12 Aug 2020, 11:49
ފާއިތުވި 11 އަހަރު ތެރޭ އިނގިރޭސިވިލާތުގެ އިގްތިސޯދު ދަށަށް ނުދާވަރަށް ދަށަށް ގޮސް، އެގައުމުގެ އިގްތިސޯދު ރިސެޝަންއަކަށް ގޮސްފައިވާކަމަށް އިއުލާނު ކޮށްފިއެވެ.
މިއަހަރުގެ ފުރަތަމަ ކުއާޓަރާ އަޅާބަލާއިރު، ދެވަނަ ކުއާޓަރުގައި އެގައުމުގެ އިގްތިސޯދު 20.4 ޕަސެންޓް ވަނީ ދަށަށް ގޮސްފައެވެ.
އެގައުމުގެ އޮފިޝަލުންނާ ހަވާލާދީ ބީބީސީ އިން ބުނީ ކޮވިޑް19 އާއި ގުޅިގެން އަޅާފައިވާ ފިޔަވަޅުތަކަށް ޖޫން މަހުން ފެށިގެން ލުއިދޭން ފަށާފައިވާތީ، ޖޫން މަހުން ފެށިގެން އިގްތިސޯދު މަޑުމަޑުން ރަނގަޅުވާން ފަށާފައިވާ ކަމަށެވެ.
ކޮވިޑް19ގެ ސަބަބުން އިނގިރޭސިވިލާތުގެ އިގްތިސޯދަށް ކުރަމުންދާ އަސަރުތަކާއެކު އިގްތިސޯދުގައި އިތުރު 100 ބިލިއަން ޕައުންޑް ދައުރުކުރުމަށް އެ ގައުމުގެ މަރުކަޒީ ބޭންކުން ވަނީ މީގެ ކުރިން ނިންމައިފައެވެ.
ކޮވިޑާ ގުޅިގެން އެގައުމުގެ 600،000 އަށްވުރެ ގިނަ މީހުންގެ ވަޒީފާ ވަނީ ގެއްލިފައެވެ.
ޖޫން މަހުން ފެށިގެން އިގްތިސޯދު ރަނގަޅުވާން ފަށާފައިވާ ކަމަށް އޮފިޝަލުން ބުނި ނަމަވެސް އިގްތިސޯދު ހަމައަކަށް އެޅެން ވަގުތު ނަގާނެ ކަމަށް އިގްތިސޯދީ މާހިރުން ލަފާކުރެއެވެ.