27 May 2020, 22:57
ކައުންސިލަރުންގެ ދައުރު އިތުރުކުރުމަށް ސަރުކާރުގެ ފަރާތުން ގާނޫނުއަސާސީއަށް ހުށަހެޅި އިސްލާހު މަޖިލީހުން ބަލައިގަނެ މުޅި މަޖިލީހުގެ ކޮމިޓީއަށް ފޮނުވައިފި އެވެ.
ކައުންސިލަރުންގެ ދައުރު ހަމަވާނީ ޖޫން މަހުގެ ތިން ވަނަ ދުވަހަށެވެ. އެމުއްދަތު އިތުރުކުރުމަށް ސަރުކާރުގެ ފަރާތުން މަޖިލީހަށް ހުށަހެޅުއްވީ ބިލެއްދޫ ދާއިރާގެ މެމްބަރު އަހުމަދު ހަލީމް އެވެ. އެ ބިލު ބަލައިގަތުމަށް 60 މެމްބަރުން ވަނީ ވޯޓު ދެއްވާފަ އެވެ.
ގާނޫނުއަސާސީ އިސްލާޙު ކުރުމުގެ މައްސަލާގައި މެމްބަރުންގެ މެދުގައި ވަނީ ހޫނު ބަހުސަކަށް ގޮސްފަ އެވެ. ބިލުގެ އިބްތިދާއީ ބަހުސް މަރުހަލާގައި ބައެއް މެމްބަރުން ދެކޮޅު ހެއްދެވި އިރު، ކައުންސިލުތަކަށް އަންނަ ގާނޫނީ ހުސްކަމަށް ހައްލެއް ހޯދޭނީ ގާނޫނުއަސާސީ އިސްލާހުކޮށްގެން ކަމަށް އަނެއްބައި މެމްބަރުން ވަކާލާތު ކުރި އެވެ. އެބަހުސް ގޮސްފައިވަނީ ހާއްސަކޮށް އެމްޑީޕީ މެމްބަރުންގެ ތެރޭގަ އެވެ.
އެމްޑީޕީގެ ޕާލިމެންޓްރީ ގުރޫޕުން ރޭ ތްރީލައިންވިޕެއް ނެރިފައި ވަނީ ސަރުކާރުން ހުށަހެޅި ގޮތަށް ބިލު ބަލައިގަނެ ކޮމިޓީއަށް ފޮނުވާ ކޮމިޓީއިންވެސް އެގޮތަށް ފާސް ކުރުމަށެވެ. އެގޮތަށް ފާސްކުރުމަށް ހުށަހެޅި ހުށަހެޅުމަށް 41 މެމްބަރުން ވަނީ ވޯޓު ދީފަ އެވެ.
ނަމަވެސް އެމްޑީޕީގެ ބައެއް މެމްބަރުން ވިދާޅުވަަމުން ދަނީ މިހާލަތުގައި ގާނޫނުއަސާސީ އިސްލާހު ނުކުރެވޭނެ ކަމަށެވެ. މިހާލަތަކީ ކުއްލި ނުރައްކަލުގެ ހާލަތެއް ކަމަށް ގަބޫލުކުރާ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވި އެވެ. އެހެންވެ ވިޕްލައިނެއް އަޅާފައި އޮތްނަމަވެސް އަމިއްލަ ގަބޫލުކުރުންތަކާ ހިލާފަށް ވޯޓު ނުދެއްވާނެ ކަމަށް އިންތި ވިދާޅުވި އެވެ.
ތުޅާދޫ ދާއިރާގެ މެމްބަރު ހިސާން ހުސައިން ވިދާޅުވާގޮތުން މިހާލަތުގައި ގާނޫނުއަސާސީ އިސްލާހު ކުރެވޭނެ އެވެ. އަދި ކައުންސިލުތަކަށް އަންނާނެ ގާނޫނީ ހުސްކަމަށް ހައްލެއް ހޯދޭނީވެސް ގާނޫނުއަސާސީ އިސްލާހުކޮށްގެން ކަމަށް އޭނާ ދެކެވަޑައިގަންނަވަ އެވެ. މަޖިލީހުގެ ކައުންސިލަ ޖެނެރަލް އަދި ބަންޑާރަނައިބުވެސް ލަފާދެއްވާފައި ވަނީ އެގޮތަށެވެ.
މަޖިލީހުން މިރޭ ވަނީ އެމައްސަލާގައި ސުޕްރީމް ކޯޓުގެ އިސްތިޝާރީ ލަފައަކަށް އެދެންވެސް ފާސްކޮށްފަ އެވެ. މަޖިލީހުގެ ރައީސް ވިދާޅުވީ އެ ލަފާ އެކަށީގެންވާ މުއްދަތެއްގެ ތެރޭގައި ދެއްވުމަށް އެދިވަޑައިގެންފައި ވާނެ ކަމަށެވެ.