14 Jun 2020, 09:53
ކުޅަދާނަ އެކްޓަރު އަޔޫޝްމަން ކުރާނާ އާއި ލެޖެންޑަރީ ތަރި އަމީތާބު ބައްޗަން ލީޑޫ ރޯލުން ފެނިގެންދާ "ގުލާބޯ ސިތާބޯ" ލީކުކޮށްލައިފި އެވެ.
ގުލާބޯ ސިތާބޯ ލީކުކޮށްލައިފައި ވަނީ ފަހަކަަށް އައިސް ބޮލީވުޑްގައި ރިލީޒްކުރާ ހުރިހާ ފިލްމުތަކެއް ލީކުކުރަމުން އަންނަ ތަމިލް ރޮކާޒްއިންނެވެ. އެމީހުން ވަނީ މީގެ ކުރިން ވެސް ގިނަ ފިލްމުތަކެއް ލީކުކޮށްފަ އެވެ. އަދި އެމީހުންނާ މެދު ފިޔަވަޅުތަކެއް އެޅި ނަމަވެސް އެކަން ކުރުން ހުއްޓާނުލައި ދިޔައީ ފިލްމުތައް ލީކުކުރަމުންނެވެ.
ކޮރޯނާވައިރަހާ ގުޅިގެން އިންޑިއާގެ ސިނަމާތައް ބަންދުކުރުމާއެކު ފިލްމުތައް އެޅުވޭނެ މަގު ތަނަވަސްނުވުމުގެ ސަބަބުން ގުލާބޯ ސިތާބޯ ރިލީޒްކުރީ އެމެޒޯން ޕްރައިމްގައެވެ. އެ ފިލްމު އެމެޒޯންއަށް ވިއްކައިލީ އަށް މިލިއަން ޑޮލަރަށް ކަމަށް ޚަބަތުތައް ބުނެއެވެ.
ކްރިޓިކް ތަރަން އަދާޝް ބުނީ ފިލްމުގެ ތަރިންނާ ޑައިރެކްޓަރުގެ މަސައްކަތް ވެސް ފިލްމުން ވަރަށް ފުރިހަމއަށް ފެނިގެން ގޮސްފައިވާ ކަމަށެވެ. އަދި މި ފިލްމަކީ ޝައުގުވެރިކަމާއެކީ ބަލަން އިނދެވުނު ފިލްމެއް ކަމަށެވެ. އޭނާ އެ ފިލްމަށް ދީފައިވަނީ ފަސް ތަރިން ތިން ތަރި އާއި ބައެވެ.
ފިލްމަކީ ގޭގެ ބައެއް ކުއްޔަށް ދީގެން އުޅޭ އުމުރުން ދުވަސްވީ މީހަކާއި އެ ގޭގައި ކުއްޔަށް އުޅޭ ޒުވާނަކާ ދެމެދު ހިނގާ ކޯޅުންތަކެއް ފެނިގެންދާ ފިލްމެކެވެ.