20 Jul 2020, 21:47
ނ. ކުޑަފަރިން އެއަތޮޅު މަނަދުއަށް ގެނެސް އެރަށުން މާލެއަށް ގެނެސް ޓެސްޓު ކުރުމުން ކޮވިޑް-19 އަށް ޕޮޒިޓިވްވި މީހާ ނެގެޓިވް ވެއްޖެ އެވެ.
މަނަދޫން މާލެ ގެނެސް ބެލިއިރު ވައިރަސް އަށް ޕޮޒިޓިވް ވެފައިވަނި އުމުރުން ދުވަސްވީ މީހެކެވެ.
ހެލްތު އިމާޖެންސީ އޮޕަރޭޝަން ސެންޓަރު (އެޗްއީއޯސީ)ގެ ސްޕޯކްސްޕާސަން ޑރ. ނަޒްލާ ރަފީގް ވިދާޅުވީ ވައިރަސް އަށް ޕޮޒިޓިވްވި މީހާއަކީ މީގެކުރީން ވައިރަސް ހުރި މީހަކަށް ވެދާނެ ކަމަށެވެ. ނުވަތަ އެ ކޭސް އަކީ ފޯލްސް ޕޮޒިޓިވް އަކަށް ވުން ވެސް އެކަށީގެންވެދާނެ ކަމަށް ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ އެ ކޭސް އަކީ ނެގެޓިވް ކޭސްއަކަށްވި ނަމަވެސް އެ މައްސަލައާ ގުޅިގެން އަމަލު ކުރާނީ ޕޮޒިޓިވް ކޭސްއެއްގެ ހާލަތުގައި އަމަލުކުރާ ގޮތަށް ކަމަށެވެ.
އަދި އެމީހާއާ ކޮންޓެކްޓް ވި މީހުންނާ މެދު އަމަލުތައް ބަލަހައްޓާނީވެސް ޕޮޒިޓިވް ކޭސްއަކާ ކޮންޓެކްޓުވާ މީހުންނާ މެދު އަމަލުކުރާ ޕްރޮސީޖާގެ ދަށުން ކަމަށް ޑރ. ނަޒްލާ ވިދާޅުވިއެވެ.
ޕޮޒިޓިވްވި މީހާއަށް ބޮޑު ބޭބޭ ކިޔާ މީހަކު ބުނެފައިވަނީ ބޮޑުބޭބެ ޕޮޒިޓިވް ވުމާއެކު ކޮންޓެކްޓް ޓްރޭސިން ހަދާ ސާމްޕަލް ނެގި އެންމެން ވަނީ ނެގެޓިވް ވެފައި ކަމަށެވެ.
ނ. އަތޮޅު ހޮސްޕިޓަލުގެ މެނޭޖަރު އިސްމާއިލް ޝަފީގް "ސަން" އަށް ވިދާޅުވި ގޮތުގައި އެމީހާ މަނަދޫ ހޮސްޕިޓަލަށް ގެނެވުނީ ފައިކަށީގެ ރެނދު އަޅައިގެންނެވެ.
އެކަމަކު މަނަދޫ ހޮސްޕިޓަލުގައި ކަށީގެ ޑޮކްޓަރެއް ނެތުމުން މިމަހުގެ 11 ވަނަ ދުވަހުގެ ހެނދުނުގެ ވަގުތެއްގައި އައިޖީއެމްއެޗްއާއި މަޝްވަރާ ކުރުމަށް ފަހު އެމީހާ މާލެ ފޮނުވާލާފައިވާކަމަށް ޝަފީގް ވިދާޅުވި އެވެ.