12 May 2020, 11:22
މިހާރު ފެތުރެމުންދާ ކޮވިޑް-19 ކޮންޓްރޯލު ކުރުމަށްޓަކައި ސަރުކާރުން ކުރަމުން ގެންދާ މަސައްކަތައް މިހާތަނަށް 814.2 މިލިއަން ރުފިޔާ ހޭދަކޮށްފި އެވެ.
ފިނޭންސް މިނިސްޓްރީ އިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި މި މަހުގެ ހަތެއްގެ ނިޔަލަށް ސަރުކާރުން ކޮވިޑަށް ހޭދަކޮށްފައިވާ ފައިސާގެ އަދަދު 814.2 މިލިއަން ރުފިޔާއަށް އަރަ އެވެ.
އެގޮތުން މިދިޔަ ހަފްތާއިން ކޮވިޑަށް ހޭދަކޮށްފައިވާ މިންވަރު ވަނީ އޭގެކުރީ ހަފްތާއާ އަޅާ ބަލާއިރު 22 ޕަސެންޓު އިތުރު އަދަދެއް ކަމަށް ފިނޭންސް މިނިސްޓްރީއިން ބުނެ އެވެ.
ފިނޭންސް މިނިސްޓްރީއިން ބުނީ ކޮވިޑަށް ކުރާ ހޭދައިގެ 91.5 ޕަސެންޓް ކޮންޓްރިބިއުޓް ކުރަނީ ނޭޝަނަލް ޑިޒާސްޓާ މެނޭޖެންމެންޓް އޮތޯރިޓީ (އެންޑީއެމްއޭ) އާއި ހެލްތު މިނިސްޓްރީއިން ކަމަށެވެ.
އެގޮތުން މިހާރު ހޭދަކޮށްފައިވާ ފައިސާގެ ތެރެއިން އެންމެ ގިނަ ހަރަދެއް ކޮށްފައިވަނީ އެންޑީއެމްއޭ އިންނެވެ. އެ އޮތޯރިޓީއިން މިހާތަނަށް 525.4 މިލިއަން ރުފިޔާ ހޭދަކޮށްފައިވާއިރު ހެލްތު މިނިސްޓްރީއިން ހޭދަކޮށްފައިވަނީ 135.7 މިލިއަން ރުފިޔާ އެވެ. ދެން އެންމެ ގިނައިން ހޭދަކޮށްފައިވަނީ ޕްލޭނިން އެންޑް އިންފްރަސްޓްރަކްޗާ މިނިސްޓްރީއިންނެވެ. އެ މިނިސްޓްރީއިން ވަނީ 27.9 މިލިއަން ރުފިޔާ ހަރަދުކޮށްފަ އެވެ.
ސަރުކާރުން ކޮށްފައިވާ ހޭދައަށް ބަލާއިރު އެންމެ ބޮޑު ހޭދައެއް ހިނގާފައިވަނީ ޕާސަނަލް ޕްރޮޓެކްޝަން އިކުއިޕްމެންޓް (ޕީޕީއީ) އާއި ބައްޔަށް ޓެސްޓުކުރުމާއި ވެންޓިލޭޓަރު ހޯދުމުގެ އިތުރުން ފެސިލިޓީތައް ގާއިމުކުރުމަށެވެ. އެގޮތުން މިނިސްޓްރީއިން ވަނީ ހޭދަތައް ކޮށްފައިވާގޮތުގެ މައުލޫމާތު ހާމަކޮށްފަ އެވެ.
މިނިސްޓްރީއިން ހާމަކޮށްފައިވަނީ ޓެސްޓްކުރުމާއި އިކުއިޕްމެންޓަށް 389 މިލިއަން ރުފިޔާ ހޭދަކޮށްފައިވާ ކަމަށެވެ. ކެޕިޓަލް އިކުއިޕްމެންޓް ނުވަތަ އައިސޮލޭޝަން ފަދަ ހިދުމަތްތައް ތަކަށް 189 މިލިއަން ހޭދަކުރިއިރު އެހީ ބޭނުންވާ ފަރާތްތަކަށް ސަބްސިޑީސްގެ ގޮތުގައި 110 މިލިއަން ރުފިޔާ ވަނީ ހޭދަކޮށްފަ އެވެ.
ބިމާއި އިމާރާތް ކުރުމަށް 54.5 މިލިއަން ރުފިޔާ ހޭދަކޮށްފައިވާއިރު އޮޕަރޭޝަނަލް ސާވިސް އަށް ވަނީ 36.6 މިލިއަން ރުފިޔާ ހޭދަކޮށްފައިވެ އެވެ. ސަޕްލައި އަދި ރިކުއިޒިޓްސް އަށް 24.9 މިލިއަން ރުފިޔާ ހޭދަކޮށްފައިވާއިރު މަރާމާތުކުރުމާއި މެއިންޓެނަންސްއަށް 7.4 މިލިއަން ރުފިޔާ ހަރަދުކޮށްފައިވެ އެވެ. އަދި ދަތުރުފަތުރުގެ ހަރަދަށް 2.6 މިލިއަން ރުފިޔާ ހޭދަކޮށްފައިވާކަން ވެސް މިނިސްޓްރީގެ ތަފާސްހިސާބުތަކުން ދައްކަ އެވެ.