14 May 2020, 01:45
ކޮވިޑް19 ފެތުރިފައިވަ މިންވަރު ދެނެގަތުމަށް ކުރިއަށް ގެންދިޔަ ރެންޑަމް ސާމްޕްލިންގެ ދަށުން މާފުށީ ޖަލުން ނެގި ހުރިހާ ސާމްޕަލްތަކެއް ވައިރަހަށް ނެގެޓިވްވެފައިިވާ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.
މި މަހުގެ އަށް ވަނަ ދުވަހު މާފުށީ ޖަލުން ވަނީ 38 ސާމްޕަލެއް ނަގައިފައެވެ. އޭގެތެރޭގައި ހިމެނެނީ ޖަލުގައި ތިބި ގައިދީންގެ ތެރެއިން 15 މީހެއްގެ ސާޕަލް އަދި 23 އޮފިސަރެއްގެ ސާމްޕަލެވެ.
ކަރެކްޝަންސް އިން މިރޭ ކުރި ޓުވީޓެއްގައި ބުނެފައި ވަނީ، ޖަލުން ނެގި ހުރިހާ ސާމްޕަލްތަކެއް ވެސް ކޮވިޑް19 އަށް ނެގެޓިވްވެފައިވާކަން އެޗްޕީއޭއިން ކަށަވަރުކޮށްދީފައިިވާ ކަމަށެވެ.
ކޮވިޑް19 އާ ގުޅިގެން ޖަލުގައި ވެސް ވަނީ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. ލޮކްޑައުންގެ ހާލަތަށް މާލެ ދިޔުމާ ގުޅިގެން ޖަލުތަކުގެ މުވައްޒަފުންގެ މޫވްމެންޓް ހުއްޓުވައި، މުވައްޒަފުންނަށް ޖަލުގައި ވަނީ އެކޮމޮޑޭޝަން ހަމަޖައްސާފައެވެ.
އަދި ގައިދީންނަށް ވީޑިއޯ ކޮންފަރެންސް މެދުވެރިކޮށް އާއިލާ އާ ބައްދަލު ކުރެވޭނެ އިންތިޒާމު ހަމަޖައްސައި، މާލެ ސަރަހައްދުގެ ޖަލުތަކަށް އަލަށް ގެންދާ ގައިދީން 14 ދުވަހު އެކަހެރި ކުރަން ވެސް ވަނީ ނިންމައިފައެވެ.
ހެލްޕް ޕްރޮޓެކްޝަން އެޖެންސީ އިން މިހާރު ދަނީ އެއްވެސް ޕޮޒިޓިވް ކޭސްްއަކާ ގުޅުމެއް ނެތް މީހުން ކޮވިޑަށް ޓެސްޓް ކުރުމަށް ރާއްޖޭގެ އެކި ސަރަހައްދުތަކުން ރޭންޑަމް ސާމްޕަލް ނަގަމުންނެވެ.
މިހާތަނަށް ރާއްޖެއިން ކޮވިޑަށް 955 މީހަކު ވަނީ ޕޮޒިޓިވްވެފައެވެ. އޭގެ ތެރެއިން ހަތަރު މީހަކު މަރުވި އިރު، 40 މީހަކު ވަނީ ވައިރަހުން ރަނގަޅުވެފަ އެވެ.