05 May 2020, 08:38
މި އަހަރުގެ ރަމަޟާން މަހަކީ މި ފަހުގެ ތާރީހެއްގައި ދިވެހިންނާ ބައްދަލުކުރާނެ އެންމެ ތަފާތު ރޯދަ މަހެވެ. ދިވެހިންގެ ރޯދައިގެ އާދަކާދަތައް މިވަނީ އެ ފުށްމި ފުށަށް ޖެހިފަ އެވެ. މީގެ ކުރިން ރޯދަ މަހު ކޮންމެ ދުވަހެއްގެ ހަވީރު މަގުތައް ފުރާލަނީ ފިނިބުރު ޖަހަން ނިކުންނަ ވެހިކަލްތަކުންނެވެ. ކުޑަކުދިން ގޮވައިގެން ބެލެނިވެރިން ނިކުންނަނީ ގުޑިއަރުވާށެވެ. އާއިލާ އާއި ރަހުމަތްތެރިން އެކުގައި ރޯދަވީއްލުންތައް ބާއްވަ އެވެ.
މި ހުރިހާ މާޔޫސްކަމަކާ އެކުވެސް ޔަގީން އެއްކަމެއް އެބަ އޮތެވެ؛ މިދުވަސްވަރު ގޭގައި ތިބެގެންވެސް ކުރެވޭނެ އެތައް ކަމެއް އެބަހުއްޓެވެ. އެކަމަކު ތިމާ މީހާ ގޭގައި ހުރެގެން ކުރަނީ ކީއް ހެއްޔެވެ؟ ލަވަކިޔުންތެރިޔާ ލަމްހާ ލަތީފް ލޮކްޑައުންގައި ހުރެ ރޯދަ މަހުގެ ދުވަހެއް ހޭދަކުރާ ގޮތް އޭނާ މި ވަނީ ކިޔައިދީފަ އެވެ.
ލަމް ބުނީ ކޮންމެ އަހަރެއްގެ ވެސް ރޯދަމަހަކީ ލަމްގެ އެންމެ ފޭވަރިޓް މަސް ކަމަށެވެ. ވޭތުވެދިޔަ އަހަރުތަކުގެ ރޯދަމަސްތަކުގައި މަސައްކަތުގައި ބުރަކޮށް އުޅެންޖެހުނު އިރު މި އަހަރުގެ ރޯދަ މަހު މަސައްކަތް ކުރަނީ ގޭގައި އިދެގެން ކަމަށް އޭނަ ބުންޏެވެ.
ލަމް ބުނީ ފަތިސް ނަމާދުކުރުމަށް ފަހު ކުޑަވަގުތުކޮޅަކަށް ނަމަވެސް ނިދާލާ ކަމަށާއި ހޭލެވުނުހާ އެންމެ އަވަހަކަށް އެންމެންނެކޭ އެއްގޮތަށް އޭނާވެސް ފޯނަށް އައިސްފައި ހުރި މެސެޖުތަކާ އެއްޗެހި ކިޔާލާ ހަދާކަމަށެވެ. އެއަށްފަހު އާއިލާގެ މީހުންގެ ހަބަރު ބަލާލުމަށްފަހު ކޮޓަރިތެރެ ސާފުކުރުމައިގެ މަސްއޫލުވާކަމަށެވެ. މެންދުރު ނަމާދު ބަންގި ގޮވުމުން ނަމާދުކޮށްލުމަށްފަހު ބަދިގެ ތެރޭ މަންމަ އާއި ކޮއްކޮ އަށް އެހީތެރިވާ ކަމަށް ލަމް ބުންޏެވެ.
ރޯދަވީއްލުމަށް ކާއެއްޗެހި ތައްޔާރުކުރުމަށްފަހު އަސްރު ނަމާދުކޮށްގެން ޓީވީ ބެލުމަށް ކުޑަވަގުތުކޮޅެއް ލަމް ހޭދަކޮށްލަ އެވެ. މި ލޮކްޑައުންގައި އޭނާ ވަނީ ޖާނަލް ވެސް ލިޔަން ފަށާފަ އެވެ. އަދި މި ލޮކްޑައުންއަށް ފަހު، ދެން ދަތުރުކުރާނެ މަންޒިލްތައް ހިމެނޭ ޓްރެވެލް އައިޓަނަރީސްތައް ވެސް އޭނާ އަންނަނީ ލޮކްޑައުންގެ ތެރޭ ޕްލޭން ކުރަމުންނެވެ.
ރޯދަވީއްލާއި މަޣްރިބު އަދި އިޝާކުރުމަށްފަހު އާއިލާ މެންބަރުންނާއެކު ވަގުތުކޮޅެއް ހޭދަކޮށްލުމަކީ ލަމް އަށް ލިބޭ ވަރަށް ބޮޑު އުފަލެކެވެ. އަދި އާއިލާ މެންބަރުންނާއެކު ގާތް ގުޅުމެއް އުފައްދައި އެ މީހުންނާއެކު ގޭމެއް ކުޅެ ހަދާލާ ފިލްމެއް ބަލާލަ އެވެ. ލަމް ބުނީ އަބަދުވެސް ބަލަނީ ކާއެއްޗެހި ތައްޔާރުކުރާއިރު އެންމެންނަށް ވާވަރަށް މަދު އެތިކޮޅު ތައްޔާރުކުރެވޭތޯ އެވެ. ރޭގަނޑުގެ ވަގުތަކީ އަނެއް ދުވަހު ރޯދަ ވީއްލަން ތައްޔާރުކުރާނެ އެއްޗަކާ މެދު އާއިލާގެ މެންބަރުންނާއެކު މަޝްވަރާކުރާ ވަގުތުކޮޅެެކެވެ. ކާއެއްޗެހި ހަދަން ވިސްނާއިރު ލަމް އެންމެ ބޮޑު ސަމާލުކަމެއް ދެނީ މިވަގުތު ގޭގައި ލިބެން ހުރި އެއްޗެހިން ކާއެއްޗެހި ތައްޔާރުކުރުމަށެވެ.
ހުރިހާ އެންމެންނެކޭ ވެސް އެއްފަދައިން ލަމް ވެސް މި ރޯދަމަހު މިސްވާނެ އެއްކަމެއް އެބައޮތެވެ. އެއީ ރޯދަވީއްލަން ސާމާނު ހެދުމަށްފަހު އާއިލާގެ މެންބަރުންނަށާއި ރަހުމަތްތެރިންނަށް ރޯދަ ވީއްލުމަށް ދައުވަތު ދިނުމެވެ. އެކަމެއް މިފަހަރު ވާކަށް ނެތެވެ.