24 Aug 2020, 23:27
ކޮވިޑް19 އާއި ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކާ ގުޅިގެން އިއްޔެގެ އިރުއޮއްސި ހަޔަކުން މިއަދުގެ އެ ވަގުތާއި ހަމައަށް 105 މީހަކު ޖޫރިމަނާކޮށްފިއެވެ.
އެޗްއީއޯސީ އިން މިރޭ އާންމުކުރި ތަފާސް ހިސާބުތަކަށް ބަލާއިރު މީގެ ތެރޭ ހިމެނެނީ ފޭސްމާސްކު ނާޅާ އުޅުނު 50 މީހަކާއި، ކާފިއު ވަގުތު ބޭރުގައި އުޅުނު 55 މީހެކެވެ.
މީގެެ އިތުރުން މި ވަގުތުތަކުގައި، ފޭސް މާސްކު ނާޅާ އުޅުނު 57 މީހަކަށް އަދި ބޭރުގައި އުޅުނު 80 މީހަކަށް ވަނީ ނަސޭހަތް ދީފައެވެ.
ކޮވިޑް19 އާއި ގުޅިގެން އަޅާފައިވާ ރައްކާތެރިކަމުގެ ފިޔަވަޅެއްގެ ގޮތުން މާލެ ސަރަހައްދުގައި ބޭރުގައި އުޅޭއިރު މާސްކު އެޅުން މަޖުބޫރެވެ. މާސްކު ނާޅާ އުޅޭނަމަ ފުރަތަމަ ފަހަރު ނަސޭހަތްދީ، އެކަން ތަކުރާރު ކުރާނަމަ 1000 ރުފިޔާ އިން ޖޫރިމަނާ ކުރެއެވެ.
މީގެ އިތުރުން ރޭގަނޑު 10 އިން ފަތިހު ފަހަކަށް ބޭރުގައި އުޅުން މަނާކޮށް މިވަގުތުތަކުގައި ބޭރުގައި އުޅޭ މީހުންނަށް ނަސޭހަތްދީ، ތަކުރާރު ކުރާނަމަ 1000 ރުފިޔާ އިން ޖޫރިމަނާ ކުރެއެވެ.
ރެއިން ފެށިގެން ރޭގަނޑު އަށަކުން ފަތިހު ފަހަކަށް މާލެ ސަރަހައްދުގައި އެއްގަމު އުޅަނދު ދުއްވުންވެސް ވަނީ މަނާކޮށްފައެވެ. މި އެންގުމާ ހިލާފުވާނަމަވެސް ހަމަ އެއް އުސޫލެއްގެ ދަށުން ފިޔަވަޅު އަޅާނެއެވެ.
މަގުމަތީ އުޅޭ މީހުން އެންގުމަށް ތަބައަވޭތޯ ބަލާ ފިޔަވަޅު އަޅާނީ ފުލުހުންނެވެ.
ރާއްޖެއިން މިހާތަނަށް ބަލި ޖެހުނު މީހުންގެ ޖުމްލަ އަކީ 6،912 އެވެ. މިހާރު ބައްޔަށް ފަރުވާ ހޯދަމުން ދަނީ 2،588 މީހުންނެވެ. ޖުމްލަ 4،297 މީހުން ވަނީ ބަލިން ފަސޭހަވެފައެވެ.
މިހާތަނަށް މި ބަލީގައި 27 މީހަކު ރާއްޖޭގައި ވަނި މަރުވެފައެވެ.