04 Aug 2020, 14:17
މ. ދިއްގަރު ބޯޓެއްގެ ހަތަރު ފަޅުވެރިއަކު ކޮވިޑް-19 އަށް ޕޮޒިޓިވްވެއްޖެ އެވެ.
ޕޮޒިޓިވްވެފައި ވަނީ، މާލެއާއި މ. އަތޮޅުގެ ރަށްތަކާ ދެމެދު ދަތުރު ކުރާ "ރޯޔަލް 10" ނަމަކަށް ކިޔާ ބޯޓުގެ ފަޅުވެރިންތަކެކެވެ.
ދިއްގަރު ކައުންސިލްގެ ނައިބު ރައީސް ޔަހުޔާ އަބްދުއްރަހްމާނު މިއަދު "ސަން" އަށް ވިދާޅުވީ، އެ ބޯޓުގެ ފަޅުވެރިންތަކެއް ކޮވިޑަށް ޕޮޒިޓިވްވިކަން އެނގުނީ، މާލެއިން ފުރައިގެން އެ ބޯޓު މ. އަތޮޅަށް ދަތުރުކުރަމުން ދަނިކޮށް ކަމަށެވެ. އަދި ޕޮޒިޓިވްވެފައި ވަނީ، އެ ބޯޓްގައި މަސައްކަތް ކުރާ ބަންގްލަދޭޝްގެ ހަތަރު މިހުން ކަމަށް ޔަހުޔާ ވިދާޅުވި އެވެ.
"ބޯޓުގެ ހަތަރު މީހުން ޕޮޒިޓިވްވިކަން އެޗްޕީއޭ އިން މިހާރު ވަނީ ރަށުގެ ޓާސްކްފޯސްއަށް އަންގާފައި. އެ ހަތަރު މީހުންގެ ސާމަޕްލްވެސް ނެގީ މާލެއިން ނެގި ރޭންޑަމް ސަމްޕަލްތަކުގެ ތެރެއިން،" ޔަހުޔާ ވިދާޅުވި އެވެ.
ބޯޓު ރަށުން ފުރައިންގެން މާލެ ދިޔަތާ މިހާރު ހަތްވަރަކަށް ދުވަސް ވެދާނެ ކަމަށް ޔަހުޔާ ވިދާޅުވި އެވެ. އަދި ހަތަރު ފަޅުވެރިން ޕޮޒިޓިވްވިކަން އެނގުމުން ބޯޓު ރަށަށް ނައިސް އަނބުރާ މާލެ ދިޔުމަށް މިހާރު އަންގާފައިވާނެ ކަމަށް އޭނާ ވިދާޅުވި އެވެ.
"ޕޮޒިޓިވްވިކަން އެނގުނު އިރު ބޯޓު އޮތީ ވ. އަތޮޅު ކައިރީ. މ. އަތޮޅުގެ އެއްވެސް ރަށެއްގައި ނުޖައްސާ އަދި. މިހާރު އެ ބޯޓު ވަނީ އަލުން މާލެއަށް މިސްރާބު ޖަހާފައި،" ޔަހުޔާ ވިދާޅުވި އެވެ.
ދިއްގަރުގެ ބޯޓުގެ ފަޅުވެރިންތަކެއް ކޮވިޑަށް ޕޮޒިޓިވްވި އިރު، މިދިޔަ ހަފްތާ ބަންދު ތެރޭ ހއ. އިހަވަންދޫ ދެ ބޯޓެއްގެ ފަޅުުވެރިންތަކެއް ވެސް ވަނީ ކޮވިޑަށް ޕޮޒިޓިވްވެފަ އެވެ. ބޮޑު ކްލާސްޓާއެއް އޮތް އެ ކޭސްތަކާ ގުޅިގެން ފަސް ރަށަކަށް އަރާ ފޭބުންވެސް ވަނީ މަނާކޮށްފަ އެވެ.
މިހާރު ރާއްޖޭގައި ޖުމްލަ ހަތް ރަށެއް ވަނީ މޮނީޓަރިން ހާލަތައް ގެނެސް އަރައި ފޭބުން މަނާކޮށްފަ އެވެ.
އެޗްޕީއޭ އިން ރޭ އާންމުކުރި ތަފާސް ހިސާބުތަކުން މިހާތަނަށް ރާއްޖެއިން ޕޮޒިޓިވްވި މީހުންގެ އަދަދު ވަނީ 4،200 އަށް އަރާފަ އެވެ. އިއްޔެ ރާއްޖެއިން ފެނުނު ކޭސްތަކުގެ އަދަދަކީ، 129 އެވެ.