26 Aug 2020, 08:30
ސްޓާޕްލަސް އިން ދައްކަމުން އަންނަ މަގްބޫލު ހިންދީ ޑްރާމާ ސިލްސިލާ "ޔޭ ރިޝްތާ ކިޔާ ކެހެލާތާ ހޭ"ގެ ބައެއް ތަރިންނާ ކްރޫ މެންބަރުން ކޮވިޑަށް ޕޮޒިޓިވްވެއްޖެ އެވެ.
ކޮވިޑް އަށް ޕޮޒިޓިވްވީ ޑްރާމާގެ ތިން އެކްޓަރުންނާއި ހަތަރު ކްރޫ މެންބަރުންނެވެ. ޑްރާމާގައި ގޮއެންކާ އާއިލާއަށް ނިސްބަތްވާ ތިން އެކްޓަރުން ކޮވިޑަށް ޕޮޒިޓިވްވި އިރު އޭގެ ތެރެއިން އެކަކަކީ ސައްޗިން ތިޔާގީ އެވެ. އެއީ ޑްރާމާގައި މަނީޝް ގޮއެންކާގެ ރޯލު ކުޅޭ އެކްޓަރެވެ. ކޮވިޑަށް ޕޮޒިޓިވްވި އަނެއް ދެތަރިންނަކީ ސާމިރު އޯންކަރު އާއި ޝްވާތީ ޗިޓްނީސް އެވެ. ސާމިރު އަކީ ޑްރާމާގައި ގަޔޫގެ ފިރިމީހާގެ ރޯލު ކުޅޭ ތަރިއެވެ. ޝްވާތީ ކުޅެނީ ސުހާސިނީ ގޮއެންކާގެ ރޯލެވެ.
ކޮވިޑަށް ޕޮޒިޓިވްވި ހުރިހާ މީހުން ވެސް މިހާރު ހޯމް ކަރަންޓީނުގައި ތިބިއިރު އެއިން އެއްވެސް މީހެއްގެ ހާލު ސީރިއަސް އެއްނޫނެވެ. އަދި މި މީހުންގެ ކިބައިން މާބޮޑެތި އަލާމާތްތަކެއް ވެސް ފެނިފައިނުވާ ކަމަށް ޚަބަރުތައް ބުނެ އެވެ. ޓީމުގެ މެންބަރަކު ޕޮޒިޓިވްވުމާ އެކު ބާކީ ތިބި އެންމެން ވެސް ލަސްނުކޮށް އަވަހަށް ޓެސްޓްކުރި ކަމަށާއި ބައެއް ތަރިންގެ ނަތީޖާ ނެގަޓިވްކަމަށް ދެއްކި އިރު އަނެއް ބައި ތަރިންގެ ނަތީޖާ ދެއްކީ ޕޮޒިޓިވްކޮށް ކަމަށް ޓީމުގެ މެންބަރަކު ބުނެފައިވެ އެވެ.