08 May 2020, 16:14
ރޭލު ދަނގަޑުމަތީ ނިދާފައި ތިބި 14 މީހަކު ރޭލަކުން ޖެހިގެން، އިންޑިއާގައި މަރުވެއްޖެ އެވެ.
އިންޑިއާގެ ރެއިލްވޭ މިނިސްޓްރީން ބުނީ މަރުވި މީހުންނަކީ އިންޑިއާގެ އެކި ހިސާބުތަކަށް ނިސްބަތްވާ ލޭބަރުންކަމަށެވެ.
ކޮރޯނާ ވައިރަސް ފެތުރުން ހުއްޓުވުމުގެ ގޮތުން ކުއްލިއަކަށް ލޮކްޑައުން ކުރުމުން އިންޑިއާގެ އެތައް ބަޔަކު އެގައުމުގެ އެކި ހިސާބުތަކުގައި ތާށިވި އެވެ. އަދި އެތައް ހާސް ބަޔަކު ވަޒީފާ ގެއްލިފައިވާއިރު ބައެއް މީހުން އެ މީހުންގެ އަވަށަށް ދިއުމަށް ފައިމަގުގައި އެތައް ކިލޯ މީޓަރެއް މިހާރުވެސް ދަނީ ކަޑައްތުކުރަމުންނެވެ.
ރޭލުން ޖެހިގެން މަރުވެފައިވަނީ އެފަދަ ބައެކެވެ. އެ މީހުން ރޭލް ދަނގަޑުމަތީގައި ނިދާފައި ތިބީ ރޭލް ދަތުރުތައް ހުއްޓާލައިފައިވާކަމަށް ހީކޮށެެވެ. ފަސެންޖަރުން އުފުލައިގެން ރޭލްތައް ދުއްވުން ހުއްޓާލިޔަސް މުދާ ހިފައިގެން ރޭލްތައް މިހާރުވެސް ދަތުރުކުރެއެވެ.
ފުލުހުން ބުނީ ރޭލް ދަނގަޑުމަތީގައި ނިދި މީހުން މުޅި ރޭގަނޑު ކަހަލަ ގޮތަކަށް އުޅުނީ ހިނގައިފައިވާ ކަަމަށާއި އެމީހުން ވަރުބަލިވެފައި ތިބިވަރުން ނިދުނީ ކަމަށެެވެ.
ރެއިލްވޭ މިނިސްޓްރީން ބުނީ ނިދާފައި ތިބި މީހުން ފެނިގެން ރެއިލް ހުއްޓަން މަސައްކަތް ކުރި ކަމަށެވެ. އެ މައްސަލަ ބަލަން ފަށައިފައިވާކަމަށްވެސް ވަނީ ބުނެފަ އެވެ.
އިންޑިއާގެ އިދިކޮޅު ކޮންގްރެސް ޕާޓީގެ ލީޑަރު ރާހުލް ގާންދީ ވަނީ އެ ހާދިސާއާ ގުޅިގެން ސަރުކާރަށް ވަރަށް ބޮޑަށް ފާޑުކިޔައިފަ އެވެ. އަދި ގައުމުގެ މަސައްކަތްތެރިންނާމެދު އިންޑިއާއިން އަމަލުކުރާ ގޮތް ލަދުވެތިކަމަށްވެސް ރާހުލް ވިދާޅުވި އެވެ. -- އަލްޖަޒީރާ