15 May 2020, 01:02
ޓޫރިޒަމް މިނިސްޓްރީގެ ރަސްމީ ޓުވިޓާ އެކައުންޓް ހެކްކޮށްފިއެވެ.
ޓްވީޓާ އެކައުންޓް ހެކް ކުރުމަށްފަހު ވަނީ ސަރުކާރަށް ފާޑުކިޔައި ޓްވީޓްތަކެއް ކޮށްފައެވެ.
ފުލުހުންގެ މީޑިއާ އޮފިޝަލް ވިދާޅުވީ ޓުއަރިޒަމް މިނިސްޓްރީގެ ޓްވިޓާ އެކައުންޓް ހެކްކޮށްފައިވާތީ އެ މައްސަލަ ތަހުގީގު ކުރަމުންދާ ކަމަށެވެ. މިކަމާ ގުޅޭ އިތުރު ތަފްސީލެއް ފުލުހުން ނުދެއްވައެވެ.
މިނިސްޓްރީގެ ޓްވިޓާ އެކައުންޓް ހެކްކުރުމަށްފަހު ކުރި ޓްވީޓްތަކުގައި ބުނެފައިވަނީ އިނގިރޭސީވިލާތް ފަދަ އެެހެން ގައުމުތަކުން ކޮވިޑް19ގެ ސަބަބުން އެގައުމުގެ ރައްޔިތުންނަށް އެހީތެރިކަން ފޯރުކޮށްދެމުންދާ ކަމަށެވެ. އަދި އެފަދަ އެހީތެރިން ދިވެހި ސަރުކާރުން ރައްޔިތުންނަށް ފޯރުކޮށްނުދެނީ ކީއްވެގެންތޯ ސުވާލު އުފައްދާފައިވެއެވެ. އަދި ސަރުކާރުގެ ވެރިން ކުރައްވަމުން ގެންދަވާ ނޭދެވޭ އަމަލުތަކުގެ މައުލޫމާތުތައްވެސް ލިބިފައިވާ ކަމަށް ޓްވީޓްގައި ބުނެއެވެ. މީގެ އިތުރުން ބޭރުގެ އެހީގެ ގޮތުގައި ލިބެމުންދާ ތަކެތި ރައްޔިތުންނަށް ލިބެމުންނުދާ ކަމަށާއި އެ ތަކެއްޗަށް ވަމުންދާގޮތް ރައްޔިތުންނަށް އެނގެންޖެހޭ ކަމަށްވެސް ޓްވީޓްތަކުގައި ބުނެފައިވެއެވެ.
މިހާރު އެ ޓްވީޓްތައް ވަނީ ޑިލީޑްކޮށްފައެވެ. ރޭވެސް މިނިސްޓްރީގެ ޓްވީޓާ އިން އާންމު އިޖްތިމާއީ މިންގަޑާ ހިލާފު ޓްވީޓެއް ކޮށްފައިވެއެވެ. ނަމަވެސް ފަހުން އެ ޓްވީޓް ވަނީ ޑިލީޓްކޮށްލާފައެވެ. އެ ޓްވީޓާ މިރޭ ޓްވީޓާ އެކައުންޓާ ގުޅުމެއް ހުރި ކަމެއް އަދި އެނގިފައެއް ނުވެއެވެ.
މީގެ ކުރިން އެޗްޕީއޭގެ ވެބްސައިޓްވެސް ހެކް ކުުރުމަށްފަހު ސަރުކާރަށް ވަނީ އިންޒާރުދީފައެވެ. މީގެ އިތުރުން ފުލުހުން މިރޭ ވަނީ ކޮވިޑް19 އާ ދެކޮޅަށް އިސްސަފުގައި މަސައްކަތް ކުރާ ޑޮކްޓަރުންގެ ފޯންތައްވެސް ހެކް ކުރުމަށް ބަޔަކު މަސައްކަތް ކުރަމުންދާތީ އެކަމަށް ސަމާލުވުމަށް އެދިފައެވެ.