20 Jul 2020, 09:57
ރާއްޖޭގައި 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށް ރެޒިޑެންސް ވިސާ ދޭ ގޮތަށް އިމިގްރޭޝަންގެ ގާނޫނަށް ހުށަހަޅާފައިވާ އިސްލާހުގެ އަޑީގައި ފޮރުވިފައި ހުރި ކަންތައްތައް މަޖިލީހުގެ ސަމާލުކަމަށް ގެނައުމަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.
އެ އިސްލާހާ ގުޅިގެން ކުއްލި މައްސަލައެއް ހުށަހެޅުއްވީ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ.
މެމްބަރު ނަޝީދު ހުށަހެޅުއްވި މައްސަލައިގައި ވިދާޅުވެފައި ވަނީ އިމިގްރޭޝަން ގާނޫނަށް ގެނައުމަށް ރައްޔިތުންގެ މަޖިލީހުގެ ރައީސް ހުށަހަޅުއްވާފައިވާ އިސްލާހުގެ ހަގީގީ ބޭނުމަކީ މިވަގުތު ރާއްޖޭގައި ދިރިއުޅޭ ބިދޭސީންގެ ތެރެއިން ބާރުގަދަ އަވަށްޓެރި ގައުމަކަށް ނިސްބަތްވާ 25،000 ބިދޭސީންނަށް ރާއްޖޭގައި ދާއިމީ ގޮތެއްގައި ދިރިއުޅެވޭނެ ގޮތަށް މަގުފަހި ކުރުމަށް ކަމަށް، މިކަމުގައި އެންމެ ފުރިހަމަ މައުލޫމާތު އެނގިހުރި ފަރާތްތަކުން މެމްބަރަށް މައުލޫމާތު އަރުވާފައިވާތީ އެކަން މަޖިލީހުގެ ސަމާލުކަމަށް ގެންނަން ބޭނުންވާ ކަމަށެވެ.
އަދި އެކަން ތަރުތީބު ކުރެވިގެން ދަނީ ވަކި ހިސާބަކުން އެމީހުން ދިވެހިރާއްޖޭގެ ރައްޔިތުކަން ދިނުން ކަމަށާއި އޭގެ ކުރިން ދާއިިމަށް ތިބެން ފެށުމާއެކު ރާއްޖޭގެ އެއްބައިވަންތަކަން ގެއްލޭނެ ފަދަ ކަންކަން ކުރުމަށް ރާވާފައިވާ ކަމަށް މައުލޫމާތު ލިބިފައިވާ ކަމަށް ވެސް މެމްބަރު ވިދާޅުވިއެވެ.
"މިގޮތުން އެމީހުން ބޭނުންވާ ދީނަކަށް އުޅުމަށް ފައްޅި އެޅުމާއި، އެމީހުންގެ ދަރިން ސްކޫލަށް ދާއިިރު އެމީހުންގެ ދީނީ ތައުލީމު ލިބޭނެ ގޮތް މަގުފަހިކުރުމަށް ވަކާލާތު ކުރާނެ ކަމަށްވެ އެވެ. އަދި މިކަންކަން ކުރުމަށް ހަމަޖެހިފައި ވަނީ އިންސާނީ ހައްގުތަކުގެ ނަމުގައި ކަމަށްވެއެވެ،" މެމްބަރު ވިދާޅުވި އެވެ.
މެމްބަރު ވިދާޅުވީ ނުގަވާއިދުން އުޅޭ ބިދޭސީންގެ މައްސަލައަށް އޮތް ހައްލަކީ އެމީހުންނަށް ދިވެހި ރައްޔިތުކަން ދިނުން ކަމަށް ރައްޔިތުންގެ މަޖިލީހުގެ ރައީސް، ވިދާޅުވެފައި ވުމަކީ މިކަމަށް ބާރުލިބިދޭ އިތުރު ހެއްކެއް ކަމަށެވެ.
ކުއްލި މައްސަލައިގައި ބުނެފައި ވަނީ 25،000 މީހުންނަށް ރާއްޖޭގައި ދާއިމަށް ތިބެވޭނެ ގޮތް ހަދާ، ވަކި ހިސާބަކުން ރައްޔިތުކަން ދީފި ނަމަ ރާއްޖޭގައި ކުރިއަށް ބާއްވާ އިންތިހާބުތަކަށް ވަރަށް ބޮޑަށް އެހެން ގައުމުތަކަށް ނުފޫޒު ފޯރުވޭނެ ކަމަށެވެ. އަދި އެ އަދަދު ބޭނުންކޮށްގެން ރާއްޖޭގެ މަދު ބައެއްގެ ވޯޓު ކޮޅަކާއެކު އިންތިހާބެއް ކާމިޔާބު ކުރެވޭނެ ކަމަށެވެ.
