14 May 2020, 15:15
އެމްއެމްޕީއާރުސީގެ 3.3 ބިލިއަން ރުފިޔާގެ ބޮޑު ހިޔާނާތުގެ ތަހުގީގު ވަރުގަދަ ކުރަން އިތުރު ވަސީލަތްތައް ބޭނުން ކުރުމަށް މަޝްވަރާކޮށްފި އެވެ.
އެމްއެމްޕީއާރުސީގެ ހިޔާނާތް ބެލުމަށް ރައީސް އިބްރާޙިމް މުހައްމަދު ސޯލިހް އެކުލަވާލި އެސެޓް ރިކަވަރީ ކޮމިޝަނުން އަދިވެސް ދަނީ އެ މައްސަލަ ތަހުގީގު ކުރަމުންނެވެ. އެ ކޮމިޝަނުން ވަނީ އެ ފައިސާ ލިބުނު ކަމަށް ތުހުމަތު ކުރެވޭ 267 މީހުންގެ ލިސްޓެއް އެކުލަވާލާފަ އެވެ. ނަމަވެސް އަދި މިހާތަނަށް ކޮމިޝަނުން އެމީހުންގެ މައުލޫމާތެއް ހާމައެއް ނުކުރެ އެވެ. އަދި އެ ފަރާތްތަކަށް ދައުވާ ކުރުމަށްވެސް ނުފޮނުވަ އެވެ.
ކޮމިޝަަނަރާ އޮފް ޕޮލިސް މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ، އެމްމެމްޕީއާރުސީގެ ކޮރަޕްޝަން ތަހުގީގު ކުރުމަށް އެކުލަވާލާފައިވާ ޖޮއިންޓް އިންވެސްޓިގޭޝަން ސްޕަވައިޒަރީ ގްރޫޕާއި އެކު ވާޗުއަލް ބައްދަލުވުމެއް ބާއްވާފައިވާ ކަމަށެވެ. އަދި އެ ބައްދަލުވުމުގައި އެމްއެމްއެމްޕީއާރުސީގެ ތަހުގީގު ވަރުގަދަ ކުރަން އިތުރު ވަސީލަތްތައް ބޭނުން ކުރުމަށް މަޝްވަރާ ކޮށްފައިވާ ކަމަށެވެ.
އެ މައްސަލަ ތަހުގީގު ކުރަމުން އަންނަނީ ފުލުހުންނާއި އެންޓިކޮރަޕްޝަން ކޮމިޝަނާއި އެސެޓް ރިކަވަރީ ކޮމިޝަނު ގުޅިގެންނެވެ.
އެމްއެމްޕީއާރުސީގެ ބޮޑު ހިޔާނާތުގެ ފައިސާ، މިހާރުގެ ސަރުކާރުގެ ހަތް ބޭފުޅަކަށާއި ރައްޔިތުންގެ މަޖިލީހުގެ 16 މެމްބަރަކާއި މިހާރު ކޯޓުތަކުގައި ތިއްބެވި ހަ ފަނޑިޔާރަކަށް ލިބިވަޑައިގެންފައިވާކަމަށް ފުލުހުން މީގެ ކުރިން ވަނީ ހާމަކޮށްފަ އެވެ.
އެމްއެމްޕީއާރުސީގެ ތަހުގީގު ދިގުލައި ނުގޮސް ކޮންމެވެސް އެއްގޮތަކަށް ނިންމަން ޖެހޭ ކަމަށާއި އެގޮތުން ދައުވާ ކުރާ ނަމަ އަދި ދައުވާ ނުކުރާނަމަ، ވީހާވެސް އަވަހަކަށް އެކަމުގެ ތަހުގީގުގައި ނިންމަން ޖެހޭ ކަމަށް ޕްރޮސިކިއުޓާ ޖެނަރަލް ހުސައިން ޝަމީމް ވަނީ މި އަހަރުގެ ފެބްރުއަރީ މަހު ވިދާޅުވެފަ އެވެ.
މައްސަލަތަކުގެ ތަހުގީގު ނިންމައި ޕްރޮސިކިއުޓާ ޖެނަރަލްގެ އޮފީހަށް ހުށަހަޅާއިރު، އެ މައްސަލައިގެ ތަހުގީގު ކުރިއަށްދިޔަ ގޮތާއި ތަހުގީގުގެ މިސްރާބު ހުރި ގޮތް އަދި ތަހުގީގަށް ހޯދަން ބޭނުންވާ މައުލޫމާތެއް ހޯދިފައިނުވާ ނަމަ، ނުވާ ސަބަބު އަދި މައްސަލައިގެ ވަށައިގެންވާ ކަންކަމުގެ ތެރެއިން މައްސަލައިގެ އަދަބަށް އަސަރުކޮށްފާނެ ފަދަ ކަމެއް ވާނަމަ އެކަމުގެ މައުލޫމާތާއި އެކު ޕީޖީ އޮފީހަށް، ފުލުހުން ހިންގާ ބޮޑެތި ޖިނާއީ މައްސަލަތަކުގެ ތަހުގީގާ ގުޅޭ ތަފްސީލީ މައުލޫމާތު މަދުވެގެން ހަފްތާއަކު އެއްފަހަރު، ހިއްސާކުރުމަށް ފުލުހުންނަށް ވަނީ އަންގައިފަ އެވެ.