެއްލުން ލިބުނީ އެ އިމާރާތުގައި ހަދާފައި ހުރި 14 ފްލެޓަކަށެވެ.
ނަމަވެސް އެ ހާދިސާގައި އެއްވެސް މީހަކު މަރުވެ، އަނިޔާ ވެސް ވެފައި ނުވާ ކަމަށް ޖުމްޢަ މަސްޖިދު ޓްރަސްޓް މަދަރުސާގެ ޗެއާޕަސަން އަހުމަދު މުހައްމަދު ވިދާޅުވި އެވެ. އަދި އެ ހާދިސާ ހިނގީ، ކޮރޯނާވައިރަހާ ގުޅިގެން އެ މިސްކިތުގައި ޖަމާއަތުގައި ނަމާދު ކުރުން މިދިޔަ މާޗް މަހުން ފެށިގެން ވަނީ ވަނހުއްޓާލާފައި ވަނިކޮށެވެ.
އެ އިމާރާތުގައި ރޯވި އަލިފާންގަނޑު ފަޔާފައިޓަރުން ދެ ގަޑި އިރު ތެރޭ ކޮންޓްރޯލް ކުރި އެވެ. އަދި އަލިފާން ރޯވާން މެދުވެރިވި ސަބަބު މިހާރު ދަނީ ތަހުގީގު ކުރަމުންނެވެ.
ދެކުނު އެފްރިކާގެ މުސްލިމް ނެޓްވޯކްގެ ޗެއާމަން ފައިސަލް ސުލިމާން ވިދާޅުވި ގޮތުގައި އިމާރާތުގައި ރޯކޮށްފައި ވަނީ ގަސްތުގައި ކަމަށް ނުބެލެވެ އެވެ.
ގްރޭ ސްޓްރީޓް މޮސްކްގެ ނަމުން މަޝްހޫރުވެފައިވާ އެ މިސްކިތް ބިނާ ކުރީ 1881ގަ އެވެ. އަދި އެ މިސްކިތުގައި އެއް ފަހަރާ 7،000 މީހުންނަށް ތިބެވެ އެވެ.