އަދި މިވަގުތު ވެސް ރާއްޖެ އޮތީ ވަރަށް ނުރައްކާތެރި ހާލަތެއްގައިކަން މަޖިލީހުގެ ސަމާލުކަމަށް ގެންނަން ބޭނުންވާ ކަމަށެވެ.
އެގޮތުން އަވަށްޓެރި ގައުމެއްގެ ޖާސޫސީ އިދާރާއަށް ނިސްބަތްވާ ބަޔަކު ރާއްޖޭގެ އެންމެ ދެކުނާއި ހައްދުންމައްޗާއި މާލޭގައި މިހާރު ވެސް ހަތިޔާރައެކު ހަރަކާތްތެރިވަމުން ދިއުމަކީ އެކަށީގެންވާ ކަމެއް ކަމަށާއި އަދި އެ ގައުމުގެ އެމްބަސީން ރާއްޖޭގެ ގިނަ މީޑިއާތަކަށް ހަރަދުކޮށް އެގައުމުތަކާ ދެކޮޅަށް މީޑިއާއިން ލިޔުންތައް ނުލިޔާނެ ކަމުގެ ޔަގީންކަން ހޯދާފައިވާ ކަމަށް މައުލޫމާތު ލިބިވަޑައިގެންފައިިވާކަމަށް ވެސް މެމްބަރު ނަޝީދު ވިދާޅުވި އެވެ.
އެހެންކަމުން ކުއްލި މައްސަލަ ހުށަހެޅުއްވުމުގެ ބޭނުމަކީ މެމްބަރު މިއަދު ހާމަކުރެއްވި މައުލޫމާތު ތަކަކީ ރާއްޖޭގެ ސަލާމަތަށް ނުރައްކާވާނެ ކަންތައްތަކެއް ކަމަށާއި މިނިވަންކަމާ އިސްތިގުލާލު ގެއްލިގެން ދާނެ ކަންކަމަށް ވާތީ އެކަން މަޖިލީހުގެ ސަމާލުކަމަށް އަދި މުޅި ޖުމްލަކޮށް ހުރިހާ ރައްޔިތުންގެ ސަމާލުކަމަށް ގެނައުން ކަމަށް މެމްބަރު ވިދާޅުވިއެވެ.
އެ ކުއްލި މައްސަލައަށް ބަހުސްކުރަން ނެގި ފެންނަ ނުފެންނަ ވޯޓުގައި، މައްސަލައަށް ބަހުސް ކުރަން ފެންނަ ކަމަށް ވޯޓުދެއްވީ ޖަލްސާގައި ތިއްބެވި 41 މެމްބަރުންގެ ތެރެއިން 16 މެމްބަރުންނެވެ. މައްސަލަ ބަލައިގަންނަން 18 ވޯޓު ބޭނުންވާ އިރު، މައްސަލަ ބަލައިގަތުކާ ދެކޮޅަށް 19 މެމްބަރުން ވޯޓުދެއްވި އެވެ.
އިމިގްރޭޝަންގެ ގާނޫނަށް އިސްލާހު ގެންނަން ސަރުކާރުން މަޖިލީހަށް ހުށަހެޅި ބިލް އެ ކޮމިޓީން ދިރާސާކޮށް، ރައްޔިތުންގެ މަޖިލީހުގެ ތަޅުމުން ގޮތެއް ނިންމަން ފޮނުވުމުން، އަނބުރާ ކޮމިޓީއަށް ބިލު ފޮނުއްވަމުން މަޖިލީހުގެ ރައީސް އެދިވަޑައިގަތީ ރިޔާސަތުން ހުށަހަޅާފައިވާ އިސްލާހާއެކު، އެ ބިލާ މެދު އަލުން ކޮމިޓީއިން ވިސްނުމަށެވެ.
އިސްލާހުގައި، ދިގު މުއްދަތަކަށް ކުއްޔަށް އުޅޭ ބިދޭސީންނަށާއި، އެއް ލައްކަ ރުފިޔާއަށްވުރެ ބޮޑު އިންވެސްޓްމަންޓެއް ރާއްޖެގައި ކުރާ ބިދޭސީންނަށްވެސް ރެސިޑެންޓް ވިސާ ދިނުމަށް ހިމަނާފައިިވެ އެވެ.
އެ އިސްލާހުތަކާ ގުޅިގެން ގިނަ ބައެއްގެ ނުރުހުމާއި ފާޑުކިޔުން މަޖިލިސް ރައީސް އަށް ވަނީ އަމާޒުވެފަ އެވެ.